އިނގިރޭސި އެފްއޭ ކަޕްގައި މެންޗެސްޓާ ސިޓީ އަދި ޗެލްސީ ކުޅުނު މެޗުތަކުން އެ ދެ ޓީމު ވެސް މޮޅުވެ ފަސް ވަނަ ބުރަށް ދަތުރުކޮށްފިއެވެ.
ހަތަރު ވަނަ ބުރުގައި ރަށުން ބޭރުގައި ކާޑިފް ސިޓީއާ ދެކޮޅަށް ކުޅުނު މެޗުން މެންޗެސްޓާ ސިޓީ މޮޅުވީ 2-0 ގެ ނަތީޖާއަކުންނެވެ. މި މެޗަށް މެންޗެސްޓާ ސިޓީއިން ނުކުމެފައިވަނީ ތިން ބަދަލަކާއެކުއެވެ. އެގޮތުން ސާޖިއޯ އަގުއޭރޯ އާއި ޖޯން ސްޓޯންސް އަދި އޮލެކްޒެންޑާ ޒިންޗެންކޯގެ ބަދަލުގައި މި މެޗުގެ ފުރަތަމަ އެގާރައަށް ނެރެފައިވަނީ ބާނާޑޯ ސިލްވާ އާއި ވިންސެންޓް ކޮމްޕެނީގެ އިތުރުން ކައިލް ވޯކާއެވެ. މި މެޗުގައި އެ ޓީމުން ކުރިމަތިލީ ތިންވަނަ ބުރުގައި 4-1 އިން ބާންލީ ބަލިކުރުމަށްފަހުއެވެ.
ސިޓީގެ ފަރާތުން ރަނގަޅު ކުޅުމެއް ފެނިގެންދިޔަ މި މެޗުގައި އެ ޓީމުން ވަނީ ކާޑިފްގެ ގޯލަށް ނުރައްކާކުރުމަށް ގިނަ މަސައްކަތްތަކެއް ކޮށްފައެވެ. އެ ޓީމުގެ ފުރަތަމަ ލަނޑު ހިތްގައިމު ހިލޭ ޖެހުމަކުން އަށް ވަނަ މިނެޓުގައި އެ ޓީމަށް ޖަހައިދިނީ ބެލްޖިއަމްގެ މިޑްފީލްޑަރު ކެވިން ޑެބްރައިނާއެވެ. މި ލަނޑަށްފަހު ކާޑިފްއިން އެ ޓީމުގެ ކުޅުން ރަނގަޅުކުރިއިރު އެ ޓީމުން ވަނީ ލަނޑު ޖެހުމާއި ގާތަށް ގޮސްފައެވެ. ސިޓީއިން 25 ވަނަ މިނެޓުގައި ލަނޑެއް ޖެހި ނަމަވެސް ރެފްރީ ނިންމާފައިވަނީ އެއީ އޮފްސައިޑް ލަނޑެއްގެ ގޮތުގައެވެ. ސިޓީގެ ދެވަނަ ލަނޑު 37 ވަނަ މިނެޓުގައި ބަނާޑޯ ސިލްވާ ތަނަވަސްކޮށްދިން ފުރުސަތަކުން ޖަހައި ދިނީ ރަހީމް ސްޓާލިންއެވެ.
ދެ ލަނޑުގެ ލީޑެއްގައި އޮވެ ސިޓީއިން ފުރަތަމަ ހާފު ނިންމާލިއިރު އެ ޓީމަށް ދެވަނަ ހާފުގައި ދިމާވި އެންމެ ބޮޑު ގޮންޖެހުމަކީ އަނިޔާގެ ސަބަބުން ޖަރުމަނުގެ ވިންގަރ ލެރޯއި ސާނޭ ދަނޑުން ބާލަން ޖެހުމެވެ. މި ހާފުގައި އެއްވެސް ޓީމަކަށް އިތުރު ލަނޑެއް ޖެހިފައި ނުވާއިރު ކާޑިފްގެ ޖޯސެފް ބެނެޓްއަށް ވަނީ 90 ވަނަ މިނެޓުގައި ރަތް ކާޑު ދައްކައި ދަނޑުން ފޮނުވާލާފައެވެ.
މި މުބާރާތުގެ ފަސްވަނަ ބުރުން ޗެލްސީ ޖާގަ ހޯދީ އަމިއްލަ ދަނޑުގައި 3-0 ގެ ނަތީޖާއަކުން ނިއުކާސަލް ޔުނައިޓެޑް ބަލިކޮށްގެންނެވެ. ޗެލްސީގެ ފަރާތުން ވަރުގަދަ ފުރަތަމަ އެގާރައެއް ފެނިގެންދިޔަ މި މެޗުގައި އެ ޓީމުން ވަނީ ލަނޑު ޖެހުމަށް ހުސް ގިނަ ފުރުސަތުތަކެއް ތަނަވަސްކޮށްފައެވެ. ފުރަތަމ ހާފުގައި ޗެލްސީގެ ފަރާތުން ނުރައްކާތެރި ގިނަ ހަމަލާތަކެއް ފެނިގެންދިޔައިރު އެ ޓީމުން ވަނީ 31 ވަނަ މިނެޓުގައި މެޗުގެ ފުރަތަމަ ލަނޑު ޖަހާ ލީޑު ނަގާފައެވެ. މި ލަނޑު އެ ޓީމަށް ޖަހައިދިނީ މިޗީ ބަޓްޝުއާއީއެވެ. ފުރަތަމަ ހާފު ނިމެން މިނެޓަކަށް ވެފައިވަނިކޮށް އޭނާ ވަނީ އަނެއްކާ ވެސް ލަނޑެއް ޖަހައިދީ ޗެލްސީގެ ލީޑު އިތުރަށް ފުޅާކޮށްދީފައެވެ.
ދެ ލަނޑުގެ ލީޑެއްގައި އޮވެ ޗެލްސީއިން ފުރަތަމަ ހާފު ނިންމާލިއިރު އެ ޓީމުން ވަނީ ދެވަނަ ހާފުގައި ވެސް ފުރަތަމަ ހާފެކޭ އެއްގޮތަށް މެޗުގެ ކޮންޓްރޯލް ދަމަހައްޓާފައެވެ. މި ހާފުގައި ޗެލްސީއިން އުފެއްދި ގިނަ ހަމަލާތަކުގެ ހުރަހަކަށް ވެގެންދިޔައީ ނިއުކާސަލްގެ ކީޕަރު ކާލް ޑާލޯއެވެ. ޗެލްސީގެ ތިންވަނަ ލަނޑު 72 ވަނަ މިނެޓުގައި ލިބުނު ހިލޭ ޖެހުމަކުން ކާމިޔާބުކޮށްދިނީ މާކޯސް އަލޮންސޯއެވެ.
ފަސްވަނަ ބުރުގައި މި ދެ ޓީމު ކުޅެންޖެހޭ މެޗުތައް އަދި ކަށަވަރުވެފައެއް ނުވެއެވެ.
