އެއްބައިވަންތަކަމުގެ ސަރުކާރެއް ޤާއިމްކުރެވޭނެ، ގުޅުމަށް ބުރުލެއް ނޭރުވޭނެ: ރައީސް މައުމޫން

އެއްބައިވަންތަކަމުގެ ސަރުކާރެއް ޤާއިމްކުރެވޭނެކަމުގެ ވަރަށް ބޮޑު އުއްމީދެއް އެބަ އޮތް ކަމަށާއި، ގުޅިފައިވާ ސިޔާސީ ޕާޓީތަކުގެ ގުޅުމަށް ބުރުލެއް ނޭރުވޭނެ ކަމަށް ކުރީގެ ރައީސް މައުމޫން އަބްދުލް ޤައްޔޫމް ވިދާޅުވެއްޖެ އެވެ.

އެމަނިކުފާނު މިފަދައިން ވިދާޅުވީ އދ. މާމިގިލީގައި ގުޅިފައިވާ ސިޔާސީ ޕާޓީތަކުން ބޭއްވި ޖަލްސާގައި އިއްވެވި ބަޔާނުގައެވެ. އެ ބަޔާން އިއްވައިދެއްވީ، ރައީސް މައުމޫންގެ ދަރިކަނބަލުން އަދި ޕީޕީއެމްގެ ކައުންސިލްގެ މެމްބަރު ޔުމްނާ މައުމޫނެވެ.

ރައީސް މައުމޫން ވިދާޅުވީ ގުޅިފައިވާ ސިޔާސީ ޕާޓީތައް ކުރަމުންދާ މަސައްކަތުގައި ތިބީ ވަރަށް ބަދަހި ގުޅުމެއްގައި ސާބިތުވެގެން ކަމަށެވެ. ގުޅުމަކަށް އެއްވެސް ކަހަލަ ބުރުލެއް އެއްވެސް ފަރާތަކުން ނޭރުވޭނެ ކަމަށާއި، ޢަޒުމަކަށް އެއްވެސް ފަރާތަކުން ގުޑުމެއް ނޭރުވޭނެ ކަމަށް ރައީސް މައުމޫން ވިދާޅުވިއެވެ.

ރައީސް މައުމޫން ވަނީ ރައީސް މުހައްމަދު ނަޝީދާއި، އިމްރާން އަބްދުﷲ އަދި ޤާސިމް އިބްރާހިމްގެ މައްޗަށް އިއްވާފައިވާ ހުކުމް ވަގުތުން ބާތިލްކޮށް، އެ ބޭފުޅުން މިނިވަން ކުރުމަށް ގޮވާލައްވާފައެވެ. އެމަނިކުފާނު ސިފަކުރެއްވި ގޮތުގައި އެ ބެފުޅުންގެ މައްޗަށް ހުކުމްތައް އިއްވާފައި ވަނީ ނުހައްޤުންނެވެ. އޭގެ އިތުރުން ރައީސް މައުމޫން ވިދާޅުވީ ކުރީގެ ޑިފެންސް މިނިސްޓަރު މުހައްމަދު ނާޒިމް ޖަލަށްލާފައި ވަނީ އެއްވެސް ކުށެއް ނެތި ކަމަށާއި، އަދި ދަރިކަލުން އަހްމަދު ފާރިސް މައުމޫން ވެސް ބަންދުގައި ބަހައްޓާފައި ވަނީ އެއްވެސް ކުށެއް ނެތި ކަމަށެވެ. އެހެންކަމުން އެ ދެ ބެފުޅުން ވެސް މިހާރުން މިހާރަށް މިނިވަންކުރުމަށް ރައީސް މައުމުން ވަނީ ގޮވާލައްވާފައެވެ.

"ﷲ ގެ ވާގިފުޅާ އެކު އަޅުގަނޑުމެންގެ މިގުޅުން، އަޅުގަނޑުމެންގެ އުންމީދުތަކާ ހަމައަށް އަޅުގަނޑުމެން ގެންގޮސްދޭނެއެވެ. އެއްބައިވަންތަ ކަމުގެ ސަރުކާރެއް، އާދެ! "ޔުނިޓީ ގަވަރމެންޓެއް" ޤާއިމު ކުރުމުގެ މަޝްވަރާތައް އަޅުގަނޑުމެން ހަތަރު ޕާޓީއިން މިހާރު ވަނީ ފަށާފައެވެ. އިރާދަކުރެއްވިއްޔާ މާލަސްތަކެއް ނުވެ އަޅުގަނޑުމެންގެ މި މަސައްކަތް ކާމިޔާބުވާނެ" ރައީސް މައުމޫން ވިދާޅުވިއެވެ.

ރައީސް މައުމޫން ވިދާޅުވީ ގުޅިފައިވާ ސިޔާސީ ޕާޓީތަކުން ކުރަމުންގެންދާ މަސައްކަތްތަކީ ދިވެހި ޤައުމަށް ދިމާވެފައިވާ ނުރައްކާތެރި ނާމާން ކަންތައްތަކުން ޤައުމު ސަލާމަތްކުރުމަށްޓަކައި ކުރަންޖެހޭ މަސައްކަތްތައް ކަމަށެވެ. އަދި ސިޔާސީ ގޮތުންނާއި އިޤްތިޞާދީ ގޮތުން، އަދި އިޖްތިމާޢީގޮތުން އައިސްފައިވާ ނުރަނގަޅު ކަންތައްތަކުން ޤައުމު މިންޖު ކުރުމަށްޓަކައި ކުރަންޖެހޭ މަސައްކަތްކަމަށް ރައީސް މައުމޫން ވިދާޅުވިއެވެ.

"މިއަށް ވުރެ ތަފްޞީލުކޮށް ދަންނަވާ ނަމަ ގުޅިފައިވާ ޕާޓީތަކުން ކުރަމުންދާ މަސައްކަތަކީ، ރާއްޖޭގެ ވެރިކަމުގެ ނިޒާމުން ގެއްލިގެންދާ ޑިމޮކްރަސީގެ ރީތި އުޞޫލުތައް އަނބުރާގެނެސްދެވޭތޯ ކުރާ މަސައްކަތެވެ. ރައްޔިތުންގެ މަޖިލީހުގެ ބާރުކެނޑި، ރައްޔިތުން ހޮވާފައިވާ ރައްޔިތުންގެ ބައެއް މަންދޫބުން އެއްވެސް ހަމައެއް ނެތި އެމީހުންގެ މަޤާމުން ވަކިވެއްޖެކަމަށް ބުނެ، އެ މަންދޫބުންގެ އަޑުތައް އިވުނަ ނުދޭން ކުރާ މަސައްކަތް ހުއްޓުމަށް ކުރާ މަސައްކަތެވެ.ސަރުކާރުގެ އޮފީސްތަކާއި އިދާރާތަކުގައި ޢާންމުވަމުންދާ ޚިޔާނާތާއި، ވައްކަމާއި، ކޮރަޕްޝަން ނައްތާލުމަށް ކުރާ މަސައްކަތެވެ. ޢަދުލު އިންޞާފު ނުލިބިގެން ރައްޔިތުންގެ އެތައް ބަޔެއްގެ ޙައްޤުތައް ގެއްލިގެންދާތީ، އެކަންތައްތައް އިޞްލާޙުކުރެވޭތޯ ކުރާ މަސައްކަތެވެ." ރައީސް މައުމޫން ވިދާޅުވި އެވެ.