އިންޑިއާގައި ތިބި ދިވެހިންނަށް ވިސާ ލިބުމުގައި ދަތިތަކެއް ކުރިމަތިވެއްޖެ

އިންޑިއާގައި ތިބި ދިވެހިންނަށް ވިސާ ލިބުމުގައި ދަތިތަކެއް ކުރިމަތިވެއްޖެ ކަމުގެ ރިޕޯޓްތައް ލިބެން ފަށައިފިއެވެ.

ރާއްޖެއެމްވީއަށް އެނގިފައިވާ ގޮތުގައި ވިސާ ލިބުމުގައި ދަތިތައް ކުރިމަތިވެފައި ވަނީ އިންޑިއާގައި ތިބި ދިވެހި ދަރިވަރުންގެ ބެލެނިވެރިންނަށެވެ. އެގޮތުން ރާއްޖެއެމްވީއާ ވާހަކަ ދެއްކި ބައެއް ފަރާތްތަކުން ބުނީ ޑިޕެންޑެންޓް ވިސާ އާކުރުމަށް އިންޑިއާގެ ފޮރިން ރަޖިސްޓްރޭޝަން އޮފީހަށް ދިޔުމުން އާކޮށްދޭން ދެކޮޅު ހަދާފައިވާ ކަމަށެވެ. އަދި ވިސާ ހޯދުމުގައި ވަރަށް ބޮޑަށް ދަތިތަކާ ކުރިމަތިވެފައިވާ ކަމަށާއި މިހާރު ކުރިންހާ ފަސޭހަ ނޫން ކަމަށް ވެސް ބައެއް ފަރާތްތަކުން ބުންޏެވެ.

ވިސާ ދިނުމަށް ދެކޮޅު ހަދައި، އިންޑިއާގެ ފޮރިން ރަޖިސްޓްރޭޝަން އޮފީހުން އެކި ބަހާނަތައް ދައްކާ ކަމަށާއި، އެގޮތުން ދިވެހިންނަށް ވިސާ ދިނުން މަޑުޖައްސާލާފައިވާކަން ސަރުކާރަށް އަންގާފައިވާ ކަމަށް ވެސް ބައެއް ފަރާތްތަކުން މައުލޫމާތު ދީފައި ވެއެވެ. ނަމަވެސް އެކަމާ ބެހޭ ގޮތުން ރަސްމީ އެއްވެސް ފަރާތަކުން މިހާތަނަށް އެއްވެސް އެއްޗެއް ހާމަކޮށްފައެއް ނުވެއެވެ.

މިކަމާއިގުޅޭ ގޮތުން އިންޑިއާގައި ހުންނަވާ ދިވެހި ސަފީރު ބަހެއް ލިބޭ ގޮތް ވަނީ ނުވެފައެވެ. ނަމަވެސް ސަފީރު އަހުމަދު މުހައްމަދު "މިހާރު އޮންލައިން" އަށް ވިދާޅުވެފައި ވަނީ ދިވެހިންނަށް ވިސާ ލިބުމުގައި ދަތިތަކެއް އުޅޭކަމުގެ ޝަކުވާ އެމްބަސީ އަށް ލިބިފައިވާ ކަމަށެވެ. އަދި ވިސާ ދިނުމުގެ އުސޫލަށް އެއްވެސް ބަދަލެއް އައިސްފައިވާކަން އަންގާފައިނުވާ ކަމަށް އޭނާ ވިދާޅުވެފައި ވެއެވެ.

ރާއްޖޭގައި ހުންނަ އިންޑިއާ އެމަބަސީގެ އޮފިޝަލަކު ވެސް ވިދާޅުވީ ވިސާ ދޭ އުސޫލަށް އެއްވެސް ބަދަލެއް ގެނެސްފައިނުވާ ކަމަށެވެ. ނަމަވެސް އެމްބަސީން މިހާތަނަށް ރަސްމީކޮށް އެއްވެސް އެއްޗެއް ހާމަކޮށްފައެއް ނުވެއެވެ.

