ވިލިނގިލީ ކައުންސިލްގެ ރައީސްގެ އަނބިކަނބަލުންނާ އެކު އިތުރު މުވައްޒަފުންތަކެއް ސަސްޕެންޑްކޮށްފި
ސަސްޕެންޑް ކުރަން ނިންމީ ސިޔާސީ ކަންކަމާ ގުޅުވައިގެން
ގއ. ވިލިނގިލި: ޓީޗަރުން ސިޔާސީ ވާހަކަ ދެއްކުމަކީ މައްސަލައެއް ކަމަށް ބުނެފައިވޭ. -- ފޮޓޯ/ ސޯޝަލް މީޑިއާ
ގއ. އަތޮޅު ތައުލީމީ މަރުކަޒުގައި ޓީޗަރެއްގެ ވަޒީފާ އަދާކުރަމުންދާ ގއ. ވިލިނގިލީ ކައުންސިލްގެ ރައީސްގެ އަނބިކަނބަލުންގެ އިތުރުން، އެހެން މުވައްޒަފުންތަކެއް ވަޒީފާއިން ސަސްޕެންޑްކޮށްފިއެވެ.
އެ މުވައްޒަފުން ސަސްޕެންޑްކޮށްފައި ވަނީ 30 ދުވަހުގެ މުއްދަތަށެވެ. ސަސްޕެންޑް ކުރި މުވައްޒަފުންނަކީ ގއ. އަތޮޅު ތައުލީމީ މަރުކަޒުގައި 18 އަހަރާއި 15 އަހަރުގެ މުއްދަތަކަށް މަަސައްކަތް ކުރި މުވައްޒަފުންނެވެ.
އެ މުވައްޒަފުން ސަސްޕެންޑް ކުރުމަށް ސިވިލް ސާވިސް ކޮމިޝަން (ސީއެސްސީ)ގެ ޕާމަނަންޓް ސެކަރެޓަރީ (ޕީއެސް) މުހައްމަދު ސައީދު އިއްޔެ ފޮނުއްވެވި ލިޔުމުގެ ކޮޕީ "ރާއްޖެއެމްވީ" އަށް ވަނީ ލިބިފައެވެ. އެ ލިޔުމުގައި ބުނެފައި އެ މުވައްޒަފުން ސަސްޕެންޑް ކުރުމަށް ނިންމީ ސީއެސްސީގެ ގާނޫނާއި އެ ކޮމިޝަންގެ ސާކިއުލާއެއްގެ ދަށުން ޕީއެސްއަށް ލިބިގެންވާ ބާރުގެ ދަށުން ކަމަށެވެ.
އެ މުވައްޒަފުން ސަސްޕެންޑް ކުރި ސަބަބެއް އެ ލިޔުމުގައި ބުނެފައެއް ނުވެއެވެ.
ރާއްޖެއެމްވީއަށް އެނގިފައިވާ ގޮތުގައި އެ މުވައްޒަފުން ސަސްޕެންޑްކޮށްފައި ވަނީ ސްކޫލުން ކުރާ މަސައްކަތަކަށް އެއްބާރުލުން ނުދޭ ކަމަށް ބުނެއެވެ. އަދި ސިޔާސީ ވާހަކަ ސްކޫލު ތެރޭގައި ދައްކާ ކަަމަށް ބުނެ އެ މީހުންގެ މައްޗަށް އެޑިއުކޭޝަން މިނިސްޓްރީން ތުހުމަތުތަކެއް ކޮށްފައިވެއެވެ.
ސަސްޕެންޑް ކުރި މުވައްޒަފުންނަކީ ވިލިނގިލީ ރަށު ކައުންސިލްގެ ރައީސްގެ އަނބިކަނބަލުން، ޒުލްފީނާ އަހުމަދާއި ވިލިނގިލީ ކައުންސިލްގެ ކުރީގެ ކައުންސިލަރު ފަތުހީ މޫސާގެ އަނބިކަނބަލުން ކަމަށްވާ ހިދާޔަތު އަހުމަދެވެ.
