ރިޔާސީ އިންތިހާބުގައި ރައީސް ނަޝީދަށް ވާދަ ކުރެއްވޭނެ ކަމާމެދު ޝައްކެތް ނުކުރަން: ހަސަން ލަތީފު
އެމްޑީޕީ ސަރުކާރުގެ ކޮރަޕްޝަން އޮތޭ ވިދާޅުވާން ރައީސް ޔާމިން ލަދުވެތިވެވަޑައިގަންނަވަން ޖެހޭނެ
އެމްޑީޕީގެ ޗެއާޕާސަން ހަސަން ލަތީފު
އަންނަ އަހަރުގެ ރިޔާސީ އިންތިހާބުގައި ކުރީގެ ރައީސް މުހައްމަދު ނަޝީދަށް ކުރިމަތިލެއްވޭނެ ކަމާ މެދު ޝައްކުނުކުރައްވާ ކަމަށް އެމްޑީޕީގެ ޗެއާޕާސަން ހަސަން ލަތީފު ވިދާޅުވެއްޖެއެވެ.
ރާއްޖެ ޓީވީގެ "ފަލަ ސުރުހީ" ޕްރޮގުރާމްގައި ވާހަކަ ދައްކަވަމުން ހަސަން ލަތީފު ވިދާޅުވީ މިނިވަން އިންސާފުވެރި އިންތިހާބަކަށްޓަކައި ދޫދޭން ރައީސް ޔާމިނަށް ޖެހިވަޑައިގަންނަވާނެ ކަމަށެވެ. އޭނާ ވިދާޅުވީ ގުޅިފައިވާ ހުރިހާ ސިޔާސީ ޕާޓީތަކަކީ ތަފާތު ފިކުރުގެ ޕާޓީތައް ކަމަށް ވިއަސް ރައީސް އަބްދުﷲ ޔާމިންގެ ވެރިކަން ބަދަލު ކުރުމަށް އިދިކޮޅު ހުރިހާ ޕާޓީތަކަށް އެއްބަސް ވެވޭ ކަމަށެވެ.
"އަޅުގަނޑުމެން މި ދަންނަވާ ވާހަކައަކީ އަންނަ އަހަރު ރިޔާސީ އިންތިހާބަށް ދާއިރު ރައީސް ނަޝީދުގެ ނަންފުޅު އޮންނާނެ ކަމާ މެދު އަޅުގަނޑުމެން ޝައްކެތް ނުކުރަން. އަދި އެކަމަށް އަޅުގަނޑުމެން ކުރަން ހުރި ހުރިހާ މަސައްކަތެއް ކުރާނެ ވާހަކަ. އެއީ ބޭރުގެ އެކި ގައުމުތަކުންނާއި ޖަމިއްޔާތަކުން ކުރަމުންދާ މަސައްކަތުގެ ތެރެއިން މިނިވަން އިންސާފުވެރި އިންތިހާބެއް ބޭއްވޭނެ،" ހަސަން ލަތީފު ވިދާޅުވި އެވެ.
ކުރީގެ ރައީސް މުހައްމަދު ނަޝީދަށް އަންނަ ރިޔާސީ އިންތިހާބަށް ކުރިމަތި ނުލެއްވޭނެ ކަމަށް ވިދާޅުވެ ޕީޕީއެމްގެ ޕާލަމެންޓްރީ ގުރޫޕްގެ ލީޑަރު އަހްމަދު ނިހާން ހުސެއިން މަނިކު ދައްކަވާ ވާހަކައަކީ އެއްވެސް ވާހަކައެއް ނޫން ކަމަށް ތަކުރާރުކޮށް ހަސަން ވިދާޅުވިއެވެ. އަދި ވިދާޅުވީ ރައީސް ޔާމިނަށް އެނގިވަޑައިގަންނަވާ ހުރިހާ އެއްޗެއް ނިހާނަށް އެނގިވަޑައިނުގަންނަވާނެ ކަމަށާއި މިހާރު ވިދާޅުވެވޭ އެއްޗަކުން ފަހުން ލަދުގަންނަ ޖެހިވަޑައިގެންފާނެ ކަމަށެވެ.
މީގެ އިތުރުން ހަސަން ލަތީފު ވިދާޅުވީ އެމްޑީޕީ ސަރުކާރުގެ ކޮރަޕްޝަން އޮތޭ ވިދާޅުވާން ރައީސް ޔާމިން ލަދުވެތިވެވަޑައިގަންނަވަން ޖެހޭނެ ކަމަށާއި މި ސަރުކާރު ރަމްޒް ކޮށްދޭ ތިން ކަމަކީ ވެސް އަނިޔާވެރިކަމާއި ވައްކަމާއި ކޮރަޕްޝަން ކަމަށެވެ. ޗައިނާއާއެކު ހަދާފައިވާ މިނިވަން ވިޔަފާރީގެ އެއްބަސްވުމާ ގުޅޭ ގޮތުން ހަސަން ލަތީފު މިރޭ ވެސް ވިދާޅުވީ އެއީ ރާއްޖެއަށް ވަރަށް ނުރައްކާތެރި އެއްބަސްވުމެއް ކަމަށެވެ. މިމޭރުމުން ވާހަކަ ދައްކަވަމުން ވިދާޅުވީ އެ އެ އެއްބަސްވުމަށް އަމަލުކުރާ ނަމަ ޗައިނާގެ ކޮންޓްރޯލްގެ ދަށަށް ރާއްޖެ ހިނގައިދާނެ ކަމަށެވެ.
ސަރުކާރާ އެކު މަޝްވަރާ ކުރުމާ ގުޅޭ ގޮތުން އޭނާ ވިދާޅުވީ ސަރުކާރުން ބޭނުންވާ މަޝްވަރާތަކުގައި ރައީސް ނަޝީދަށް ރާއްޖެއިން ބޭރުގައި ހުންނަވައިގެން ބައިވެރިވަޑައިގެންނެވޭ ގޮތަށް ބާއްވާ ނަމަ އެކަން ކުރެވިދާނެ ކަމަށެވެ. އަދި އެމްޑީޕީ އިން އޮތީ މަޝްވަރާ ކުރަން ތައްޔާރަށް ކަމަށް ވެސް އޭނާ ވިދާޅުވިއެވެ.
މީގެ އިތުރުން ވެސް ރައީސް ޔާމިން އަމަލު ކުރައްވާ ގޮތް މުޅި ދުނިޔެއަށް އެނގޭ ކަމަށާއި އެއްވެސް ކަމެއް ރާއްޖޭގެ ރައްޔިތުންނަށް ވެސް އަދި ބޭރުގެ ގައުމުތަކަށް ވެސް އޮޅުވާ ނުލެއްވޭނެ ކަމަށް ތަކުރާރުކޮށް ވިދާޅުވިއެވެ.