ދިވެހިނަނަށް ވިސާ ލިބުމުގައި ދަތިތަކެއް ކުރިމަތިވެފައި ވަނީ ސަރުކާރުން ޗައިނާއާ އެކު ގާތް ގުޅުންތަކެއް ބާއްވަމުންދާ ދަނޑިވަޅެއްގައެވެ. އެގޮތުން ޗައިނާއާ އެކު މިނިވަން ވިޔަފާރީގެ އެއްބަސްވުމުގައި ސޮއިކޮށް، ޗައިނާއަށް ހާއްސަ އިނާޔަތްތަކެއް ދިނުމަށް ސަރުކާރުން ނިންމުމާ ގުޅިގެން އިންޑިއާ އިން ވަނީ ކަންބޮޑުވުން ފާޅުކޮށްފައެވެ.

އިންޑިއާގެ ހާރިޖިއްޔާއިން ބުރާސްފަތި ދުވަހު ބުނެފައި ވަނީ އިންޑިއާއިން ދިވެހިރާއްޖެ އިސްކުރާ ފަދައިން ދިވެހިރާއްޖެއިން އަބަދުވެސް އިންޑިއާ އިސް ކުރާނެ ކަމަށް އުންމީދު ކުރާ ކަމަށެވެ.

މީގެ ކުރިން 2012 ވަނަ އަހަރު އެމްޑީޕީގެ ވެރިކަން ބަދަލުވެ، ޖީއެމްއާރު އަތުން އެއާޕޯޓް އަތުލަން އޭރުގެ ސަރުކާރުން ނިންމުމާ ގުޅިގެން އިންޑިއާ އިން ވިސާ ދޫކުރުމުގެ އުސޫލްތަކަށް ބަދަލެއް ގެނައެވެ. އޭގެ ސަބަބުން ދިވެހިންނަށް ބޮޑެތި ދަތިތަކެއް ކުރިމަތިވެ އިންޑިއާ އެމްބަސީ ކައިރީގައި ދިގު ކިޔުތައް ހެދެނެވެ. އަދި ހިލަވެއްޔާއި ބައެއް ކާބޯ ތަކެއްޗަށް އިންޑިއާ އިން ދޫކޮށްފައިވާ ކޯޓާ ހުއްޓާލުމުން ވެސް ރާއްޖެ އަށް އެފަހަރު ބޮޑެތި ދަތިތަކެއް ކުރިމަތިވިއެވެ.

ދިވެހިންގެ ގިނަ ބަޔަކު މަތީ ތައުލީމު ހާސިލްކުރުމަށާއި ބޭސްފަރުވާގެ އެކި ކަންކަމުގައި އިންޑިއާގައި ދިރިއުޅޭ އިރު ތަފާތު ބޭނުންތަކުގައި ގިނަ އަދަދެއްގެ ދިވެހިން އިންޑިއާ އަށް ޒިޔާރަތް ވެސް ކުރެއެވެ. އަދި މި ދުވަސްވަރަކީ ރާއްޖޭގެ ސްކޫލްތައް ބަންދު ދުވަސްވަރަކަށް ވުމުން ޗުއްޓީ ހޭދަކުރުމަށާއި ބޭސްފަރުވާގެ ކަންކަމުގައި ގިނަ އަދަދެއްގެ ބަޔަކު އިންޑިއާ އަށް ދަތުރުކުރެއެވެ. މީގެ އިތުރުން ހިލަވެއްޔާއި ކާބޯތަކެތީގެ ގިނަ ބާވަތްތަކެއް އިންޑިއާ އިން އެތެރެކުރެއެވެ. މި މަގުތައް އިންޑިއާ އިން ބަންދުކޮށްލައިފި ނަމަ، ދުރު ހިސާބުތަކުން މި ތަކެތި ގެންނަންޖެހި ތަކެތީގެ އަގު އިންތިހާ އަށް އުފުލުމުގެ ފުރުސަތު ބޮޑެވެ.