ޒުލްފީނާގެ ފަރާތުން "ރާއްޖެއެމްވީ"އާ ވާހަކަ ދައްކަމުން އޭނާގެ ފިރިކަލުން އަދި ވިލިނގިލީ ކައުންސިލްގެ ރައީސް މުސްތަފާ މުހައްމަދު ވިދާޅުވީ އަނބިކަނބަލުންނަކީ ގއ. އަތޮޅު ތައުލީމީ މަރުކަޒުގައި 18 އަހަރު ވަންދެން މަސައްކަތް ކުރަައްވަމުން އަންނަ މުވައްޒަފެއް ކަމަށާއި އަނބިކަނބަލުން ސަސްޕެންޑް ކުރީ ސިޔާސީ ގޮތުން އޭނާ ބަލިކޮށްލުމަށް ކަމަށެވެ.
އޭނާ ވިދާޅުވީ ގއ. އަތޮޅު ތައުލީމީ މަރުކަޒުގައި އަނބިކަނބަލުން ހޭދަކުރެއްވި 18 އަހަރު ދުވަހުގެ ތެރޭގައި ވަޒީފާއާ ގުޅިގެއް އެއްވެސް އިންޒާރެއް އަދި ނަސޭހަތެއް ދީފައިނުވާ ކަމަށާއި ނަމަވެސް އިއްޔެ އަނބިކަނބަލުންނަށް ފޮނުވި ސިޓީއަކީ ސިޔާސީ ގޮތުން ކުރި ކަމެއް ކަމަށެވެ.
"ސިޔާސީ ގޮތުން އަޅުގަނޑު [ކައުންސިލްގެ ރައީސް] ބަލިކޮށްލުމަށް، އަޅުގަނޑުގެ އަންހެނުންނާ ކުޅެން ފެށީ. އަޅުގަނޑުގެ އަންހެނުންނަކީ ދުވަހަކު ވެސް މަގުމައްޗަށް [މުޒާހަރާތަކަށް] ނުކުތް މީހެއް ނޫން. އަދި ހަރުގެއަކަށް ވެސް ގޮފައި ނުވާނެ،" މުސްތަފާ ވިދާޅުވިއެވެ.
ސަސްޕެންޑްކުރި މުވައްޒަފުންގެ ތެރޭގައި ހިމެނޭ ހިދާޔަތު "ރާއްޖެއެމްވީ"އަށް މިއަދު ބުނީ އޭނާއަކީ 15 އަހަރު ވަންދެން، ސްކޫލުގައި މަސައްކަތްކުރި މުވައްޒަފެއް ކަމަށާއި ވޭތުވެދިޔަ މުއްދަތުގައި އޭނާއާ އިންޒާރެއް އަދި ނަސޭހަތެއް ވެސް ދީފައި ނުވާ ކަމަށެވެ. އޭނާ ބުނީ ސިޔާސީ ކަންކަމާ ގުޅުވައިގެން އެ ސްކޫލުގެ ދެ ޓީޗަރަކަށް ނޯޓިސް ދިނުމަށް ފަހު، އެކަކު ވަޒީފާ އިން ވަކިކޮށްފައިވާ ކަމަށެވެ.
ގއ. އަތޮޅު ތައުލީމީ މަރުކަޒުގައި ގިނަ ދުވަސްތަކެއް ވަންދެން މަސައްކަތް ކުރި އަދި ތަޖުރިބާ ލިބިފައިވާ ޓީޗަރުން ވަކިކޮށް، އިންޒާރުގެ ނޯޓިސް ފޮނުވަމުންދާތީ ވިލިނގިލީ ބައެއް ރައްޔިތުން ދަނީ ކަންބޮޑުވުން ފާޅުކުރަމުންނެވެ. އަދި ސިޔާސީ ވަކި ފިކުރަކަށް ތާއިދު ކުރުމަށް ވަޒީފާގެ ބިރު ދެއްކުމަކީ ކޮށްގެންވާނެ ކަމެއް ނޫން ކަމަށް ވެސް ބެލެނެވެރިން ދަނީ ބުނަމުންނެވެ.
