އެންމެ ކުޑައިރުއްސުރެ ވެސް ދެކެމުން އައި ހުވަފެން ހަގީގަތަކަށް ހަދައި ލިވަޕޫލްއަށް ކުޅުނު ބްރެޒިލްގެ ހުނަރުވެރި މިޑްފީލްޑަރު ފިލީޕޭ ކުޓީނިއޯ ބާސެލޯނާއަށް ބަދަލުވާން އެއްބަސްވެއްޖެއެވެ.

ބާސާ އަދި ލިވަޕޫލްއިން ވެސް ވަނީ މިކަން ކަށަވަރު ކޮށްދީފައެވެ. އޭނާ ލިވަޕޫލް ދޫކޮށް ބާސާއަށް ބަދަލުވީ 142 މިލިއަން ޕައުންޑްގެ އެއްބަސްވުމެއްގެ ދަށުންނެވެ. މި އެއްބަސްވުމާއެކު އޭނާ ވެގެން ގޮސްފައިވަނީ ޕީއެސްޖީއަށް ކުޅެމުން އަންނަ ބްރެޒިލްގެ ތަރި ނޭމާ އަދި ހަމަ އެ ޓީމަށް ކުޅެމުން އަންނަ ފްރާންސްގެ ޒުވާން ފޯވާޑް ކިލިއަން އެމްބާޕޭގެ ފަހަތުން ދުނިޔޭގެ ތިން ވަނައަށް އެންމެ އަގުބޮޑު ކުޅުންތެރިޔާއަށެވެ. އަދި ކުޓީނިއޯ ވެގެން ގޮސްފައިވަނީ އިނގިރޭސި ޓީމަކަށް ކުޅުނު އެންމެ އަގުބޮޑު ކުޅުންތެރިޔާއަށެވެ. ހަމައެހެންމެ ބާސާއިން ގަތް އެންމެ އަގުބޮޑު ކުޅުންތެރިޔާއަކީ ވެސް ކުޓީނިއޯއެވެ.

ބާސާގެ ރަސްމީ ވެބްސައިޓުގައިވާ ގޮތުން އޭނާ އެ ޓީމާއެކު ސޮއިކޮށްފައިވަނީ ފަސް އަހަރާއި ބައިގެ އެއްބަސްވުމެއްގައެވެ. އަދި އޭނާގެ ރިލީޒް ފީއެއްގެ ގޮތުގައި ބާސާއިން ކަނޑައަޅާފައިވަނީ 400 މިލިއަން ޔޫރޯއެވެ. ބާސާގައި އޭނާ ބޭނުންކުރާނެ ޖާޒީ ނަމްބަރެއް އަދި ސާފުވެފައެއް ނުވެއެވެ.

ބާސާއާއި ލިވަޕޫލްއާ ދެމެދު އެއްބަސްވުމަކަށް އައިސްފައި މިވަނީ އެތައް ދުވަހެއްގެ މަޝްވަރާތަކަށް ފަހުއެވެ. މީގެކުރިން ވެސް ބާސާއިން އޭނާ ހޯދުމަށް ތިން ފަހަރެއްގެ މަތިން ބިޑުކޮށްފައިވެއެވެ. އޭގެތެރޭގައި 130 މިލިއަން ޕައުންޑްގެ ބިޑެއް ވެސް ހިމެނުނެވެ. ހަމައެހެންމެ ކުޓީނިއޯ ވެސް ވަނީ ދެފަހަރެއްގެ މަތިން އޭނާ ވިއްކާލަދިނުމަށް ލިވަޕޫލްގެ މެނޭޖްމަންޓުގައި އެދިފައެވެ. ލިވަޕޫލްގައި ކުޓީނިއޯ މަޑުކުރުވުމުގެ ގޮތުން އެ ޓީމުން އޭނާގެ މުސާރަ ބޮޑު ކުރުމުގެ އިތުރުން އެ ޓީމުގެ ކެޕްޓަން ބޭންޑު ވެސް ހުށަހެޅިއެވެ.

މި ޓްރާންސްފާއާ ގުޅިގެން ލިވަޕޫލްގެ ކޯޗު ޔާގެން ކްލޮޕް އެ ޓީމުގެ ރަސްމީ ވެބްސައިޓަށް ދިން އިންޓަވިއުއެއްގައި ބުނެފައިވަނީ އޭނާ އެ ކްލަބުގައި މަޑުކުރުވުމަށް ކުރެވެންހުރި ހުރިހާ މަސައްކަތެއްކުރި ކަމަށާއި އެހެން ނަމަވެސް ކުޓީނިއޯގެ އެދުމަށް އިޖާބަދޭން ނިންމީ ކަމަށެވެ. ކްލޮޕް ވަނީ ލިވަޕޫލްގައި ކުޓީނިއޯ ހޭދަކުރި ފަސް އަހަރުގެ ތެރޭގައި އޭނާ އެ ޓީމަށް ކޮށްދިން ހިދުމަތްތަކަށް ޝުކުރު އަދާކޮށްފައެވެ. އޭނާއަކީ ޕްރޮފެޝަނަލް ކުޅުންތެރިޔެއް ކަމަށާއި އޭނާގެ ސަބަބުން އެ ޓީމު އެތަކެއް މެޗަކުން މޮޅުވެފައިވާކަން ކްލޮޕް ފާހަގަކުރިއެވެ.

