އޮސްޓްރޭލިއަން އޯޕަން: ޝަރަޕޯވާ ތިންވަނަ ބުރަށް، މުގުރުޒާ ކަޓައިފި

އޮސްޓްރޭލިއަން އޯޕަންގެ ތިންވަނަ ބުރުން ރަޝިއާގެ މާރިއާ ޝަރަޕޯވާ ޖާގަ ހޯދިއިރު ތިންވަނައަށް ސީޑު ކުރެވުނު ސްޕެއިންގެ ގާބައިން މުގުރުޒާ ކަޓައިފިއެވެ.

މިއަހަރުގެ މުބާރާތުގެ ތިންވަނަ ބުރުން ޝަރަޕޯވާ ޖާގަ ހޯދީ ދެވަނަ ބުރުގައި 14 ވަނައަށް ސީޑު ކުރެވިފައިވާ ލެޓްވިއާގެ އެނަސްޓޭސިއާ ސެވަސްޓޯވާ ސީދާ ދެ ސެޓުން ބަލިކޮށްގެންނެވެ. މިދިޔަ އަހަރުގެ ޔޫއެސް އޯޕަން މުބާރާތުން ޝަރަޕޯވާ ކަޓުވާލި ސެވަސްޓޯވާއާ ދެކޮޅަށް ކުޅުނު މެޗުގެ ސެޓުތައް އޭނާ ގެންދިޔައީ 6-1 އަދި 7-6 އިންނެވެ. ތިންވަނަ ބުރުގައި ޝަރަޕޯވާ ނުކުންނަން ޖެހޭނީ 21 ވަނައަށް ސީޑު ކުރެވިފައިވާ އެންޖެލިކް ކާބާއާ ދެކޮޅަށެވެ.

މި މުބާރާތް 2008 ވަނަ އަހަރު ކާމިޔާބުކުރި ޝަރަޕޯވާ މެޗުން މޮޅުވުމަށް ފަހު ބުނީ ތިން ސެޓަށް މެޗު ދިގުދެމިގެން ގޮސްދާނެ ކަމަށް ވެސް ހީކުރި ކަމަށާއި އެހެން ނަމަވެސް ދެ ސެޓުން މެޗު ނިންމާލެވުމުން ވަރަށް އުފާވެފައި ހުރި ކަމަށެވެ. ތިންވަނަ ބުރުގައި ޝަރަޕޯވާ ވާދަކުރަން ޖެހޭ ކާބާ ކޮލިފައިވީ ކްރޮއޭޝިއާގެ ޑޮނާ ވެކިޗް ސީދާ ދެ ސެޓުން ބަލިކޮށްގެންނެވެ.

ދުނިޔޭގެ އެއްވަނައިގައި މިވަގުތު ރޭންކް ކުރެވިފައި އޮތް ސައިމޯނާ ހޭލެޕް ތިންވަނަ ބުރަށް ދަތުރުކުރީ ސީދާ ދެ ސެޓުން ކެނެޑާގެ ޔޫޖީން ބުޗާޑް ބަލިކޮށްގެންނެވެ. މި މެޗުގެ ސެޓުތައް ހޭލެޕް ގެންދިޔައީ 6-2 އަދި 6-2 އިންނެވެ. ތިންވަނަ ބުރުގައި އޭނާ ނުކުންނާނީ އެމެރިކާގެ ލޯރެން ޑޭވިސްއާ ދެކޮޅަށެވެ.

މި މުބާރާތުގެ ތިންވަނައަށް ސީޑު ކުރެވިފައިވާ ސްޕެއިންގެ ގާބައިން މުގުރުޒާ ވަނީ ސީދާ ދެ ސެޓުން ޓައިވާންގެ ސިއޭ ސޫވެއި އަތުން ބަލިވެ މުބާރާތުން ކަޓާފައެވެ. އުމުރުން 24 އަހަރުގެ މުގުރްޒާއަށް މި މެޗުގެ ސެޓުތައް ގެއްލުނީ 7-6 އަދި 6-4 އިންނެވެ. މުބާރާތުން ކެޓުމަށް ފަހު ނޫސްވެރިންނާއި ވާހަކަ ދައްކަމުން އޭނާ ބުނީ މެޗުން މޮޅުވާން އިދިކޮޅު ކުޅުންތެރިޔާއަށް ހައްގު ކަމަށާއި ކޯޓުގެ މައްސަލަތައް ދިމާވި ކަމަށެވެ.

މި ކުޅުންތެރިންގެ އިތުރުން ޗެކްރިޕަބްލިކްގެ ކެރޮލައިން ޕްލިސްކޯވާ އާއި އިނގިރޭސިވިލާތުގެ ޖޮއާނާ ކޮންޓާގެ އިތުރުން ފްރާންސްގެ ކެރޮލައިން ގާސިއާ ވަނީ ތިންވަނަ ބުރުން ޖާގަ ހޯދާފައެވެ.