ޓީސީ ސްޕޯޓްސް ކްލަބަށް ކުޅުނު ހުނަރުވެރި ފޯވާޑް ނާއިޒް ހަސަން (ދާދު) މާޒިޔާ ސްޕޯޓްސް އެންޑް ރެކްރިއޭޝަނަށް ސޮއިކޮށްފިއެވެ.
ނިއުއިން ވެސް ދާދު ހޯދުމަށް މަސައްކަތްކުރި ނަމަވެސް އޭނާވަނީ މާޒިޔާއާއެކު އެއް އަހަރު ދުވަހުގެ އެއްބަސަވުމެއްގައި ސޮއިކޮށްފައެވެ.
މާޒިޔާގެ ކޮންޓްރެކްޓްގައި ސޮއިކުރުމަށް ފަހު ވާހަކަ ދައްކަމުން ދާދު ބުނެފައިވަނީ މާޒިޔާއަކީ ވަރަށް ރަނގަޅު މެނޭޖްމަންޓެއް އޮތް ކްލަބެއް ކަމަށާއި އެ ޓީމުން އަންނަ ސީޒަނަށް ކަނޑައަޅާފައިވާ އަމާޒުތަކަށް ވާސިލްވުމަށް އެހީތެރިވެދޭނެ ކަމަށެވެ.
ރާއްޖޭގެ ފުޓްބޯޅައިގެ އެންމެ އުއްމީދީ ކުޅުންތެރިޔާގެ ގޮތުގައި ފާހަގަކުރެވޭ ދާދުގެ ސޮއި މާޒިޔާއިން ހޯދިއިރު އެ ޓީމުގެ ޗެއާމަން އަހުމަދު ސާޖިދް ބުނެފައިވަނީ އޭނާއަކީ ވަރަށް ހުނަރުވެރި ކުޅުންތެރިޔެއް ކަމަށާއި އޭނާގެ ސަބަބުން އަންނަ ސީޒަނުގައި މާޒިޔާ އިތުރަށް ވަރުގަދަވާނެ ކަމަށެވެ.
މާޒިޔާއިން ވަނީ އެ ޓީމަށް ކުޅެމުން އަންނަ މިޑްފީލްޑަރު ޔަސްފާދު ހަބީބްގެ ކޮންޓްރެކްޓު ވެސް އައުކޮށްފައެވެ. އޭނާވަނީ ފާއިތުވެދިޔަ ސީޒަންތަކުގައި އެ ޓީމުގައި މޮޅު ކުޅުމެއް ދައްކާފައެވެ. ހަމައެހެންމެ އެ ޓީމުން ވަނީ ނިމިގެންދިޔަ ޔޫތު ޗެމްޕިއަންޝިޕްގައި އެ ޓީމުގެ ޒުވާން ޓީމަށް ކުޅުނު އުއްމީދީ މިޑްފީލްޑަރު އަބުދުﷲ ޖުނައިދްގެ ސޮއި ވެސް ހޯދާފައެވެ.
ދާދު ނެތް ތަން ފޫބެއްދުމުގެ ގޮތުން ޓީސީއިން ވަނީ މިދިޔަ ސީޒަނުގައި ށ. މިލަންދޫ ޓީމުން ވިދާލި ބ. އޭދަފުއްޓަށް އުފަން އިޝާން އިބްރާހިމް (ސައްޓު) އެ ޓީމަށް ގެނެސްފައެވެ.
މިދިޔަ ސީޒަނުގައި މާޒިޔާއަށް ލިބުނު އެންމެ ބޮޑު ކާމިޔާބަކީ އެސްޓިއޯ މާލެ ލީގުގެ ޗެމްޕިއަންކަން ހޯދުން ކަމަށްވާއިރު އެ ޓީމުން އަންނަނީ އަންނަ ސީޒަނަށް ތައްޔާރުވުމަށް ގިނަ މަސައްކަތްތަކެއް ކުރަމުންނެވެ. އެގޮތުން އެ ޓީމުން ވަނީ ސަމޫހު އަލީ (ސަމުއްޓެ) އާއި މުހައްމަދު އިރުފާން (އިރޭ) ގެ އިތުރުން މޫސާ ޔާމިން (ޔާމްބެ) ގެ ކޮންޓްރެކްޓު ވެސް އައުކޮށްފައެވެ.
މާޒިޔާއަށް ދާދު ސޮއެކޮށްފައިވާއިރު އޭނާ ވަނީ ޑިސެމްބަރު މަހުގެ ތެރޭގައި ދިން މޯލްޑިވްސް ފުޓްބޯލް އެވޯޑްސްގެ އެންމެ އުއްމީދީ ކުޅުންތެރިޔާއަށް ދޭ އެވޯޑު ހޯދާފައެވެ.
