ތައިލޭންޑްގެ ރިއަލް އެސްޓޭޓް ވިޔަފާރީގައި ހަރަކާތްތެރިވާ ކުންފުންޏެއް ކަމަށްވާ ސިންގް އެސްޓޭޓް ޕަބްލިކް ކުންފުނިން އޯޕަން ހައުސް އިވެންޓެއް ބާއްވައިފިއެވެ.

އެ ކުންފުނިން އެނބޫދޫ ފަޅުގައި ހިންގާ ކްރޮސްރޯޑް މޯލްޑިވްސްގައި، އިންވެސްޓްކުރުމުގެ ފުރުސަތު ރާއްޖޭގެ އިންވެސްޓަރުންނަށް ވަނީ ހުޅުވާލާފައެވެ.

އާޓް ގެލަރީގައި މި އޯޕަން ހައުސް އިވެންޓް ކުރިއަށް ގެންގޮސްފައި ވަނީ ހޯމަ ދުވަހު ދުވަހުގެ ހެނދުނު 9:00 އިން ހަވީރު 5:00 އަށެވެ. މި އިވެންޓްގައި ރާއްޖޭގެ 15 އިންވެސްޓަރުންނާއި ރާއްޖޭން ބޭރުގެ އިންވެސްޓަރުން ވެސް ބައިވެރިވިއެވެ.

ދުނިޔޭގެ 15 އަށް ވުރެ ގިނަ ރީޓެއިލް ބްރޭންޑްތަކުން ވަނީ އެކި ދާއިރާތަކުން މި އިވެންޓްގައި ބައިވެރިވެފައެވެ.

މީގެ ތެރޭގައި ހެލްތު އެންޑް ވެލްނެސް އަދި ފުޑް އެންޑް ބެވަރޭޖަސްގައި ހަރަކާތްތެރިވާ މަޝްހޫރު ބައެއް ފަރާތްތައް ކަމުގައިވާ މެންގޯ ޓްރީ ބިސްޓްރޯ، އިންޑަސް، ކެނީ ރޮޖަރސް، ނަރަޔާ އަދި ދިވާނަ ސްޕާގެ ފަރާތުން ވަނީ މި އިވެންޓުގައި ބައިވެރިވެފައެވެ.

ސިންގް އެސްޓޭޓް ކޮންޕެނީ ލިމިޓެޑްގެ ޗީފް އޮޕަރޭޓިންގް އޮފިސަރ މރ. ތިޓީ ތޮންބެންޖަމަސް ވިދާޅުވީ މި އޯޕަން ހައުސް އިވެންޓް ބޭއްވުމުގެ މަގްސަދަކީ ރާއްޖޭގެ އިންވެސްޓަރުންނަށް އިންވެސްޓް ކުރުމުގެ ފުރުސަތު ހުޅުވާލައި، އިންޓަރނެޝެނަލް ބްރޭންޑްތަކުގެ މައުލޫމާތު ރާއްޖޭގެ އިންވެސްޓަރުންނަށް ފޯރުކޮށްދިނުން ކަމަށެވެ.

ސިންގް އެސްޓޭޓް ޕަބްލިކް ކުންފުންޏަކީ ތައިލޭންޑްގެ ރިއަލް އެސްޓޭޓް ކުންފުންޏެކެވެ. މި ކުންފުނީގެ އަމާޒަކީ ވިޔަފާރި ފުޅާކުރުމާއި، އަދި ރަނގަޅު ދިމަދިމާލުން ބިން ގަނެ އިންވެސްޓްކޮށް އިމާރާތްކުރުމެވެ.