ކާޖޮލް އާއި ޝާހުރުކް ޚާން އަނެއްކާ ވެސް އެކީގައި ފެންނަނީ

ބޮލީވުޑްގެ ތަރިންގެ ތެރެއިން ބޮލީވުޑްގައި އެންމެ ގުޅޭ ޖޯޑުގެ ގޮތުގައި ގިނަ ބަޔަކު ދެކޭ އެއް ޖޯޑަކީ ޝާހުރުކް ޚާންއާއި ކާޖޮލް ދޭވްގަން އެވެ.

އެ ދެމީހުން އެކުގައި ކުޅެފައިވާ ފިލްމުތަކަކީ ބެލުންތެރިންގެ އެތައް ތައުރީފެއް އޮހެމުން ދިޔަ ފިލްމުތަކެވެ. އެންމެ ފަހުން މި ދެތަރިން ފެނިގެން ގޮސްފައިވަނީ 2015 ވަނަ އަހަރު ނިކުތް "ދިވާލޭ" އިންނެވެ.

އެންމެ ފަހުން އިވިގެން މިދިޔައީ އެ ދެ މީހުން އަނެއްކާ ވެސް ސްކްރީނުގައި އެކީގައި ފެނިގެންދާ ޚަބަރެވެ. ކާޖޮލް ވެސް ވަނީ އޭނާ އާއި ޝާހުރުކް ޚާން އެކީގައި ފެންނާނެކަމަށް ބުނެފައެވެ.

މި ފަހަރު ކާޖޮލް އާއި ޝާހުރުކް ޚާން ފެނިގެން ދާނީ މިހާރު ޝޫޓް ކުރަމުން އަންނަ ފިލްމު "ޒީރޯ" ގެ ޚާއްސަ ފެނިލުމަކުންނެވެ. ޒީރޯގައި ޝާހުރުކް ޚާނާއި އެކީގައި ލީޑު ރޯލުން ފެނިގެން ދަނީ ކެޓްރީނާ ކައިފްއާއި އަނުޝްކާ ޝަރުމާއެވެ.

ކާޖޮލް ބުނެފައިވަނީ ޝާހުރުކް ޚާނަކީ އަބަދުވެސް އޭނާ ކުރާ ކޮންމެ އެކްޓަކަށް 300 ޕަސެންޓު ދޭ މީހެއްކަމަށާއި އޭނާ އާއި އެކީ ފެނުމަކީ ވަރަށް އުފާވާ ކަމެއް ކަމަށެވެ.

ޝާހުރުކް ޚާނާއި ކާޖޮލް އެކީގައި ޚާއްސަ ފެނިލުމަކުން ފެނިގެންދާއިރު ޒީރޯގައި ސަލްމާން ޚާން، ދީޕިކާ ޕަދުކޯން، ރާނީ މުކްރަޖީ، ކާޖޮލް، އާލިއާ ބަޓް، ސްރިދޭވީ، ކަރިޝްމާ ކަޕޫރު އަދި ޖޫހީ ޗަވްލާވެސް ޚާއްސަ ފެނިލުމަކުން ފިލްމުން ފެނިގެން ދާނެއެވެ.

މިއަހަރުގެ ޑިސެމްބަރު މަހުގެ 21 ގައި ނެރުމަށް ހަމަޖެހިފައިވާ ޒީރޯއިން ޝާހުރުކް ޚާން ފެންނާނީ ކުރުމީހެއްގެ ގޮތަށެވެ.