ޔެލޯ އެލަރޓްގެ ވަގުތު ހަމަވާނީ މިރޭ 10:00ގައި
މިއަދުގެ ސެޓެލައިޓް ފޮޓޯއެއް
ބޯކޮށް ވާރޭ ވެހި، ގުގުރުމާއިއެކު ވާރޭ ވެހޭނެކަމަށް ލަފާކުރެވޭތީ ހުވަދު އަތޮޅާއި ފުވައްމުލަކާއި، އެ ދެއަތޮޅާއި ދެމެދުގެ ކަނޑުގެ ސަރަހައްދަސް ޔެލޯ އެލަރޓް ނެރެފިއެވެ.
މެޓް އޮފީހުން މިއަދު އިރު އޮއްސުނު ވަގުތު ނެރުނު އެލަރޓްގެ ވަގުތު ހަމަވާނީ މިރޭ 10:00 ގައެވެ.
ދެކުނުގެ ބައެއް ހިސާބުތަކަށް ޔެލޯ އެލަރޓް ނެރުނުއިރު، މެދުތެރެއާއި ދެކުނުގެ އެކިހިސާބަށް ވިއްސާރަކޮށް ގުގުރުން އެކަށީގެންވާކަމަށާއި ދެކުނުގެ ބައެއް ރަށްތަކަށް ބޯކޮށް ވާރޭވެހޭނޭކަމަށްވެސް ލަފާކުރެވޭކަމަށް މެޓް އޮފީހުން ބުނެފައިވެއެވެ. އަދި އުތުރުގެ ބައެއް ރަށްތަކަށް ކެރީގެ އަސަރުފޯރާނެއެވެ.
މެދުތެރޭގެ އަތޮޅުތަކަށް އިރުއުތުރުން ގަޑިއަކު 10 މޭލާ 18 މޭލާ ދެމެދުގެ ބާރުމިނުގައި، އަދި އެހެން ހިސާބުތަކަށް ވައިޖެހެމުން ދާނީ ގަޑިއަކު 5 މޭލާ 15 މޭލު ދެމެދުގެ ބާރުމިނުގައި ކަމަށާއި، ވިލާގަނޑުގައި ގަޑިއަކު ގާތްގަނޑަކަށް 35 މޭލަށް ވައިގަދަވާނެކަމަށް ލަފާކުރެވޭކަމަށް މެޓް އޮފީހުން ބުނެއެވެ.
މެދުތެރޭގެ އަތޮޅުތަކުގެ ކަނޑުތައް އާދައިގެ ވަރަކަށް ގަދަވާނެކަމަށް ލަފާކުރެވޭއިރު، އެހެން ހިސާބުތަކުގެ ކަނޑުތައް އާދައިގެ ވަރަކަށް މަޑުވެފައި، ވިލާގަނޑުގައި އާދައިގެވަރަކަށް ގަދަވާނެކަމަށްވެސް މެޓް އޮފީހުން ލަފާކުރެއެވެ.
އެންމެ ފަހުގެ ސެޓެލައިޓް ފޮޓޯތަކުން ފެންނަ ގޮތުގައި ރާއްޖޭގެ ދެކުނުގެ މައްޗަށް ބޯވިލާތައް ވަނީ ޖަމާވެފައެވެ.
