ފުލުހުން ޓޯކުރި 500 އަށް ވުރެ ގިނަ ސައިކަލް ނައްތާލަނީ
27 ޑިސެމްބަރު 2017 | ބުދަ 02:38އެ ހުރިހާ ސައިކަލަކީ ވެސް މި އަހަރުގެ ތެރޭގައި ޓޯކޮށްފައިވާ އެއްޗެހި
ނައްތާލުމަށްޓަކައި ތިލަފުއްޓަށް ގެންދިޔަ ބައެއް ސައިކަލުތައް -- ފޮޓޯ/ ފުލުހުން
ގަވައިދާ ހިލާފަށް ޕާކްކޮށްފައިވާ ކަމަށް ބުނެ ފުލުހުންގެ ބެލުމުގެ ދަށަށް ގެންދިޔަ 500 އަށް ވުރެ ގިނަ ސައިކަލް ނައްތާލުމަށް ތިލަފުއްޓަށް ގެންގޮސްފިއެވެ.
ފުލުހުން މައުލޫމާތު ދިން ގޮތުގައި އަންގާރަ ދުވަހު ތިލަފުއްޓަށް ގެންދިޔަ އެ ހުރިހާ ސައިކަލަކީ ވެސް މިއަހަރުގެ ތެރޭގައި ފުލުހުންގެ ބެލުމުގެ ދަށަށް ގެންގޮސްފައިވާ ސައިކަލެވެ. އަދި އެ ސައިކަލްތައް ނައްތާލުމަށްޓަކައި ތިލަފުއްޓަށް ގެންގޮސްފައި ވަނީ އޭގެ ވެރިފަރާތުން 60 ދުވަހުގެ ތެރޭގައި ބަލާ ގޮސްފައިނުވާތީ ކަމަށް ވެސް ފުލުހުން މައުލޫމާތު ދީފައިވެއެވެ.
ނައްތާލުމަށްޓަކައި ތިލަފުއްޓަށް ގެންދިޔަ ބައެއް ސައިކަލުތައް -- ފޮޓޯ/ ފުލުހުން
ފުލުހުން ބުނީ އެ ސައިކަލްތައް ތިލަފުއްޓަށް ގެންދިޔައީ ތިން ބުރެއްގެ މަތިން ކަމަށެވެ. ނަމަވެސް ސައިކަލްތައް ނައްތާލަނީ ކޮންއިރަކުން ކަމެއް ފުލުހުން ނުބުނެއެވެ.
ފުލުހުންގެ މީޑިޔާ އޮފިޝަލް ވިދާޅުވި ގޮތުގައި ތިލަފުއްޓަށް ގެންގޮސްފައިވާ ސައިކަލްތަކުގެ ތެރެއިން ސައިކަލެއްގެ ވެރިފަރާތުން ބަލާ ގޮސްފި ނަމަ އެ ސައިކަލެއް އަދިވެސް ލިބޭނެ އެވެ. އެހެން ނަމަވެސް ސައިކަލް ދޫކުރާނީ އޭގެ ވެރިފަރާތުން ލިޔުންތައް ހިފައިގެން ޓޯޔާޑަށް ދިއުމުން ކަމަށް އޮފިޝަލް ވިދާޅުވިއެވެ.
ފުލުހުން ވަނީ މީގެ ކުރިން ވެސް މިގޮތަށް މަގުމަތިން ނަގާފައިވާ ވަރަށް އާ ކާރުތަކެއް ވެސް ނައްތާލާފައެވެ. އެ ތަކެތި ވެސް ނައްތާލާފައި ވަނީ ހަވާލުވާނެ ފަރާތެއް ނެތިގެން ކަމަށް ފުލުހުން ބުނެފައި ވެއެވެ. އޭގެ ތެރޭގައި ފަހުގެ ޒަމާނީ ކާރުތަކާއި ވެހިކަލްތައް ވެސް ހިމެނެއެވެ.
