ރާއްޖެއަށް އިންވެސްޓަރުންގެ އިތުބާރެއް ނެތް: އުގެއިލް
ވޯލްޑް ބޭންކްގެ ތަފާސް ހިސާބުތަކުން ވެސް ރާއްޖޭގެ ހާލަތު އެނގޭ
ޕްރޮފެސަރ އުގެއިލް
ރާއްޖޭގައި ކޮރަޕްޝަން އިންތިހާއަށް އިތުރުވުމުގެ ސަބަބުން ރާއްޖެއާ މެދު އިންވެސްޓަރުން ކުރާ އިތުބާރު ގެއްލިފައިވާ ކަމަށް ޕްރޮފެސަރ އުގެއިލް ވިދާޅުވެއްޖެއެވެ.
ޕްރޮފެސަރ ހަސަން އުގެއިލް ކުރައްވާފައިވާ ޓްވީޓްގައި ވިދާޅުވެފައި ވަނީ މިނިވަން މުއައްސަސާތަކަށް އޮންނަ އިތުބާރު ރާއްޖޭގައި ގެއްލިފައިވާ އިރު ކޮރަޕްޝަނުގެ އަމަލުތައް އިތުރުވުމުގެ ސަބަބުން އިންވެސްޓަރުންގެ އިތުބާރު ވެސް އެއްކޮށް ގެއްލިފައިވާ ކަމަށެވެ.
ވޯލްޑް ބޭންކްގެ ޑުއިންގ ބިސްނަސް އިންޑެކްސް (ޑީބީއައި) އިން ރާއްޖެ ދަރަޖަކޮށްފައިވާ ގޮތުން ވެސް ރާއްޖޭގައި އިންވެސްޓަރުންނަށް ފަހި ފުރުސަތުތަކެއް ނެތްކަން އުގެއިލް ވަނީ ފާހަގަކުރައްވާފައެވެ. އެގޮތުން 2014 ވަނަ އަހަރު 95 ވަނައިގައި އޮތް އިރު 2017 ވަނަ އަހަރު 135 ވަނަ އަށް ވެއްޓުނުކަން އުގެއިލް ފާހަގަކުރެއްވިއެވެ.
ޕްރޮފެސަރ އުގެއިލް މިފަދައިން ވިދާލުވެފައިވާ އިރު އަންގާރަ ދުވަހު ދުބާއީގެ އިންވެސްޓްމެންޓް ފޯރަމްގައި ވާހަކަދައްކަވަމުން ނާއިބު ރައީސް އަބްދުﷲ ޖިހާދު ވިދާޅުވީ، އިގްތިސާދީ ގޮތުން މީގެ ކުރިން މާބޮޑު ކުރިއެރުންތަކެއް ހޯދާފައި ނުވާ ދާއިރާތައް ކަމުގައިވާ ކޮންސްޓްރަކްޝަން ދާއިރާ އާއި ރިއަލް އެސްޓޭޓްގެ އިތުރުން ޓްރާންސްޕޯޓް އަދި މާލީ ދާއިރާއަށް ރައީސް ޔާމީންގެ ސަރުކާރު ވެރިކަމަށް އައި ފަހުން ބޮޑު ކުރިއެރުމެއް ލިބިފައިވާ ކަމަށެވެ. ޖިހާދު ވިދާޅުވީ، ރާއްޖޭގެ އިގްތިސާދުގެ ތެރެއިން އިންވެސްޓް ކުރުމަށް ހުރި ދާއިރާތައް މިފަދަ ފޯރަމެއްގެ ތެރެއިން ވަރަށް ބޮޑަށް ސާފުވެގެންދާނެ ކަމަށެވެ. ރާއްޖެއަކީ ކިތަންމެ ކުޑަ ގައުމެއް ނަމަވެސް، އިންވެސްޓް ކުރުމަށް ފުރުސަތުތައް ވަރަށް ގިނަ ގައުމެެއް ކަމަށާއި މިއީ ރާއްޖޭގައި އިންވެސްޓްކުރުމަށް އެންމެ ރަނގަޅު ވަގުތު ކަމަށް ނާއިބު ރައީސް ވިދާޅުވެފައިއެވެ.