ބާސާގެ ކުޅުންތެރިޔެއްގެ ގޮތުގައި ފެނިގެންދިޔުމަކީ އެންމެ ކުޑައިރުއްސުރެ ވެސް ކުޓީނިއޯ ދެކެމުން އައި ހުވަފެނެކެވެ. ބާސާއަށް ބަދަލުވުމުގެ ކަންކަން ނިންމުމުގެ ގޮތުން ޑުބާއީގައި ލިވަޕޫލްއިން ކުރިޔަށް ގެންދިޔަ ޓްރެއިނިން ކޭމްޕްގައި ވެސް އޭނާ ބައިވެރިވެފައެއް ނުވެއެވެ. ހަމައެހެންމެ މީގެކުރިން ދީފައިވާ އިންޓަވިއުތަކުގައި އޭނާވަނީ ބާސާއަށް ބަދަލުވުމުގެ ޝައުގުވެރިކަން ފާޅުކޮށްފައެވެ.

ބެލެވޭ ގޮތުގައި އާދިއްތަ ދުވަހުގެ ރޭ ސްޕެނިޝް ލަލީގާގައި ލެވަންޓޭއާ ދެކޮޅަށް އަމިއްލަ ދަނޑުގައި ބާސާ ކުޅޭ މެޗުގައި ކުޓީނިއޯގެ ހާއްސަ ފެނިލުމެއް އޮންނާނެއެވެ. އަދި އޭގެ އަނެއް ދުވަހު ބާސާގެ ސްކޮޑާއެކު އޭނާ ފަރިތަކުރުންތައް ފަށާނެއެވެ. ކުޓީނިއޯ ވަނީ އޭނާގެ މެޑިކަލް ފުރިހަމަކޮށް ޓްރާންސްފާގެ ކަންކަން ނިންމާލުމަށް ހޮނިހިރު ދުވަހުގެ ވަގުތެއްގައި ބާސެލޯނާއަށް ދަތުރުކޮށްފައެވެ.

ކުޓީނިއޯ ނެތްތަން ފޫބެއްދުމުގެ ގޮތުން ލިވަޕޫލްއިން އަންނަނީ މޮނާކޯގެ މިޑްފީލްޑަރު ތޮމަސް ލެމާރ އަދި ލެސްޓާ ސިޓީގެ މިޑްފީލްޑަރު ރިޔާދް މަހަރޭޒް ގެނައުމުގެ މަސައްކަތްކުރަމުން ކަމަށް މީޑިއާ ރިޕޯޓުތައް ބުނެއެވެ.

މި ސީޒަނުގެ ޗެމްޕިއަންސް ލީގުގައި ކުޓީނިއޯ ލިވަޕޫލްގެ ޖާޒީގައި ކުޅެފައިވުމާއެކު ނޮކްއައުޓް ބުރުތަކުގައި އޭނާއަށް ބާސާގެ ޖާޒީގައި ނުކުޅެވޭނެއެވެ. އެހެން ނަމަވެސް ބާސާއިން ކުޅޭ އެހެން ހުރިހާ މުބާރާތެއްގައި އޭނާއަށް އެ ޓީމަށް ކުޅެވޭނެއެވެ.

ކުޓީނިއޯ ލިވަޕޫލް ދޫކޮށްލިއިރު އޭނާ އެ ޓީމާއެކު ހަދާފައި އޮތް ކޮންޓްރެކްޓްގެ މުއްދަތު ހަމަވާން އޮތީ 2022 ވަނަ އަހަރުއެވެ. އުމުރުން 25 އަހަރުގެ މިޑްފީލްޑަރު ލިވަޕޫލްއާ ގުޅުނީ 2013 ވަނަ އަހަރު އިންޓަ މިލާން ދޫކޮށް 8.5 މިލިއަން ޕައުންޑްއަށެވެ. ލިވަޕޫލްއަށް ކުޅުނު 201 މެޗުގައި އޭނާ ވަނީ އެ ޓީމަށް 54 ލަނޑު ޖަހައިދީފައެވެ.