މާޅޮހުގެ އާރީ ޓީސީއަށް ސޮއިކޮށްފި

މިދިޔަ އަހަރުގެ އުރީދޫ ދިވެހި ޕްރިމިއާ ލީގުގައި އއ. މާޅޮސް ޓީމަށް ކުޅުނު ފޯވާޑް އަހުމަދު އާރިފް (އާރީ) މި ފެށޭ ސީޒަނުގައި ޓީސީ ސްޕޯޓްސް ކްލަބަށް ކުޅެން ސޮއި ކޮށްފިއެވެ.

މިދިޔަ ސީޒަނުގައި އާރީ ވަނީ މާޅޮހަށް ޕްރިމިއާ ލީގުގައި މޮޅު ކުޅުމެއް ދައްކައި ހިތްގައިމު ލަނޑުތަކެއް ޖަހައިދީފައެވެ. މިކަމާއި ގުޅިގެން އޭނާ ގެންދިޔުމަށް ރާއްޖޭގެ އެންމެ ބޮޑެތި ޓީމުތަކުން ޝައުގުވެރިކަން ވެސް ފާޅުކުރިއެވެ. ހަމައެހެންމެ ދިވެހި ޕްރިމިއާ ލީގުގެ ދެވަނަ ބުރުގައި އޭނާ ނިއު ރޭޑިއަންޓް ސްޕޯޓްސް ކްލަބް ކޮޅަށް ޖެހި ލަނޑު ޑިސެމްބަރު މަހު ބޭއްވި މޯލްޑިވްސް ފުޓްބޯލް އެވޯޑްސްގެ އެންމެ މޮޅު ގޯލް ނުވަތަ 'ޖޫލޭ' އެވޯޑަށް ވެސް ނޮމިނޭޓްވިއެވެ.

މިއީ އަންނަ ސީޒަނަށް ތައްޔާރުވުމުގެ ގޮތުން ޓީސީއިން ގެނައި ދެވަނަ ކުޅުންތެރިޔާއެވެ. މީގެކުރިން އެ ޓީމުން ވަނީ ދިވެހި ޕްރިމިއާ ލީގުގައި މިލަންދޫ ޓީމުން ވިދާލި އޭދަފުށީގެ އިޝާން އިބްރާހިމް (ސައްޓު) ވެސް އެ ޓީމަށް ގެނެސްފައެވެ. މި ދެ ކުޅުންތެރިން ވެސް އެ ޓީމަށް ގެނެސްފައިވަނީ ފާއިތުވެދިޔަ ސީޒަންތަކުގައި އެ ޓީމުގެ ފޯވާޑް ލައިން ބެލެހެއްޓުމުގައި މުހިންމު ދައުރެއް އަދާކުރި ނާއިޒް ހަސަން (ދާދު) އެ ޓީމު ދޫކޮށްލުމާއި ވިދިގެންނެވެ. މި ފެށޭ ސީޒަނުގައި ނާޒު ފެނިގެންދާނީ މާޒިޔާގެ ފެހި ޖާޒީގައެވެ.

ހަމައެހެންމެ އެ ޓީމުގެ ފަސް ކުޅުންތެރިޔަކު ވަނީ އެ ޓީމުގެ ކޮންޓްރެކްޓް އައުކޮށްފައެވެ. އޭގެތެރޭގައި ހިމެނެނީ އަހުމަދު ފައްރާހު، އިބްރާހިމް ވަހީދް ހަސަން، އަހުމަދު ރިލްވާން އާއި މުހައްމަދު އައްޒާމްގެ އިތުރުން ނިމިގެން ދިޔަ ސީޒަނުގައި އެ ޓީމުގައި މޮޅު ކުޅުމެއް ދެއްކި ހުނަރުވެރި ފޯވާޑް އިބްރާހިމް މަހުދީ ހުސައިން (ފޭދޫ އިއްބެ) އެވެ.

ނިމިގެން ދިޔަ ސީޒަން ޓީސީއިން ނިންމާލީ ހުސްއަތާ ކަމުގައި ވިޔަސް އެ ޓީމުން ވަނީ މި ސީޒަނުގައި ރަނގަޅު ކުޅުމެއް ދައްކާފައެވެ. އެގޮތުން އެ ޓީމުން އުރީދޫ ދިވެހި ޕްރިމިއާ ލީގުގެ ދެވަނަ ހޯދިއިރު ޕްރެޒިޑެންޓްސް ކަޕްގެ ފައިނަލްއާއި އެފްއޭ ކަޕްގެ ފައިނަލުގައި ވެސް ވާދަކުރިއެވެ. މި ހުރިހާ ފައިނަލްއަކުން ވެސް އެ ޓީމު ބަލިވީ ނިއު ރޭޑިއަންޓް ސްޕޯޓްސް ކްލަބް އަތުންނެވެ. މިކަމާއި ގުޅިގެން އެ ޓީމުން އަންނަނީ ޓީމު ވަރުގަދަ ކުރުމަށް ގިނަ މަސައްކަތްތަކެއް ކުރަމުންނެވެ.