އަދީބު ގެއަށް ބަދަލު ކޮށްދެވެން ނެތް ކަމަށް ކަރެކްޝަނުން އަންގައިފި
19 ޑިސެމްބަރު 2017 | އަންގާރަ 14:54ކަރެކްޝަނުން ބުނީ އަދީބު ގެއަށް ބަދަލުކުރަން ޖެހޭ ފަދަ ހާލަތެއް އާއިލާއަށް ނުދެއްކޭ ކަމަށް
އަދީބު މާލެ ގެނައުމަށް ފަހު އަނބުރާ ދޫނިދޫއަށް ގެންދިއުމަށް ލޯންޗަށް އަރުވަނީ
ދިގު މުއްދަތެއްގެ ޖަލު ހުކުމެއް ތަންފީޒް ކުރައްވަމުން ގެންދަވާ ކުރީގެ ނާއިބު ރައީސް އަހްމަދު އަދީބު ގޭ ބަންދަށް ބަދަލު ކޮށްދިނުމަށް އާއިލާއިން އެދުނު ނަމަވެސް އެކަން ކޮށްދެވެން ނެތް ކަމަށް މޯލްޑިވްސް ކަރެކްޝަނަލް ސާވީސް އިން އަންގައިފިއެވެ.
ކަރެކްޝަނަލް ސާވީސް އިން އެގޮތައް އަންގާފައި ވަނީ "ހިރަފުހުން ސަލާމަތްވެފައިވާ އަދި ބަރުތަކެތި އުފުލަން ނުޖެހޭ" ތަނަކަށް އަދީބު ބަދަލު ކުރަން ޑޮކްޓަރު ލަފާދީފައި ވާތީ އޭނާ ގެއަށް ބަދަލު ކޮށްދިނުމަށް އެދި ކަރެކްޝަނަށް ފޮނުވި ސިޓީގެ ޖަވާބުގައެވެ. ކަރެކްޝަންސް ސާވީސްގެ ޑެޕިއުޓީ ސުޕްރިޓެންޑެންޓް އޮފް ޕްރިޒަންސް އިބްރާހިމް ނާޝިދު ސޮއި ކުރައްވައި، އަދީބުގެ އާއިލާއަށް ފޮނުއްވި ސިޓީގައި ބުނެފައި ވަނީ އަދީބު އާއިލާއިން އެދިފައިވާ ހާލަތަކީ ދިވެހި ރާއްޖޭގެ ޖަލުތަކާއި ޕެރޯލްގެ ގާނޫނުގެ ދަށުން ޖަލު ނޫން އެހެން ތަނަކަށް ބަދަލު ކުރެވޭނެ ހާލަތެއް ނޫން ކަމަށެވެ.
އެ ސިޓީއާ ގުޅޭ ގޮތުން އަދީބުގެ އަނބިކަނބަލުން މަރިޔަމް ނަޝްވާ "ރާއްޖެއެމްވީ" އަށް ވިދާޅުވީ އަދީބު ގެއަށް ބަދަލުކޮށްދޭން އެދުނީ އަދީބު ބަހައްޓާފައި ހުންނަ ގޮޅިއަށް ހިރަފުސް ވަދެ އެމަނިކުފާނުގެ ލޮލަށް އިތުރަށް ގެއްލުންތަކެއް ވަމުންދާތީ އެ މާހައުލު ބަދަލު ކުރުމަށް ޑޮކްޓަރު ލަފާދިނުމާ ގުޅިގެންނެ ކަމަށެވެ. އަދި ބަރު ތަކެތި އުފުލުމަކީ އަދީބުގެ ހަށިގަނޑަށް މި ވަގުތު ފަސޭހަ ކަމަކަށް ނުވާއިރު ކޮންމެ ދުވަހަކު ވެސް ފާހަނާ ބޭނުންކުރާއިރު ފެން ބާލީދީ އުފުލަން ޖެހޭ ކަމަށް އަދީބުގެ އަނބިކަނބަލުން ވިދާޅުވިއެވެ.
އަދީބުގެ ސިއްހީ ހާލަތު ގޯސްވަމުންދާތީ އެމަނިކުފާނު ގޭ ބަންދަށް ބަދަލުކޮށްދިނުމަށް އެންމެ ފުރަތަމަ އާއިލާ އެދުނީ އަދީބު ބަލަހައްޓަމުންދާ ފުލުހުންގެ ކިބައިންނެވެ. ނަމަވެސް ކަރެކްޝަނުގައި އެދުނީ އެކަމާ މެދު ގޮތެއް ނިންމާނީ ކަރެކްޝަނުން ކަމަށް ފުލުހުން އަދީބުގެ އާއިލާއަށް އެންގުމުންނެވެ.
ނަޝްވާ ވިދާޅުވީ އަދީބާ މެދު ދައުލަތުން އަމަލު ކުރަމުންދަނީ ގާނޫނުތަކާ އެއްގޮތަށް ނޫން ކަމަށާއި ގޭ ބަންދަށް ބަދަލުކޮށް ނުދިނުމަށް ދައްކާފައި ވަނީ ގަބޫލުކުރެވޭ ހުއްޖަތެއް ނޫން ކަމަށެވެ.
ސްފަރުވާއަށް އަދީބު ރާއްޖެއިން ބޭރަށް ފޮނުވާނުދިނުމަށް ނިންމާފައިވާ މައްސަލަ ސިވިލް ކޯޓަށް ވެސް ވަނީ ހުށަހަޅާފައެވެ. އެ މައްސަަލަ ޝަރީއަތުން ބޭރުން ހައްލު ކުރެވޭތޯ ދަނީ މަސައްކަތްކުރަމުންނެވެ.
ހިރަފުހުން ސަލާމަތްކުރުމަށް ގޭ ބަންދަށް ބަދަލު ކުރެވޭ ހާލަތެއް ގާނޫނުގައި ނެތް ކަމަށް ކަރެކްޝަނުން ބުނެފައިވާއިރު ޖަލު މަރާމާތު ކުރުމަށް ކަމަށް ބުނެ ޖަލުގައި ތިއްބެވި ސިޔާސީ ބައެއް ބޭފުޅުން ކަރެކްޝަނުން ވަނީ ގެއަށް ބަދަލުކޮށްފައެވެ. އަދި ސިޔާސީ އެކި ބޭފުޅުން ބޭސްފަރުވާއަށް ރާއްޖެއިން ބޭރަށް ފޮނުވާފައިވެއެވެ.
