ދާދިފަހުން އިންޑިއާ ކަނޑުގެ ސަރަހައްދަށް އައި ތޫފާން އޮކިގައި ގެއްލުނު އިންޑިއާގެ މަސްވެރިން ހޯދުމަށް އެޤައުމުގެ އެހެން މަސްވެރިން ރާއްޖޭގެ ފަޅުރަށްތައް ބެލުމަށް ރާއްޖެ އަންނަން ފުރައިފި ކަމަށް އިންޑިއާގެ ނޫސްތަކުން ބުނެފިއެވެ.

ދަ ހިންދޫ ނޫހުގައި ލިޔެފައި ވަނީ އިންޑިއާ އިން ގެއްލުނު މަސްވެރިން ހޯދުމަށް ސަރުކާރުން އެކަށީގެންވާ މަސައްކަތް ކުރަމުން ނުދާ ކަމަށް ބުނެ، ގެއްލުނު މަސްވެރިން ރާއްޖޭގެ ފަޅުރަށްތަކުގައި ތާށިވެފައިވޭތޯ ބެލުމަށް ރާއްޖޭގެ ފަޅުރަށްތައް ބަލަން ކަންޏަކުމާރީގެ މަސްވެރިން ނިންމާފައި ވާކަމަށެވެ. އަދި މާލޭގައި ހުންނަ އިންޑިއާ އެމްބަސީ މެދުވެރިކޮށް ރާއްޖޭގެ ޚާރިޖިއްޔާ އިން އެކަމަށް ބޭނުންވާ ހުއްދަ ހޯދާފައިވާ ކަމަށް ވެސް އެ ނޫހުގައި ލިޔެފައިވެއެވެ.

އިންޖީނު އެޅި އަށް ދޯނީގައި އިންޑިއާގެ 36 މަސްވެރިން މިދިޔަ ޑިސެމްބަރު މަހުގެ 29 ވަނަ ދުވަހު އިންޑިއާ އިން ފުރާފައިވާ ކަމަށް ދަ ހިންދޫ އިން ބުނެއެވެ. އަދި އެ މީހުންނަށް ދިވެހި ސަރުކާރުން ހުއްދަ ދީފައިވާ ކަމަށް ވެސް ބުނެފައި ވެއެވެ.

މި އޮޕަރޭޝަން ހިންގާ މަސްވެރިންނާ ހަވާލާދީ ދަ ހިންދޫ އިން ބުނާ ގޮތުގައި މަސްވެރިންނަށް ރާއްޖެއާ ހިސާބަށް ފޯރާނީ ޖެނުއަރީ 3 ނުވަތަ 4 ގައެވެ. އަދި ރަށްތައް ބެލުމަށް ފަހު 5 ވަނަ ދުވަހު މަސްވެރިން އަނބުރާ އިންޑިއާއަށް ދާނެއެވެ.

ތޫފާން އޮކިގައި ގެއްލުނު އިންޑިއާގެ މަސްބޯޓުތައް ހޯދުމުގައި އިންޑިއާގެ ޓެމިލް ނާޑޫގެ މަސްވެރި ޖަމާއަތަކުން، އިންޑިއާގެ ކޮމާޝަލް 8 ބޯޓެއް 36 މީހުންނާ އެކު ހަރަކާތްތެރިވާން ފަށާފައިވާ ކަމަށް ވެސް އިންޑިއާގެ އެމްބަސީ އިން އެމްއެންޑީއެފް އާއި މަޢުލޫމާތު ހިއްސާކޮށްފައި ވާކަމަށް އެމްއެންޑީއެފް އިން ބުނެފައިވާއިރު، އެމީހުން ފަޅުރަށްތައް ބަލަން ދާނެ ވާހަކަ ބުނެފައެއް ނުވެއެވެ.

ތޫފާން އޮކިގައި އިންޑިއާ އާއި ލަންކާ އިން ގިނަ އަދަދެއްގެ މަސްވެރިން ގެއްލިފައިވާއިރު، ރާއްޖޭގެ ކަނޑުގެ ސަރަހައްދުން ވެސް ބައެއް ދޯނިތައް ޙާލުގައި ޖެހިފައިވަނިކޮށް ފެނިފައިވެއެވެ. އަދި އެމީހުންނަށް ރާއްޖޭގެ ކޯސްޓްގާޑުންނާއި މަސްވެރިން އެހީތެރިކަން ފޯރުކޮށްދީފައިވާއިރު، އިންޑިއާގެ ކަނޑުގެ ސިފައިން ކަނޑުމަގުންނާއި ވައިގެ މަގުން ގެއްލުނު މަސްވެރިން ހޯދުމަށް ރާއްޖޭގެ ސަރަހައްދު ބަލާފައިވެއެވެ.