ސާފު ލޮލަކާ އެކީ އުތުރު ކޮރެއާއާ އެކު މަތީ ފެންވަރުގެ މަޝްވަރާތައް ކުރިއަށް ގެންދާނަން: ދެކުނު ކޮރެއާ
މަޝްވަރާތައް ބާއްވާއިރު އުތުރު ކޮރެއާގެ އަމަލުތަކާ ގުޅިގެން ބައިނަލްއަގްވާމީ މަސްރަހު ވަނީ އެގައުމާ މެދު ވަރަށް ހިތްހަމަނުޖެހިފައި
އުތުރު ކޮރެއާ އިން ދަނީ ތަކުރާރުކޮށް އެގައުމުގެ ބާރު ދައްކާލުމުގެ ހަރަކާތްތައް ހިންގަމުން
"ސާފު ލޮލަކާއި އެކީ" އުތުރު ކޮރެއާއާ އެކު މަތީ ފެންވަރުގެ މަޝްވަރާތައް ކުރިއަށް ގެންދާނެ ކަމަށް ދެކުނު ކޮރެއާ އިން ބުނެފިއެވެ.
ދެކުނު ކޮރެއާ އިން މިހެން ބުނި އިރު ބައިނަލްއަގްވާމީ މުޖުތަމައު އިން ބުނަމުން ދަނީ އުތުރު ކޮރެއާ އިން މަޝްވަރާއަކަށް އިޚްލާސްތެރި ހިތެއް ނެތް ކަމަށާއި އެގައުމުން ބޭނުން ވަނީ ނިއުކްލިއާ ޕްރޮގްރާމް ހިންގުމަށް ފުރުސަތު ހޯދުމަށް ވަގުތު ދުއްވާލުމަށް ކަމަށެވެ.
އުތުރު ކޮރެއާ އާ އެކު މަޝްވަރާ ކުރާނެ ކަމަށް ދެކުނު ކޮރެއާ އިން ބުނި އިރު، މިކަމާ ބެހޭ ގޮތުން ދެކުނު ކޮރެއާގެ ފޮރިން މިނިސްޓަރު ކަންގް ކިއުންގް-ވާ ބީބީސީ އަށް ވިދާޅުވީ "މަޝްވަރާތަކުގެ ބޭނުން ފުރިހަމައަށް ހިފަން ޖެހޭނެ," ކަމަށެވެ.
އަންނަ މަހު ދެކުނު ކޮރެއާގައި ބާއްވާ ވިންޓާ އޮލިމްޕިކްސްގައި އުތުރު ކޮރެއާ އާއި ދެކުނު ކޮރެއާ އިން އެއްބައެއްގެ ގޮތުގައި އެއް ދިދައެއްގައި މާޗް ކުރުމަށް ވަނީ ނިންމާފައެވެ. ވިންޓާ އޮލިމްޕިކްސް ބާއްވަނީ ފެބްރުއަރީ މަހުގެ 9 އިން 25 އަށް ދެކުނު ކޮރެއާގެ ޕިޔޮންޔަންގައެވެ.
ދެކުނު ކޮރެއާ އިން އުތުރު ކޮރެއާއާ އެކު ވާހަކަތައް ބާއްވާނެ ކަމަށް ބުނިއިރު އުތުރު ކޮރެއާގެ ނިއުކްލިއާ ހަތިޔާރު ފައްކާކުރުމުގެ ޕްރޮގްރާމާ ގުޅިގެން އެމެރިކާ އާއި އެގައުމުގެ ގާތް ބައިވެރިން ދަނީ އުތުރު ކޮރެއާ އަށް ޕްރެޝަރު ކުރުމަށް ބާރުއަޅަމުންނެވެ.
ބައިނަލްއަގްވާމީ ދުނިޔެއިން ތަކުރާރުކޮށް އުތުރު ކޮރެއާ އަށް އަންގަމުން ދަނީ ނިއުކްލިއާ ހަތިޔާރު ފައްކާކުރުމުގެ ޕްރޮގްރާމް ހުއްޓާލުމަށާއި އަދި މިސައިލް ޓެސްޓްތައް ކުރުން ހުއްޓާލުމަށެވެ. އެހެން ނަމަވެސް އުތުރު ކޮރެއާ އިން ބައިނަލްއަގްވާމީ ދުނިޔޭގެ ގޮވުންތަކަށް ދަނީ ބީރުކަންފަތެއް ދެމުންނެވެ. މިހާތަނަށް އދ. އާއި އެމެރިކާ އިން ވެސް ވަނީ އުތުރު ކޮރެއާއާ ދެކޮޅަށް ދަތިކުރުމުގެ ފިޔަވަޅު އަޅާފައެވެ. އެހެން ނަމަވެސް އުތުރު ކޮރެއާގެ އަމަލުތަކަކަށް ބަދަލެއް ނާދެއެވެ.
