ދިރާސީ އާއަހަރަށް ސްކޫލްތައް ތައްޔާރު؟

ދިރާސީ އާ އަހަރުގެ ކިޔެވުން މާދަމާ ފެށޭނެއެވެ.

މާލެ އާއި ރާއްޖޭގެ ހުރިހާ ސްކޫލެއްގެ ކިޔެވުން މާދަމާ ފަށާއިރު ފުރަތަމަ ޓާމް ޓެސްޓް ބޭއްވުމަށް ހަމަޖެހިފައި ވަނީ މެއި 14 އިން 31 ގެ ނިޔަލަށެވެ. މީގެ އިތުރަށް ދެވަނަ ޓަމުގެ ޓެސްޓްތައް ފެށުމަށް ހަމަޖެހިފައި ވަނީ އޮކްޓޫބަރު 25 އިން ފެށިގެންނެވެ.

އެޑިއުކޭޝަން މިނިސްޓްރީން ދިރާސީ އާ އަހަރުގައި ކުރަން ނިންމާފައިވާ ކަންކަމުގެ ތެރޭގައި ސްކޫލްތައް ޑިޖިޓަލައިޒްކުރުން ހިމެނެއެވެ. އެގޮތުން މިއަހަރުގެ މެއި މަހުގެ ތެރޭގައި "ޓެބްލެޓް" ބޭނުންކޮށްގެން ކިޔަވައި ދޭން ފެށޭނެ ކަމަށް އެޑިއުކޭޝަން މިނިސްޓަރު ޑރ. އާއިޝަތު ޝިހާމް ވަނީ މިދިޔަ ހަފްތާގައި ވިދާޅުވެފައެވެ.

ދިރާސީ އާ އަހަރު ފެށޭއިރު މަރާމާތާއި އިމާރާތް ކުރުމުގެ މަސައްކަތް ބައެއް ސްކޫލްތަކުގައި އަދިވެސް ކުރިއަށް ދާއިރު އަމީނިއްޔާ ސްކޫލުގެ ދަރިވަރުން މިއަހަރުގެ ކިޔެވުން ފަށާނީ އަލަށް ހެދި އަށް ބުރީގެ އާ އިމާރާތާ އެކުގައެވެ. މިއީ ޒަމާނީ ވަސީލަތްތަކާ އެކު ހަދާފައިވާ ރީތި އިމާރާތެކެވެ.

މިއަހަރުގެ ދިރާސީ އާ އަހަރު ފެށޭއިރު ރާއްޖޭގެ ހުރިހާ ސުކޫލަކަށް ބޭނުންވާ ޓީޗަރުން ހަމައަށް ތިބޭނެ ކަމަށް ވެސް އެޑިއުކޭޝަން މިނިސްޓްރީން މީގެ ކުރިން ވަނީ ބުނެފައެވެ. ދަރިވަރުންނަށް ބޭނުންވާ ޓެކްސް ފޮތްތަކާއި ބޭނުންވާ ޝްޓޭޝަނަރީސްތައް ހަމައަށް ފޯރުކޮށްދެވިފައިވާނެ ކަމަށް ވެސް އެޑިއުކޭޝަން މިނިސްޓްރީން ބުނެއެވެ.

އެޑިއުކޭޝަން މިނިސްޓަރު އާއިޝަތު ޝިހާމް ވިދާޅުވެފައި ވަނީ ދިރާސީ އާ އަހަރު ފެށިގެންދާއިރު ރާއްޖޭގެ ހުރިހާ ސްކޫލެއްގައި ހާއްސަ އެހީއަށް ބޭނުންވާ ކުދިންނަށް ކިޔަވައިދޭނެ ޓީޗަރުން ތަމްރީން ކުރުމާއި ހާއްސަ އެހީއަށް ބޭނުންވާ ކުދިންނަށް އިތުރު ފުރުސަތުތައް ތަނަވަސް ކޮށްދިނުމަށް މިއަހަރު ވަރަށް ބޮޑަށް މަސައްކަތް ކުރައްވަމުން ގެންދަވާނެ ކަމަށް ވެސް މިނިސްޓަރު ވަނީ ވިދާޅުވެފައެވެ.

ދިރާސީ އާ އަހަރުގެ ކިޔެވުން މާދަމާ ފެށިގެންދާއިރު ބައެއް ސްކޫލްތައް ވަނީ ދަރިންވަރުންނަށް މަރުހަބާ ކިއުމަށްޓަކައި ތައްޔާރުވެފައެވެ. އަދި މިއަދުގެ އިރުއޮއްސުނު އިރު ވެސް ބައެއް ސްކޫލްތައް މާދަމާ އަށް ތައްޔާރުކުރުމުގެ މަސައްކަތް ކުރިއަށް ދިޔައެވެ.