އުރީދޫ މޯލްޑިވްސްގެ ބްރޭންޑް އެމްބެސެޑަރެއްގެ ގޮތުގައި ރާއްޖޭގެ އެންމެ ކާމިޔާބު އެއް ޓީމު ކަމަށްވާ ނިއު ރޭޑިއަންޓް ސްޕޯޓްސް ކްލަބް ހަމަޖައްސައިފިއެވެ.
އުރީދޫގެ ފަރާތުން މި އެއްބަސްވުމުގައި އެ ކުންފުނީގެ ސީއީއޯ ނަޖީބު ޚާން ސޮއިކުރެއްވިއިރު ނިއުގެ ފަރާތުން މި އެއްބަސްވުމުގައި ސޮއިކުރެއްވީ އެ ކްލަބްގެ ޗެއާމަން ކާނަލް ރިޓަޔާޑް މުހައްމަދު ޒިޔާދުއެވެ. މި އެއްބަސްވުމުގެ ދަށުން އުރީދޫ އާއި ނިއުގެ އެކަޑަމީ ގުޅިގެން ރާއްޖޭގެ އެކި ސަރަހައްދުތަކުގައި ކުޑަކުދިންނާއި ޒުވާނުންނަށް ހާއްސަ ކޯޗިން ޕްރޮގްރާމްތައް ކުރިޔަށް ގެންދިޔުމަށް ވަނީ ނިންމާފައެވެ. ހަމައެހެންމެ ރަހުމަތްތެރިކަމުގެ މެޗުތަކެއް ވެސް މި އެއްބަސްވުމުގެ ތެރެއިން ކުރިޔަށް ގެންދިޔުމަށް ވަނީ ނިންމާފައެވެ.
މި އެއްބަސްވުމުގައި ސޮއި ކުރެއްވުމަށް ފަހު ވާހަކަ ދައްކަވަމުން އުރީދޫގެ ސީއީއޯ ވިދާޅުވީ ނިއު ބްރޭންޑް އެމްބެސެޑަރެއްގެ ގޮތުގައި ހަމަޖައްސަން ނިންމީ އެ ކްލަބްގެ ފަރާތުން ހޯދާފައިވާ އަދި ހޯދަމުން އަންނަ ކާމިޔާބުތަކާއި ގުޅިގެން ކަމަށާއި މި އެއްބަސްވުން މެދުވެރިކޮށް އެ ކްލަބް އެހެން ހަރުފަތަކަށް ގެންދެވޭނެ ކަމަށް ގަބޫލުކުރައްވާ ކަމަށެވެ. ހަމައެހެންމެ ނަޖީބު ޚާން ވިދާޅުވީ މި އެއްބަސްވުން މެދުވެރިކޮށް ރާއްޖޭގައި އަރަމުން އަންނަ ޒުވާން ކުޅުންތެރިންނަށް އާ ފުރުސަތުތަކެއް ލިބިގެންދާނެ ކަމަށެވެ.
ނިއުގެ ޗެއާމަން ކާނަލް ރިޓަޔާޑް ޒިޔާދު ވިދާޅުވީ އުރީދޫގެ އެމްބެސެޑަރެއްގެ ހައިސިއްޔަތުން އެ ކުންފުނީގެ ތަފާތު އެކި ހަރަކާތްތަކުގައި އެ ކްލަބްއިން ބައިވެރިވާނެ ކަމަށާއި ރާއްޖޭގެ އެކި ސަރަހައްދުތަކުގައި އެކި ހަރަކާތްތައް މި އެއްބަސްވުމުގެ ދަށުން ކުރިޔަށް ގެންދާނެ ކަމަށެވެ. ހަމައެހެންމެ އުރީދޫ އިން މި އެއްބަސްވުމުގެ ދަށުން އެ ކްލަބްއަށް މާލީ ބޮޑު އެހީތެރިކަމެއް ދެއްވަން ނިންމާފައިވާ ކަމަށް ވެސް ޒިޔާދު ވިދާޅުވިއެވެ.
ވޭތުވެދިޔަ އަހަރުތަކުގައި އުރީދޫއިން ވަނީ ރާއްޖޭގެ ފުޓްބޯޅަ ކުރިއެރުވުމަށް ގިނަ މަސައްކަތްތަކެއް ކޮށްފައެވެ. އެ ކުންފުނިން ވަނީ އެ ކުންފުނީގެ ބްރޭންޑް އެމްބެސެޑަރު ކަމަށްވާ ބާސެލޯނާގެ ތަރި ލިއޮނެލް މެސީއާ އެކު ހާއްސަ ހަރަކާތްތަކެއް ކުރިޔަށް ގެންގޮސްފައެވެ. ހަމައެހެންމެ ޕީއެސްޖީއާ ގުޅިގެން ރާއްޖޭގައި ކުޑަކުދިންގެ ފުޓްބޯޅަ ކޯޗިން ކޭމްޕެއް އުރީދޫ އިން ބާއްވާފައިވެއެވެ. ރާއްޖޭގެ އެންމެ ބޮޑު ލީގު ކަމަށްވާ ޕްރިމިއާ ލީގު ވެސް 2015 ވަނަ އަހަރުން ފެށިގެން ސްޕޮންސަރ ކުރަމުން އަންނަނީ އުރީދޫ އިންނެވެ.
ނިއު ރޭޑިއަންޓްގެ އިތުރުން އުރީދޫގެ ބްރޭންޑް އެމްބެސެޑަރެއްގެ ގޮތުގައި ފްރާންސްގެ ގަދަ ބާރު ޕީއެސްޖީ ވެސް އަންނަނީ ހަރަކާތްތެރިވަމުންނެވެ.
