ސީރިއާގައި ހަނގުރާމަކުރަމުންދިޔަ ދިވެހި ޒުވާނަކު މަރުވެއްޖެ
ހދ. ނާވައިދޫއަށް ނިސްބަތްވާ 25 އަހަރުގެ ޒުވާނެއް
ސީރިއާގައި ދިވެހިންތަކެއް ހަރަކާތްތެރިވަނީ، ގިނަ އަދަދެއްގެ ދިވެހިން ހަނގުރާމައިގައި ބައިވެރިވަމުންދޭ
ސީރިއާގައި ހަނގުރާމަ ކުރަމުންދިޔަ ދިވެހި ޒުވާނަކު މަރުވެއްޖެ އެވެ.
މައުލޫމާތު ލިބޭ ގޮތުގައި މަރުވެފައިވަނީ ހދ. ނާވައިދޫއަށް ނިސްބަތްވާ، އުމުރުން 25 އަހަރުގެ ޒުވާނެކެވެ.
މިއަހަރުގެ ކުރީކޮޅު ރާއްޖެ ދޫކޮށް ސީރިއާއަށް ދިޔަ އެ ޒުވާނާ މަރުވިކަން އާއިލާއަށް އަންގާފައިވަނީ މިދިޔަ ހަފްތާގެ ތެރޭގައި ކަމަށް މައުލޫމާތު ލިބެއެވެ.
މައުލޫމާތު ލިބޭ ގޮތުގައި، އެ ޒުވާނާ މަރުވެފައިވަނީ އޭނާ އުޅެމުން ދިޔަ ސަރަހައްދަށް ވައިގެ މަގުން ދިން ހަމަލާއެއްގައެވެ.
ސީރިއާ އަށް ހަނގުރާމަ ކުރަމުންދާ ގިނަ ދިވެހިން ގުޅިފައިވަނީ އަލްގައިދާއާއި ގުޅިފައިވާ ޖަބްހަތް އަލް ނުސްރާ ނުވަތަ ނުސްރާ ފްރަންޓްއާ އެވެ.
ދިވެހި ސަރުކާރުން ބުނާ ގޮތުގައި ސީރިއާގައި ހަނގުރާމަ ކުރަމުންދަނީ 50 އެއްހާ ދިވެހިންނެވެ. އެހެން ނަމަވެސް، ބޭރުގެ އެކިއެކި އިދާރާތަކުން ލަފާކުރާ ގޮތުގައި 200 އާ ގާތްކުރާ އަދަދަކަށް ދިވެހިން ސީރިއާގައި ހަނގުރާމަ ކުރަމުންދެއެވެ.
ހަނގުރާމައަށް ދިޔަ ގިނަ ބައެއްގެ މައްޗަށް، އަނބުރާ ރާއްޖެ އައުމުން ވަނީ ދައުވާކޮށްފަ އެވެ. ރާއްޖެ ދޫކޮށް ބޭރުގެ ހަނގުރާމައެއްގައި ބައިވެރިވާން ދިއުމަކީ ޖިނާއީ ކުށެއް ކަމަށް ވަނީ ކަނޑައަޅާފައެވެ.
