ދިއްގަރު ދާއިރާގެ މެމްބަރު އަހްމަދު ފާރިސް ޝަރުތުތަކަކާއެކު ދޫކޮށްލަން ކްރިމިނަލް ކޯޓުން އަމުރު ކުރީ ބުރާސްފަތި ދުވަހު އެވެ. ފާރިސްގެ މައްޗަށް ހިންގަމުންދާ ރިޝްވަތު ހުށަހެޅުމުގެ ދައުވާ ނިމެންދެން ބަންދުގައި ބަހައްޓަން ކޯޓުން ކުރި އަމުރު ބާތިލްކޮށް ޝަރުތުތަކަކާއެކު އޭނާ ދޫކޮށްލަން އަމުރު ކުރުމުން ބައެއް މީހުން ތިބީ ހައިރާންވެފަ އެވެ. ސަރުކާރާ ދެކޮޅަށް އަމުރެއް ނެރުނީތީ ބައެއް މީހުން ތިބީ ވާނުވާ ނޭނގި އެވެ.
ފާރިސް ދޫކޮށްލަން އަމުރު ކުރި ފަހުން ދެ ދުވަސް ނުވަނީސް އަލުން ހައްޔަރުކުރަން ކޯޓުން އަމުރެއް ނެރެ ހައްޔަރުކުރުމުން މި ވަނީ ކިހިނެތް ކަމެއް މީހުންނަށް ނޭނގެ އެވެ. ހަމަ އެއް ގާޒީންތަކެއް ފާރިސް ދޫކޮށްލަން އަމުރު ކޮށްފައި އަނެއްކާވެސް ހައްޔަރުކުރަން އަމުރު ނެރެނީތޯ ބައެއް މީހުން ސުވާލު އުފެއްދި އެވެ.
އެހެން ނަމަވެސް ހަގީގަތަކީ މިއީ އެވެ. ފާރިސް ހައްޔަރުކުރުމަށް ކޯޓުން އަމުރެއް ނެރުނީ ހޮނިހިރު ދުވަހުގެ ފަތިހު 4.00 ގައިއެވެ. މި އަށްވުރެ އަދި މާ ޝައުގުވެރިވާ ވާހަކައެއް އެބަ އޮތެވެ. އެއީ މި އަމުރު ނެރުއްވާފައިވަނީ ކްރިމިނަލް ކޯޓުގެ ގާޒީކަމުގެ ހުވާ ކުރައްވައި އަދި ރަސްމީ ކޮށް އޮފީހަށް ވެސް ނުނިކުންނަވާ ގާޒީ އެކެވެ.
އެއީ މިދިޔަ ބުރާސްފަތި ދުވަހުގެ ރޭ ކްރިމިނަލް ކޯޓުގެ ގާޒީކަމާ ހަވާލުވެވަޑައިގެންނެވި ސ. ފޭދޫ ކޯޓުގެ މެޖިސްޓްރޭޓް ކަމުގައި ހުންނެވި ހުސައިން ޝަހީދު އެވެ. އޭނާ ކްރިމިނަލް ކޯޓުގެ ގާޒީކަމާ ހަވާލުވެވަޑައިގެންނެވި ފަހުން އަދި ސަރުކާރު ހުޅުވިފައިވާ ރަސްމީ ދުވަހެއް ނާދެ އެވެ.
ސިޔާސީ ގޮތުން ވަކި ފަރާތެއްގެ ނުޒޫފުން ނެރުނު އަމުރެއް ކަމަށް ތުހްމަތުކުރަމުންދާ މި އަމުރު އޭނާ ފަތިސް ގަޑީގައި ނެރުއްވިއިރު ކްރިމިނަލް ކޯޓުގައި ގާޒީކަމުގައި ހަތަރު ބޭފުޅުން ކުރިންސުރެ މަސައްކަތް ކުރައްވަމުން ގެންދަވަ އެވެ. އެ ކޯޓުގެ އިސް ގާޒީ ކަމާ ހަވާލުވެވަޑައިގެން ހުންނެވީ އާދަމް އާރިފު އެވެ. މިވަމުންދާ ގޮތެއް އޭނާއަށް އެނގިވަޑައިނުގަންނަވާ ކަމަށް ވަނީ އެނގިފަ އެވެ.
ޝަހީދުގެ އިތުރުން ކްރިމިނަލް ކޯޓަށް ބުރާސްފަތި ދުވަހު އެހެން ގާޒީއަކު ވެސް ހައްޔަން ކުރެއްވި އެވެ.
ގާޒީކަމާ ހަވާލުވެ ކޯޓަށް ރަސްމީކޮށް ނުކުމެވަޑައިނުގެން ސިޔާސީ ބޭފުޅަކު ހައްޔަރު ކުރުމަށް އަމުރު ނެރުމުން ގިނަ ބައެއްގެ ފާޑުކިޔުން ޝަހީދަށް ވަނީ އަމާޒުވެފަ އެވެ. ފާޑުކިޔުން އަމާޒުވާނެ ސަބަބުތައް ވެސް އެބަ ހުއްޓެވެ. ފާރިސް ހައްޔަރުކުރުމަށް އަމުރު ދިން އިރު، ހައްޔަރުކުރުމުގެ އަމުރު ޖެހުމުގެ ތާވަލަށް އޭނާ ލެވެންވީ ގޮތެއް ވެސް ނެތެވެ. އާންމު އުސޫލުން ދާނަމަ އެ ތާވަލަށް ޝަހީދު ލާނީ އެންމެ އަވަސް ވިޔަސް އާދީއްތަ ދުވަހު އެވެ.
މި ކަންކަން ހިނގާ ގޮސްފައިވާ ގޮތުން ގިނަ ސުވާލުތަކެއް އުފެދެ އެވެ. ޝަހީދު ވެސް ވިސްނަވާށެވެ.
ފާރިސް ހައްޔަރު ކުރުމަށް ހޮނިހިރު ދުވަހުގެ ރޭ އަމުރެެއް ނެރުމަށްފަހު ހަމަ އެ އަމުރު ތަންފީޒްކޮށްފައިވާ ގޮތާއި ބަންދުގެ މުއްދަތުގެ މުއްދަތު އިތުރު ކުރުމާ ގުޅޭ ގޮތުން މައްސަލަ ހަމަ އެ ގާޒީ މައްސަލަ ބެއްލެވުމަކީ އިންސާފާ ބީރެއްޓެހި ގޮތެކެވެ. ބަންދުގެ މައްސަލަތައް ބަލާނެ ތަރުތީބާއި މައްސަލަތައް ބަހާލާ ތާވަލެއް އެކުލަވާލަން ޖެހޭއިރު އަދި އޮފީހަށް ރަސްމީކޮށް ނުނިކުންނަވާ ގާޒީއެއް އެ ޝެޑިއުލްގައި ހިމެނުނީ ކިހިނެތްކަމާމެދު ސުވާލު އުފެދެ އެވެ. މި ހުރިހާ ކަމެއް ދުރުން ބަލާލާ މީހަކަށް ފުރުސަތު ލިބިގެންދަނީ ގާޒީ ޝަހީދަކީ ފާރިސްގެ މައްސަލަ އަށް ހާއްސަ ގާޒީއެއްގެ ގޮތުގަ އެވެ. މީގެ ކުރިންވެސް ސިޔާސީ ބޭފުޅުންގެ މައްސަލަތައް ވަކި ގާޒީން ބައްލަވާފައިވެ އެވެ.
