މުވާޞަލާތީ ދާއިރާ ތަރައްޤީކޮށް، ގުޅިގެން މަސައްކަތްކުރުމަށް އުރީދޫ މޯލްޑިވްސް އާއި އިންޑިއާގެ ޓާޓާ ޓެލޮކޮމްއާ ދެމެދު އެއްބަސްވުމުގައި ސޮއިކޮށްފިއެވެ.
ޓާޓާ ޓެލެކޮމް އިން ބުނީ އެކުންފުނީގެ ސަބްސިޑަރީ ކުންފުންޏެއް ކަމަށްވާ ޓާޓާ ކޮމިއުނިކޭޝަންސް ޓްރާންސްފޮމޭޝަން ސަރވިސަސް އާއި އުރީދޫއާ ދެމެދު ސޮއިކުރެވުނީ އިންޓަނެޓްގެ ޒަރީޢާ އިން ދޭ ޚިދުމަތްތައް އިތުރަށް ފުޅާކޮށް، ރާއްޖޭގައި ދޭ މުވާޞަލާތީ ޚިދުމަތްތަކުގެ ފެންވަރު ރަނގަޅުކުރުމަށް ކަމަށެވެ. ޓާޓާއިން މިހާރު ގެންދަނީ ދުނިޔޭގެ އެންމެ ބޮޑު "އިންޓަރނެޓް އޮފް ތިންގްސް ނެޓްވޯކް" އިންޑިއާގައި ޤާއިމްކުރުމަށް މަސައްކަތްކުރަމުންނެވެ.
ޓާޓާއާ އެކު މިމަސައްކަތްކުރުމަށް އެކުލަވާލި އެއްބަސްވުމުގައި ސޮއެކުރެއްވުމަށް ފަހު އުރީދޫ މޯލްޑިވްސްގެ ސީއީއޯ ނަޖީބު ޚާން ވިދާޅުވީ ޓާޓާއާ އެކު ސޮއިކުރެވުނު އެމްއޯޔޫއަކީ ދިވެހިރާއްޖޭގައި ޑިޖިޓަލް ޚިދުމަތް ދިނުމަށް އުރީދޫ އިން ކުރާ މަސައްކަތުގައި ގިރާކުރެވުނު އިތުރު ހަރުފަތެއް ކަމަށެވެ. އަދި އުރީދޫ އިން މަސައްކަތްކުރަނީ ދުނިޔެއަށް އަންނަ ޓެކްނޮލޮޖީގެ ކުރިއެރުންތައް ވީހާ ވެސް އަވަހަކަށް އުރީދޫގެ ކަސްޓަމަރުންނަށް ގެނެސްދިނުމަށް ކަމަށް ވެސް އޭނާ ވިދާޅުވިއެވެ.
ޓާޓާ ކޮމިއުނިކޭޝަންސް ޓްރާންސްފޮމޭޝަން ސަރވިސަސްގެ ސީއީއޯ މަދުޝުދަން މައިސޫރު ވިދާޅުވީ މިއީ ޓާޓާގެ ޑިޖިޓަލް ޚިދުމަތް ފުޅާކުރުމަށް ލިބުނު އިތުރު ފުރުސަތެއް ކަމަށެވެ. އަދި އިންޑިއާ އިން ލިބޭ ތަޖުރިބާގެ އަލީގައި އެހެން މާކެޓްތަކުގައި ވެސް، އެމާކެޓްތަކަށް ބޭނުންވާ އިންޓަނެޓް ޓެކްނޮލޮޖީތަކާއި ހައްލުތައް ގެނެސްދިނުމަށް ޓާޓާއިން މަސައްކަތްކުރާ ކަމަށް ވެސް މައިސޫރު ވިދާޅުވިއެވެ.
މި އެއްބަސްވުމުގެ ދަށުން އުރީދޫގެ ކަސްޓަމަރުންނަށް ސްމާޓް އެކި ޓެކްނޮލޮޖީތައް ބޭނުންކުރުމުގެ މަގު ފަހިވެގެންދާނެ ކަމަށް ޓާޓާ ކުންފުނިން ބުނެއެވެ.
