މިނިސްޓަރު ސައީދަށް ފާޑުކިޔުން އިތުރުވެފައި، އެއްފުޅަން މަތިން ފުންމާލި ބަކަރި އަނެއް ފުޅަންމަތިން ފުންމާލާނެ!
13 ޖެނުއަރީ 2018 | ހޮނިހިރު 03:54ސަޢީދު އާއިއެކު ކުރިން މަސައްކަތްކުރެއްވި ޖޭޕީގެ އިސް ބޭފުޅުން ގެންދަވަނީ ފާޑުވިދާޅުވަމުން
މިނިސްޓަރ ސަޢީދު ޕީޕީއެމްގެ ޖަލްސާއެއްގައި ވާހަކަ ދައްކަވަނީ
ޤާސިމް އިބްރާހީމަށް ނިސްބަތްކުރައްވާ އިކޮނޮމިކް މިނިސްޓަރ މުޙައްމަދު ސަޢީދު ދެއްކެވި ވާހަކަފުޅާ ގުޅިގެން އެމަނިކުފާނާއެކު މަސައްކަތްކުރެއްވި ގިނަ ބޭފުޅުންތަކެއް ސަޢީދަށް ފާޑުވިދާޅުވަމުން އެބަގެންދަވައެވެ.
ޤާސިމް އިބްރާހިމް އަރި އަތޮޅު ތަރައްގީ ވިޔަނުދެއްވީ އަމިއްލަ ވިޔަފާރީގެ ހިމާޔަތުގައި ކަމަށް ވިދާޅުވެ ސަޢީދު ދެއްކެވި ވާހަކަފުޅަށް ޤާސިމް ވެސް ވަނީ ނުސީދާކޮށް ރައްދު ދެއްވާފައެވެ. އެގޮތުން ޖަނަވާރުންވެސް އެތަކެއްޗަށް ކާންދޭ މީހާ ދަންނަ ކަމަށް ވިދާޅުވެ، ކުއްތާ އާއި ރާމާމަކުނުން މިސާލު ނެންގެވިއެވެ.
ސަޢީދު ދެއްކެވި ވާހަކަފުޅާއި ގުޅިގެން އެމަނިކުފާނާއެކު ކުރިން މަސައްކަތްކުރި ޖުމްހޫރީ ޕާޓީގެ ޑެޕިއުޓީ ލީޑަރު އަދި ކިނބިދޫ ދާއިރާގެ މެމްބަރު އަބްދުﷲ ރިޔާޒު ވަނީ ކުރީގެ ބޮސް އަށް ފާޑުކިޔައިގެން ރައީސް ޔާމީންގެ އިތުބާރު މިނިސްޓަރ ސަޢީދަށް ހޯދިދާނެތޯ ސުވާލު ކުރައްވާފައެވެ. އަދި އެއް ފުޅަށް މަތިން ފުންމާލި ބަކަރި އަނެއް ފުޅަށް މަތިން ފުންމާލާނެ ނޫންތޯ ރިޔާޒް ސުވާލުކުރެއްވިއެވެ.
ޖޭޕީގެ ޑެޕިއުޓީ ލީޑަރު އަމީން އިބްރާހިމަށް މިނިސްޓަރ ސަޢީދުގެ ބަސްފުޅުން ހަނދާންވީ ކުއްޅަވަށްފަލު ރަނިންގެ މިސާލު ބަހެވެ. އަމީން ވިދާޅުވީ "2013ގެ ކެމްޕޭންގައި ވިޔަފާރީއާއި ތަރައްޤީގައި ޤާސިމް އިބްރާހިމް ވަރުގެ ބިޔަ ސިކުނޑިއެއް ނުއުފެދޭ، އަރި އަތޮޅު ތަރައްޤީގެ ބާނީއަކީ ޤާސިމޭ ކިޔައިގެން ރަށްރަށުގައި ސަޢީދު ކުރެއްވި ތަޢުރީފު ވީޓީވީގައި ހުންނާނެ،" ކަމަށެވެ.
