ޑާކްރެއިން އިން 'ޕަރީ' ރިލީޒްކޮށްފި

ދިވެހި ފިލްމް އެވޯޑްގެ ގިނަ އެވޯޑްތަކަކާއިއެކު، އަހަރުގެ އެންމެ ކާމިޔާބު ސްޓޫޑިއޯގެ ގޮތުގައި 2017 ވަނަ އަހަރު ނިންމައިލި ޑާކް ރެއިން އެންޓަރޓެއިންމަންޓްއިން މި އަހަރު ފުރަތަމަ ރިލީޒް ކުރުމަށް ތައްޔާރުވަމުންދާ ފިލްމު، 'ވަކިން ލޯބިން' ގެ ފުރަތަމަ ޕްރޮމޯޝަނަލް ލަވަ، 'ޕަރީ' ރިލީޒްކޮށްފިއެވެ.

'ޕަރީ' އަކީ މަޝްޙޫރު މިއުޒިކް ބޭންޑް، އިކުއެޓިކް ވައިބްގެ ރީތި އަމިއްލަ ރާގުގެ ލަވައެކެވެ. 'ވަކިން ލޯބިން' ފިލްމުގެ މަންޒަރުތައް ހިމަނައިގެން ޑާކްރެއިން އެންޓަރޓެއިންމަންޓުން މި ލަވައިގެ ވީޑިއޯ ނެރުނުއިރު، އެ ސްޓޫޑިއޯއިން މީގެ ކުރިން ވަނީ މި ލަވައިގެ އޯޑިއޯ ސައުންޑްކްލައުޑްގައި އާންމުކޮށްފައެވެ.

'ވަކިން ލޯބިން' ގެ ވާހަކަ އާއި ގުޅޭގޮތުން ޑާކްރެއިން އެންޓަރޓެއިންމަންޓުން މާބޮޑު މަޢުލޫމާތެއް ހާމަކޮށްފައި ނުވާއިރު، މި ފިލްމުގެ ލީޑު ދެ ކެރެކްޓަރގެ ރޯލުން ފެނިގެންދާނީ ޑާކްރެއިން އެންޓަރޓެއިންމަންޓްގެ އެންމެ މަޤުބޫލު ލޯޑް ޖޯޑު ކަމުގައިވާ މުޙައްމަދު ޖުމައްޔިލް (ޖުމަލް) އާއި މަރިޔަމް މަޖުދާ (މަޖޫ) އެވެ. މީގެ އިތުރުން މި ފިލްމުގެ މުހިއްމު ރޯލަކުން ނުޒުހަތު ޝުއައިބް (ނުޒޫ) ވެސް ފެނިގެންދާނެއެވެ.

'ޕަރީ' އިން ފެނިގެންދާ މަންޒަރުތަކަށް ބަލާއިރު މި ފިލްމުގައި ޖުމަލް ކުޅެނީ އެކަނިވެރި ބައްޕައެއްގެ ރޯލެވެ. ލަވައިން މަޖޫ ނުފެންނައިރު، ޖުމަލް އާއި ނުޒޫ އާއި ދެމެދު ލޯބީގެ ގުޅުމެއް އުފެދިގެންދާ މަންޒަރު ފެނެއެވެ. އަދި ދޮން މަންމައެއްގެ ގޮތުގައި ޖުމަލްގެ ދަރިފުޅުގެ ހަޔާތަށް ނުޒޫ ގެނައުމަށް ދަރިފުޅާއި، ނުޒޫ އާއި އެކު ޖުމަލް ހޭދަކުރާ ވަގުތުތައްވެސް ލަވައިން ވަނީ ދައްކާފައެވެ. އެހެންކަމުން ލަފާކުރެވޭ ގޮތުގައި ފިލްމުގައި މަޖޫ ފެނިގެންދާނީ ޖުމްލަގެ ކުރީގެ އަނބިމީހާ އަދި ޖުމަލްގެ ދަރިފުޅުގެ މަންމަގެ ގޮތުގައެވެ.

ޑާކްރެއިން އެންޓަރޓެއިންމަންޓުން، މޮގަރ އާއި އެކު އައިޝަތު ފުވާދް ޕްރޮޑިއުސްކުރާ މި ފިލްމުގައި ޖުމަލް އައި މަޖޫގެ އިތުރުންވެސް ގިނަ ފަންނާނުންތަކެއް ފެނިގެންދާނެއެވެ. އެގޮތުން ޚަދީޖާ އިބްރާހިމް ދީދީ (ކުޑަ ހައްޖަ)، އަޙުމަދު ސުނީ، ޢަބްދުﷲ ޝާފިއު އިބްރާހިމް، މަރިޔަމް ޔާލާ ޝިފާއު، ޢައިޝަތު ޝްއުއާ ޝާނިޒް އަދި ހަސަން މަނިކުގެ އިތުރުން އާދަމް ރިޒްވީ، މާރިއާ ޓެރޭސާ، އިބްރާހިމް އަމާން ޙުސައިން، އަޙުމަދު ޝާކިރު، މާއިޝާ އަޙުމަދާއި މަރިޔަމް ސާޖިޔަތުވެސް މި ފިލްމުން ފެނިގެން ދާނެއެވެ. މީގެ އިތުރުންވެސް މި ފިލްމުން ބައެއް ފަންނާނުން ފެނިގެން ދާނެއެވެ.

އައިޝަތު ފުވާދް ލިޔެފައިވާ ވާހަކައަކަށް ހަދާ މި ފިލްމު ޑައިރެކްޓް ކޮށްފައިވަނީ އަލީ ޝިފާޢު (ޗިއްޕެ) އެވެ. ޑާކްރެއިން އެންޓަރޓެއިންމަންޓްގެ ގިނަ ފިލްމުތަކޭވެސް އެއްގޮތަށް މި ފިލްމުގެ ވިޜުއަލް އިފެކްޓްސް ހަދާފައިވަނީވެސް އަޙުމަދު ޝިނާނެވެ. މި ފިލްމަށް ޙުސައިން ޝަދިޔާން (ސޭންޑީ) ކޮސްޓިއުމް ޑިޒައިން ކޮށްދީފައިވާއިރު، މި ފިލްމުގެ މިއުޒިކް ހަދާފައިވަނީ މުޙައްމަދު އިކްރާމްއެވެ.

ފިލްމު ރިލީޒްކުރުމަށް ނިންމާފައިވަނީ މި އަހަރުގެ މާރިޗު މަހުގެ 5 ވަނަ ދުވަހުގެރޭ އޮލިމްޕަހުގައެވެ.