ބްރިސްބޭން އިންޓަނޭޝަންލްގެ ޗެމްޕިއަންކަން ސްވިޓޮލީނާ ހޯދައިފި
6 ޖެނުއަރީ 2018 | ހޮނިހިރު 12:52އޭނާ ވަނީ ފައިނަލުގައި އެލެކްޒެންޑާ ސަސްނޮވިޗް ސީދާ ދެ ސެޓުން ބަލިކޮށްފައި
މުބާރާތުގެ ޓްރޮފީއާއެކު ސްވިޓޮލީނާ
މިއަހަރުގެ ޓެނިސް ސީޒަން ހުޅުވުމުގެ ގޮތުން އޮސްޓްރޭލިއާގެ ބްރިސްބޭންގައި ކުރިޔަށް ދިޔަ ބްރިސްބޭން އިންޓަނޭޝަނަލްގެ ޗެމްޕިއަންކަން ޔޫކްރެއިންގެ އެލީނާ ސްވިޓޮލީނާ ހޯދައިފިއެވެ.
ދުނިޔޭގެ ރޭންކިންގެ ހަވަނައިގައި ރޭންކް ކުރެވިފައިވާ ސްވިޓޮލީނާ މި މުބާރާތުގެ ސީޑު ކުރެވުނީ ތިންވަނައަށެވެ. އޭނާ މުބާރާތުގެ ޗެމްޕިއަންކަން ހޯދީ ފައިނަލް މެޗުގައި ދުނިޔޭގެ ރޭންކިންގެ 88 ވަނައިގައި އޮތް އެލެކްޒެންޑްރާ ސަސްނޮވިޗް ސީދާ ދެ ސެޓުން ބަލިކޮށްގެންނެވެ. މި މެޗުގެ ފުރަތަމަ ސެޓު ސްވިޓޮލީނާ ގެންދިޔައީ 6-2 އިންނެވެ. އަދި ދެވަނަ ސެޓު އޭނާ ގެންދިޔައީ 6-1 އިންނެވެ.
މި މުބާރާތުގެ ފައިނަލުން ސްވިޓޮލީނާ ޖާގަ ހޯދީ ސެމީގައި މުބާރާތުގެ ދެވަނައަށް ސީޑު ކުރެވުނު ޗެކް ރިޕަބްލިކްގެ ކެރޮލައިނާ ޕްލިސްކޯވާ ބަލިކޮށްގެންނެވެ. ޕްލިސްކޯވާއަކީ މިދިޔަ އަހަރުގެ މުބާރާތުގެ ޗެމްޕިއަންއެވެ. މިއީ އުމުރުން 23 އަހަރުގެ ސްވިޓޮލީނާގެ ކެރިއަރުގައި އޭނާ ކާމިޔާބު ކުރި 10 ވަނަ ޑަބްލިއުޓީއޭ މުބާރާތެވެ.
މި މުބާރާތުގެ ފިރިހެން ސިންގަލްސް އިވެންޓުގެ ފައިނަލުގައި ވާދަކުރާނީ އެމެރިކާގެ ރަޔަން ހެރިސަންއާއި އޮސްޓްރޭލިއާގެ ނިކް ކިރްގިއޯސްއެވެ.
