ރިސޯޓްތަކަށް ފުލުހުން އެރުން: އިދިކޮޅު ފަރާތްތަކުގެ އެއްވުމެއް މިރޭ
20 ޖެނުއަރީ 2018 | ހޮނިހިރު 16:23އެއްވުން ފެށުމަށް ހަމަޖެހިފައިވަނީ މިރޭ 21:00 ގައި
ހުކުރު ދުވަހުގެ ހަވީރު ކުރިއަށްގެންދިޔަ އެއްވުމުގެ ތެރެއިން
ޖުމްހޫރީ ޕާޓީގެ ލީޑަރު ޤާސިމް އިބްރާހިމްގެ ރިސޯޓުތަކަށް އަރައި، ވިޔަފާރި ހުއްޓުވުމަށް ފުލުހުންނާއި ކަސްޓަމްސްއިން ކުރާ މަސައްކަތްތަކާއި ދެކޮޅަށް އަޑު އުފުލުމުގެ ގޮތުން އެއްވުމެއް ބޭއްވުމަށް ގުޅިފައިވާ ސިޔާސީ ޕާޓީތަކުން ނިންމައިފި އެވެ.
ގުޅިފައިވާ ސިޔާސީ ޕާޓީތަކުގެ އެއްވުން ފެށުމަށް ހަމަޖެހިފައިވަނީ، ޕާޓީތަކުގެ މައި ޖަގަހަ ގޮތުގައި ބޭނުންކުރަމުން އަންނަ މ. ކުނޫޒުންނެވެ. މި އެއްވުމަކީ ޓުވަރިޒަމް ފުނޑާލާ ރައްޔިތުންގެ މުދާ ފޭރުމާއި ދެކޮޅަށް އަޑު އުފުލުމުގެ ގޮތުން ބާއްވާ އެއްވުމެއް ކަމަށް ޕާޓީތަކުން ބުނެ އެވެ.
ގުޅިފައިވާ ސިޔާސީ ޕާޓީތަކުން ހުކުރު ދުވަހުގެ ހަވީރުވެސް އެއްވުމެއް ކުރިއަށްގެންގޮސްފައިވާއިރު، ރާއްޖޭގެ ބައެއް ރަށްރަށުގައި މިއަދު (ހޮނިހިރު ދުވަހު) ވެސް މުޒާހަރާތަކާއި އެއްވުންތައް ކުރިއަށްގެންގޮސްފައިވެއެވެ. އެގޮތުން ޤާސިމް އިބްރާހިމްގެ އުފަން ރަށް މާމިގިލީގައިވެސް ވަނީ މުޒާހަރާ ކުރިއަށް ގެންގޮސްފަ އެވެ.
