ކަރެން ސްޓެލާ މަރުވީ ސިކުނޑިއަށް ލޭ އެޅިގެން

ސިންގަޕޫރުގެ މޮޑެލް އަދި ލަވަކިޔުންތެރިޔާ ކަރެން ސްޓެލާ ވޮންގް މަރުވީ ސިކުނޑިއަށް ލޭ އެޅިގެންކަމަށް ޑޮކްޓަރުން ބުނެފިއެވެ.

ޑޮކްޓަރުން އާންމު ކޮށްފައިވާ ރިޕޯޓުގައި ބުނެފައިވަނީ ކަރެން މަރުވީ އިންޓްރަސެރެބްރަލް ހެމޮރޭޖްގެ ސަބަބުބުން ކަމަށެވެ.

އިންޓްރަސެރެބްރަލް ހެމޮރޭޖް (އައިސީއެޗް) އަކީ ސްޓްރޯކެއް ޖެހި ސިކުނޑިއަށް ލޭ އެޅުމެވެ. ސިކުނޑިއަށް ލޭ އެޅުމަށް މައިގަނޑު ގޮތެއްގައި ދިމާވަނީ ބޮލުގައި ޓިއުމަރެއް ހުރުން ނުވަތަ ހައިޕާ ޓެންޝަންގެ ސަބަބުންނެވެ.

އުމުރުން 28 އަހަރުގެ ސްޓެލާ ސިންގަޕޫރުގެ ހޮސްޕިޓަލަށް ގެންދިޔައީ ލަވަކިޔަން ހުއްޓާ އޭނާގެ މުޅި ހަށިގަނޑު އައްސިވެ ވާގި ނެތިގެން މިމަހުގެ 12 ވަނަ ދުވަހުގައެވެ. ސްޓެލާ މަރުވީ ކޯމާގައި އޮންނަތާ ތިން ދުވަސް ފަހުން މިމަހުގެ 15 ވަނަ ދުވަހުގައެވެ.

ސްޓެލާ މަރުވި ސަބަބު އޭނާ ބެލި ޑޮކްޓަރު އާންމު ކޮށްފައިވާއިރު އޭނާގެ ދެ ކިޑްނީއާއި ލިވާ ވަނީ ހަދިޔާކޮށްފައެވެ.

ސްޓެލާގެ ބައްޕަ ލޮރެންޒް ވޮންގް ބުނެފައިވަނީ އެ އާއިލާއަށް ދުވަހަކުވެސް އައިސީއެޗް ޖެހިފައި ނުވާކަމަށެވެ. އަދި ސްޓެލާ އޭނާގެ ގުނަވަންތައް ހަދިޔާ ކޮށްފައިވާތީ އޭނާ ހުރީ ހައިރާންވެފައި ކަމަށާއި އެހެން ނަމަވެސް ތިން މީހުންގެ ފުރާނަ ސަލާމަތްކޮށްދެވުނީތީ އުފާ ކުރާކަމަށް ލޮރެންޒް ވަނީ ބުނެފައެވެ.

ސިންގަޕޫރުގެ ގާނޫނު (ހިއުމަން އޯގަން ޓްރާންސްޕްލާންޓް އެކްޓް) ގައި ބުނެފައިވާ ގޮތުގައި އުމުރުން 21 އަހަރުން މަތީގެ ސިންގަޕޫރުގެ ވަޒަންވެރިންނަށް އެގައުމުގެ ހޮސްޕިޓަލެއްގައި މަރުވެއްޖެނަމަ އެމީހެއްގެ ހިތާއި، ކިޑްނީ އަދި ލިވާ ހަދިޔާ ކުރެވިދާނެއެވެ.