ޔުއެފާ ޗެމްޕިއަންސް ލީގު: ހަނި ގޮތަކަށް ބާސާ މޮޅުވިއިރު ޔުވެންޓަސްއަށް ފުރަތަމަ މޮޅު

ޔުއެފާ ޗެމްޕިއަންސް ލީގުގެ ގްރޫޕް ޑީގައި ބާސެލޯނާ އާއި ޔުވެންޓަސް ކުޅުނު މެޗުތަކުން އެ ދެ ޓީމު ވެސް މޮޅުވެއްޖެއެވެ.

ބުދަ ދުވަހުގެ ރޭ ރަށުން ބޭރުގައި ޕޯޗުގަލްގެ ސްޕޯޓިން ލިސްބަންއާ ދެކޮޅަށް ކުޅުނު މެޗު ބާސެލޯނާއިން ކާމިޔާބު ކޮށްފައި ވަނީ 1-0 ގެ ނަތީޖާއަކުންނެވެ. މި މެޗުގައި ބާސާގެ ފަރާތުން ދަށް ކުޅުމެއް ފެނިގެން ގޮސްފައިވާއިރު ސްޕޯޓިންއިން ވަނީ ބާސާގެ ގިނަ ހަމަލާތަށް ހުއްޓުވާފައެވެ. އެގޮތުން ސްޕޯޓިންއިން ވަނީ މެސީ ހުއްޓުވުމުގައި ކާމިޔާބު ހޯދާފައެވެ. ސްޕޯޓިން އިން މި މެޗުގައި ބާސާއަށް ވުރެ ގިނަ ހަމަލާތަށް އުފައްދާފައެވެ.

ފުރަތަމަ ހާފުގައި ވެސް ސްޕޯޓިންގެ ފަރާތުން މޮޅު ކުޅުމެއް ފެނިގެން ގޮސްފައިވާއިރު އެ ޓީމުން އުފެއްދި ގިނަ ހަމަލާތަކުގެ ހުރަހަކަށް ވެގެން ގޮސްފައިވަނީ ބާސާގެ ކީޕަރު ޓާ ސްޓީޖެންއެވެ. ފުރަތަމަ ހާފު ނިމިފައި ވަނީ 0-0 ގެ ނަތީޖާއަކުން ދެ ޓީމު އެއްވަރުވެ އޮވެގެންނެވެ.

މި މެޗުގައި ފެނިގެން ދިޔަ ހަމައެކަނި ލަނޑު ފެނިގެން ގޮސްފައި ވަނީ މެޗުގެ 49 ވަނަ މިނިޓުގައެވެ. މި ލަނޑަކީ މެސީ ނަގައިދިން ހުރަހަކުން ސްޕޯޓިންގެ ޑިފެންޑާ ސެބެސްޓިއަން ކޮއާޓޭސް އަތުން ބައިކޮޅަށް ވަން ލަނޑެކެވެ. މި ލަނޑަށް ފަހު ވެސް މޮޅަށް ކުޅެ ގިނައިން ހަމަލާ އުފައްދާފައި ވަނީ ސްޕޯޓިންއިންނެވެ. އެހެނަސް އެ ޓީމަށް މި ހަމަލާތައް ލަނޑުތަކަކަށް ބަދަލު ކޮށްލެވިފައެއް ނުވެއެވެ.

މި ގްރޫޕުގެ ދެވަނަ މެޗުގައި ޔުވެންޓަސްއިން ވަނީ އަމިއްލަ ދަނޑުގައި 2-0 އަކުން އޮލިމްޕިއާކޯސް ބަލިކޮށް މި ސީޒަނުގެ ޔުއެފާ ޗެމްޕިއަންސް ލީގުގައި އެ ޓީމުގެ ފުރަތަމަ މޮޅު ހޯދާފައެވެ.

ޔުވެންޓަސްއިން ވަނީ މުޅި މެޗުވެސް ކޮންޓްރޯލްކޮށް ލަނޑު ޖެހުމަށް ގިނަ ފުރުސަތުތަކެއް ތަނަވަސް ކޮށްފައެވެ. އެ ޓީމުން ވަނީ އޮލިމްޕިއާކޯސްގެ ހަމަލާތައް ހުއްޓުވައި މޮޅު ފުރިހަމަ ގޭމެއް ކުޅެފައެވެ. ފުރަތަމަ ހާފުގައި ވެސް ލަނޑު ޖެހުމަށް ގިނަ ފުރުސަތުތަކެއް ޔުވެންޓަސްއިން ތަނަވަސް ކުރި ނަމަވެސް ފުރަތަމަ ހާފު ނިމިފައި ވަނީ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ.

ދެވަނަ ހާފުގައި ޔުވެންޓަސްއިން މެޗުގެ ލީޑު ނެގީ 69 ވަނަ މިނިޓުގައެވެ. މި ލަނޑު އެ ޓީމަށް ކާމިޔާބު ކޮށްދިނީ ގޮންޒާލޯ ހިގުއައިންއެވެ. ޔުވެންޓަސްއިން އޭގެ 10 މިނިޓު ފަހުން އެ ޓީމުގެ ލީޑު އިތުރަށް ފުޅާކޮށްފައެވެ. ޕައުލޯ ޑިބާލާގެ އެހީތެރި ކަމާއެކު މި ލަނޑު އެ ޓީމަށް ކާމިޔާބު ކޮށްދިނީ މާރިއޯ މަންޒުކިޗްއެވެ.

މި ގްރޫޕުގެ އެއްވަނައިގައި ކުޅުނު ދެ މެޗުން ލިބުނު ހަ ޕޮއިންޓާ އެކު އޮތީ ބާސެލޯނާއެވެ. އަދި ތިން ޕޮއިންޓް ހޯދައިގެން ލަނޑުގެ ތަފާތުން ސްޕޮޓިންއަށް ދެވަނަ ލިބޭއިރު ހަމަ ތިން ޕޮއިންޓާއެކު އެހެނަސް ލަނޑުގެ ތަފާތުން ތިންވަނަ ލިބެނީ ޖުވެންޓަސްއަށެވެ. މި ގްރޫޕުގެ ފުލުގައި އެއްވެސް ޕޮއިންޓެއް ނުލިބި އޮތީ އޮލިމްޕިއާކޯސްއެވެ.