ފުރާނައަށް ނުރައްކާވާ ކަމަށް ބުނެ، ވަގުތު ނޫސް ގޮވައިގެން އިންތި ފުލުހަށް
އެމްއެމްސީއަށާއި އެޗްއާރްސީއެމަށް ވެސް މައްސަލަ ހުށަހަޅާފައިވޭ
އިންތި: އޭނާ ދެއްކި ވާހަކަ ވަގުތު ނޫހުން އޮޅުވާލައިގެން ފެތުރި ކަމަށް އިންތި ވަނީ ތުހުމަތު ކުރައްވާފައި
ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ (އިންތި)ގެ ހަށިފުރާނައަށް ނުރައްކާވާ ގޮތަށް އޮންލައިން ނޫސް، "ވަގުތުން" ޚަބަރު ފެތުރި ކަމަށް ބުނެ، އެ ނޫހުގެ މައްސަލަ ފުލުހުންނަށް އޭނާ ހުށަހަޅުއްވައިފިއެވެ.
އެ ނޫހުގެ މައްސަލަ ބަލައި ދިނުމަށް މޯލްޑިވްސް މީޑިއާ ކައުންސިލް (އެމްއެމްސީ) އާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް)އަށް ވެސް ވަނީ ހުށަހަޅާފައެވެ.
ފުލުހުންގެ މައި އިދާރާ، ޝަހީދު ހުސައިން އާދަމް ބިލްޑިންއަށް ވަޑައިގެން، ވަގުތު ނޫހުގެ މައްސަލަ އެ މުއައްސަސާއަށް ހުށަހެޅުއްވުމަށްފަހު އެ އިމާރާތުން ނުކުމެވަޑައިގެން "ރާއްޖެ އެމްވީ"އަށް އިންތި ވިދާޅުވީ ވަގުތު ނޫހުން އޭނާ ދެއްކި ވާހަކަ އޮޅުވާލައިގެން ހަބަރު ފެތުރުމުގެ ނަތީޖާއެއްގެ ގޮތުން ބައެއް މީހުންގެ މެދުގައި އޭނާއާމެދު ނަފުރަތާއި ރުޅިވެރިކަން އުފެދި ހަށިފުރާނައަށް ނުރައްކާވާ ގޮތަށް ކޮމެންޓުތައް ކޮށްފައިވާ ކަމަށެވެ.
"ބުދު ދީން ވެސް ރާއްޖެއަށްވުރެ ރަނގަޅު" ކަމަށް ބުނެ، އިންތިއާ ހަވާލާދީ ވަގުތު ނޫހުން އާންމުކޮށްފައިވާ ޚަބަރާއި "ބުދު ދީނަށްވުރެ ރާއްޖޭގެ ކަންކަން ގޯސް ކަމަށް" ބުނެ، އޭނާއާ ހަވާލާދީ ހަމަ އެ ނޫހުގައި ލިޔެފައިވާ ޚަބަރަކީ އޭނާ ވިދާޅުވި އެއްޗެއް ކަމަށް ހަދައި، އެ ނޫހުން އަމިއްލައަށް ހަދައިގެން ލިޔެފައިވާ ވާހަކަތަކެއް ކަމަށް އިންތި ބުރާސްފަތި ދުވަހު ވިދާޅުވިއެވެ.
އޭނާ ވިދާޅުވީ ދީނާ ގުޅުވައިގެން މީހަކާ މެދު ރުޅިވެރިކަމެއް އުފެދޭ ގޮތަށް ދައްކާ ވާހަކައަކުން ދެކޮޅުވެރިކަމަށް ނުވަތަ އަނިޔާވެރި ކަމަށް އެ މީހަކު ހުށަހެޅިގެންދާ ގޮތް ވުމަކީ ބައިނަލްއަގުވާމީ ގާނޫނުތަކާއި ރާއްޖޭގެ ގާނޫނުތަކުގައި ވެސް ޖިނާއީ ކުށެއް ކަމަށް ކަނޑައަޅާފައިވާ އަމަލެއް ކަމަށެވެ.
ވަގުތު ނޫހަކީ ސަރުކާރަށް ތާއީދުކޮށް ލިޔުންތައް ލިޔާ ނޫހެއް ކަމަށް ފާހަގަކޮށް، އިންތި ތުހުމަތު ކުރެއްވި ގޮތުގައި އޭނާއާ ގުޅުވައިގެން ލިޔުންތަކެއް އާންމުކުރީ ނުބައި ނިޔަތުގައި، ގަސްދުގަ އެވެ.
އެ ނޫހުގެ އެ އަމަލަކީ ގާނޫނުލްއުގޫބާތާއި ޖިނާއީ ކުށްތައް ކަނޑައަޅާފައިވާ އެ ނޫން ވެސް ގާނޫނުތަކުގައި އަދި ބައިނަލްއަގުވާމީ ގާނޫނުތަކުގައި ޖިނާއީ އަމަލެއް ކަމަށެވެ.
އެހެންކަމުން އެ ނޫހުން ފަތުރާފައިވާ ހަބަރުތައް ޖިނާއީ މައްސަލައެއްގެ ގޮތުގައި ބައްލަވައި ފިޔަވަޅު އަޅުއްވައި ދިނުމަށް ފުލުހުންނަށާއި އެމްއެމްސީ އާއި އެޗްއާރްސީއެމްގައި އެދިވަޑައިގެންފައިވާނެ ކަމަށެވެ.
އިންތިގެ ތުހުމަތުތަކާ ގުޅިގެން ވަގުތު ނޫހުގެ ޗީފް އެޑިޓަރު މުޝައްރަފު ހަސަން ދީދީ "ރާއްޖެއެމްވީއަށް" ބުރާސްފަތި ދުވަހު ވިދާޅުވީ އިއްތިއަށް ފެނިވަޑައިގަންނަވާ ގޮތަކަށް އެ މައްސަލަތަކުގައި ކުރިއަށް ވަޑައިގަތުމުން ރަނގަޅުވާނެ ކަމަށާއި އިންތި ދެއްކި ވާހަކައެއް އޮޅުވާލައިގެން އެ ނޫހުން ފަތުރާފައި ނުވާނެ ކަމަށެވެ.