އަރި އަތޮޅުގެ ތަރައްޤީއަށް ޤާސިމް ހުރަސް އެޅުއްވިކަމަށް ދޭހަވާ ގޮތަށް މިނިސްޓަރ ސަޢީދު ވާހަކަ ދެއްކެވުމުން، އެމަނިކުފާނާއިއެކު ކެބިނެޓްގައި ކުރިން މަސައްކަތްކުރެއްވި ޔޫތު މިނިސްޓަރ މަލީހު ޖަމާލު ވަނީ ގިނަ ސުވާލުތަކެއް ކުރިމަތިކުރައްވާފައެވެ. މަލީހު ކުރެއްވި ސުވާލުތަކަކީ:
އަރި އަތޮޅުގައި އެއަރޕޯޓެއް ތަރައްޤީކުރެއްވީ؟ އަރި އަތޮޅުގައި އެންމެ ބޮޑު ބަނދަރު ހެދީ؟ އަރި އަތޮޅު އެންމެ ބޮޑު ބިން ހިއްކީ؟ އަރި އަތޮޅުގެ އެންމެ ބޮޑު ރިސޯޓް ތަރައްޤީކުރީ؟ އަރި އަތޮޅު އެންމެ ގިނަ ޓޫރިސްޓް ބެޑް ތަރައްޤީކުރީ ކާކު؟ ޤާސިމް އިބްރާހިމް. އަހަންނަކީ ޖީއެމް. އަހަންނަަށް ނޭނގޭ.
ޤާސިމް އިބްރާހިމްގެ އަރިހުގައި ފަތުރުވެރިކަމުގެ ދާއިރާގައި މިނިސްޓަރ ސަޢީދު މަސައްކަތްކުރެއްވި އިރު އެދާއިރާގައި ވަރަށް ކައިރިން މަސައްކަތްކުރެއްވި ކާށިދޫ ދާއިރާގެ މެމްބަރު ފައިސަލް ނަސީމް ވިދާޅުވީ "މުޅި އަރި އަތޮޅުގެ ތަރައްޤީގެ އެންމެ ބޮޑު ހިއްސާއެއް އޮތީ ޤާސިމް އިބްރާހިމްގެ ފަރާތުންކަން އެންމެ ރަނގަޅަށް އެނގޭނީ ސަން އައިލެންޑް ރިސޯޓްގެ ކުރީގެ ޖީއެމްއަށް" ކަމަށެވެ.
2013ގެ ރިޔާސީ އިންތިޚާބުގެ ކެމްޕޭންގެ ކުރިން މިނިސްޓަރ ސަޢީދު ހުންނެވީ ޤާސިމް އިބްރާހިމްގެ ވިލާ ކުންފުނީގެ އެންމެ ބޮޑު ރިސޯޓްކަމަށްވާ ސަން އައިލެންޑް ރިސޯޓްގެ ޖެނެރަލް މެނޭޖަރަކަށެވެ. މަތީ ތައުލީމް ޙާސިލްކުރެއްވީވެސް ޤާސިމް އިބްރާހިމްގެ ޚަރަދުގައެވެ. 2013ގެ ކެމްޕޭންގައި ސަޢީދު ހުންނެވީ ޤާސިމްގެ ކެމްޕޭންގެ އެންމެ އިސް އެއް ބޭފުޅެއްގެ ގޮތުގައެވެ. އަދި އިންތިޚާބަށްފަހު ޖޭޕީގެ ސްލޮޓެއްގައި ކެބިނެޓަށް ވަޑައިގަތެވެ. އެހެން ނަމަވެސް ސަރުކާރުގެ ކޯލިޝަނުން ޖޭޕީ ވަކިވުމުން، ސަޢީދު ޕީޕީއެމްއާ ގުޅިވަޑައިގެން، ޤާސިމް އިބްރާހިމްއަށާއި ޖޭޕީއަށް އަދި އިދިކޮޅު ފަރާތްތަތަކަށް ވަރަށް ބޮޑަށް ފާޑުވިދާޅުވާން ފެއްޓެވިއެވެ. އަދި މިހާރު ސަރުކާރުގެ ކެމްޕޭންގައި ގެންދަވަނީ މަސައްކަތްކުރައްވަމުންނެވެ.
ޤާސިމްއަށް ފާޑުވިދާޅުވުމާއި ގުޅިގެން އާއްމުންގެ ގިނަ ބައެއްގެ ފާޑުކިޔުންތައްވެސް މިނިސްޓަރ ސަޢީދަށް ވަނީ އަމާޒުވެފައެވެ.
