ޖަރުމަނުގެ އެންމެ މޮޅު ކުޅުންތެރިޔާގެ އެވޯޑު ކިމިޗްއަށް

މިދިޔަ އަހަރު ޖަރުމަނުގެ ކުޅުންތެރިންގެ ތެރެއިން އެންމެ މޮޅު ކުޅުމެއް ދެއްކި ކުޅުންތެރިޔަކަށް ބަޔާން މިއުނިކްގެ ޒުވާން ޑިފެންޑަރު ޖޯޝުއާ ކިމިޗް ބުނެފިއެވެ.

މިދިޔަ އަހަރަކީ އުމުރުން 22 އަހަރުގެ ކުޅުންތެރިޔާއަށް ވަރަށް ކާމިޔާބު އަހަރެކެވެ. އޭނާ މި އެވޯޑު ހޯދީ 20000 (ވިހި ހާސް) އަށް ވުރެ ގިނަ ވޯޓާއެކުއެވެ. އޭނާގެ ފަހަތުން ދެވަނައަށް ދިޔައީ ޕީއެސްޖީއަށް ކުޅެމުން އަންނަ މިޑްފީލްޑަރު ޖޫލިއަން ޑްރެކްސްލާއެވެ. ހަމައެހެންމެ ތިންވަނައަށް ހޮވިފައިވަނީ ބާސެލޯނާގައި މޮޅު ކުޅުމެއް ދައްކަމުން އަންނަ ހުނަރުވެރި ގޯލްކީޕަރު މާކް އެންޑާ ޓަރ ސްޓީޖެންއެވެ.

މިދިޔަ ހަ އަހަރުތެރޭ ފަސް ފަހަރު މި އެވޯޑު ހޯދި އާސެނަލްއަށް ކުޅެމުން އަންނަ އިތުބާރު މިޑްފީލްޑަރު މެސުޓް އޮޒިލް މިފަހަރުގެ އެވޯޑަށް ނޮމިނޭޓް ވެފައެއް ވެސް ނުވެއެވެ. ހަމައެހެންމެ މެޓްސް ހުމެލްސްއާ ޓޯނީ ކްރޫސްގެ އިތުރުން ތޯމަސް މުލާ ވެސް ނޮމިނޭޓް ވެފައެއް ނުވެއެވެ. މި ކުޅުންތެރިން ނޮމިނޭޓް ވެފައި ނުވަނީ މިދިޔަ އަހަރު ކުޅުނު މެޗުތައް މަދުވުމުގެ ސަބަބުންނެވެ. އެ ކުޅުންތެރިން މިދިޔަ އަހަރު މަދު މެޗު ކުޅެފައިވަނީ ޖަރުމަނުގެ ކޯޗު ޖޯކިމް ލޯ ޒުވާން ކުޅުންތެރިންނަށް ފުރުސަތު ދިނުމާއި ގުޅިގެންނެވެ.

ބަޔާންގެ ކެޕްޓަން ފިލިޕް ލާމް ރިޓަޔާ ކުރުމާއި ގުޅިގެން ބަޔާންއާއި ޖަރުމަނުގެ ގައުމީ ޓީމުގެ ޑިފެންސްގައި އުފެދުނު ބާގަނޑު ފުރުމުގެ ބޮޑު ޒިންމާއާއި ހަވާލުވީ އޭނާއެވެ. އަދި އޭނާވަނީ މި ޒިންމާ ވަރަށް ފުރިހަމައަށް އަދާކޮށްފައެވެ. އެގޮތުން ޖަރުމަނުގެ ގައުމީ ޓީމާއެކު ފީފާ ކޮންފެޑެރޭޝަންސް ކަޕް ކާމިޔާބު ކުރުމުގެ އިތުރަށް ބަޔާންއާއެކު ބުންޑެސްލީގާގެ އިތުރުން ޖަރުމަނު ސުޕާކަޕް އޭނާ ވަނީ ކާމިޔާބުކޮށްފައެވެ.

މިދިޔަ އަހަރު ޖަރުމަނުގެ ގައުމީ ޓީމުން ކުޅުނު 15 ބައިނަލްއަގްވާމީ މެޗުގެ ތެރެއިން ކިމިޗް ކުޅެފައި ނުވަނީ އެންމެ މެޗެއްގައެވެ. ޖަރުމަނުގެ 19 އަހަރުން ދަށުގެ ގައުމީ ޓީމާއެކު 2014 ވަނަ އަހަރުގެ 19 އަހަރުން ދަށުގެ ޔޫރޯ މުބާރާތް ކާމިޔާބުކުރި ކިމިޗް ވަނީ އޭނާގެ ކެރިއަރުގައި 158 މެޗު ކުޅެދީ 15 ލަނޑު ޖަހައިދީފައެވެ.