ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމު ކޮށްގެން ބާއްވާ މިނިވަން ޗެމްޕިއަންޝިޕް ފުޓްބޯޅަ މުބާރާތުގައި ބައިވެރިވުމުގެ ފުރުސަތު ހުޅުވާލައިފިއެވެ.

އެ އެސޯސިއޭޝަނުން މިއަދު ނެރުނު އިއުލާނެއްގައި ވަނީ މި މުބާރާތުގައި ބައިވެރިވާން ބޭނުންވާ ޓީމުތަކުން އަންނަ އަހަރުގެ ޖެނުއަރީ މަހުގެ 31 ވަނަ ދުވަހުގެ 15:00 ގެ ކުރިން އެ އެސޯސިއޭޝަނަށް އީމެއިލް ނުވަތަ ފެކްސް މެދެވެރިކޮށް އަންގަންޖެހޭ ކަމަށެވެ. އަދި މި ލިޔުމުގައި އެ ޓީމެއްގެ ކަންކަމުގައި އެ އެސޯސިއޭޝަނުން  ގުޅަންޖެހޭ ފަރާތެއްގެ ނަމާއި، މަގާމް އަދި ފޯނު ނަމްބަރު ހިމަނަންޖެހޭނެ ކަމަށް އެ އިއުލާނުގައިވެއެވެ. މި މުބާރާތުގައި ބައިވެރިވެވެނީ ސްޕޯޓްސް ކޮމިޝަނުގައި ރަޖިސްޓްރީކޮށްފައިވާ ޓީމުތަކަށެވެ.

އެފްއޭއެމްއިން ހާމަކޮށްފައިވާ ގޮތުގައި އަތޮޅަކުން ދެ ޓީމަށް ވުރެ ގިނަ ޓީމު ބައިވެރިވާނަމަ އެ އަތޮޅެއްގެ މެޗުތައް ކުޅޭނީ އެ އަތޮޅެއްގެ ހޯސްޓުކުރާ ރަށުގައެވެ. އަދި ދެ ޓީމު ބައިވެރިވާނަމަ މެޗުތައް ކުޅެވޭނީ ހޯމް އެންޑް އަވޭ އުސޫލުން ކަމަށް އެފްއޭއެމް ބުނެއެވެ. މިއީ ޒޯން މުބާރާތުގައި ވެސް މެޗު ކުޅުމުގައި އަމަލު ކުރެވޭނެ އުސޫލުކަމަށް އެ އެސޯސިއޭޝަނުގެ އިއުލާނުގައިވެއެވެ.

އެފްއޭއެމްއިން ވަނީ އަތޮޅު މުބާރާތް ހޯސްޓު ކުރުމުގެ ފުރުސަތު ވެސް ހުޅުވާލާފައެވެ. އެގޮތުން ހޯސްޓުކުރަން ބޭނުންވާ ރަށްތަކުން އެކަމަށް އެދި ފޯމު ފުރިހަމަކޮށް ޕްރޮޕޯސަލްއާއެކު ހުށަހެޅުމުގެ ސުންގަޑިއަކީ ވެސް 31 ޖެނުއަރީ 15:00 ކަމަށް އެ އެސޯސިއޭޝަނުގެ އިއުލާނުގައިވެއެވެ. މުބާރާތުގެ މެޗުތައް ފަށާ ތާރީހު އިއުލާނުކުރެވޭނީ މުބާރާތުގައި ބައިވެރިވާ ޓީމުތައް ކަށަވަރުވުމުން ކަމަށް އެ އެސޯސިއޭޝަނުން ބުނެއެވެ.

މި ނިމުނު ސީޒަނުން ފެށިގެން އެފްއޭމްއިން ވަނީ ރާއްޖޭގެ ފުޓްބޯޅަ ސީޒަނަށް ބޮޑެތި ބަދަލުތަކެއް ގެނެސްފައެވެ. އެގޮތުން މިނިވަން ޗެމްޕިއަންޝިޕް ފުޓްބޯޅަ މުބާރާތުގެ ގަދަ ހަތަރު ޓީމަށް އުރީދޫ ދިވެހި ޕްރިމިއާ ލީގުން ފުރުސަތު ލިބެއެވެ. މި ނިމުނު ސީޒަނުގައި އެގޮތަށް އުރީދޫ ދިވެހި ޕްރިމިއާ ލީގަށް ކޮލިފައިވީ ތިނަދޫ އާއި ކުޑަހުވަދޫ އަދި މިލަންދޫގެ އިތުރުން މާޅޮސްއެވެ. މިދިޔަ ސީޒަނުގައި މި މުބާރާތުގެ ޗެމްޕިއަންކަން ހޯދީ ކުޑަހުވަދޫއެވެ.

އަންނަ އަހަރުގެ މުބާރާތް ފެށުމަށް ހަމަޖެހިފައިވަނީ ފެބްރުއަރީ މަހުގެ 27 ވަނަ ދުވަހުއެވެ.