އިންތިހާބާ ގުޅޭ ގޮތުން ގާސިމާ ބައްދަލުކުރުމަށް ޖަމީލާއި އަލީ ވަހީދު ޖަރުމަނަށް ވަޑައިގެންފި
18 ޑިސެމްބަރު 2017 | ހޯމަ 14:04އިންތިހާބާ ގުޅޭ ގޮތުން މީގެ ކުރިން އުމަރު ނަސީރާ އެކު ވެސް އެ ބޭފުޅުން މަޝްވަރާކޮށްފައިވޭ
ކުރީގެ ނާއިބު ރައީސް ޑރ. މުހައްމަދު ޖަމީލް އަހުމަދު އަދި އެމްޑީޕީގެ ޗެއަރޕާސަން އަލީ ވަހީދު
ރިޔާސީ އިންތިހާބާ ގުޅޭ ގޮތުން ޖުމްހޫރީ ޕާޓީގެ ލީޑަރު ޤާސިމް އިބްރާހިމާ ބައްދަލުކުރެއްވުމަށް ކުރީގެ ނާއިބު ރައީސް ޑރ. މުހައްމަދު ޖަމީލް އަހުމަދާއި، އެމްޑީޕީގެ ކުރީގެ ޗެއަރޕާސަން އަލީ ވަހީދު ޖަރުމަނު ވިލާތަށް ވަޑައިގެންފިއެވެ.
ރިޔާސީ އިންތިހާބާ ގުޅޭ ގޮތުން މީގެ ކުރިން، ކުރީގެ ހޯމް މިނިސްޓަރު އުމަރު ނަސީރާ އެކު ވެސް މި ދެ ބޭފުޅުން ވަނީ މަޝްވަރާތަކެއް ކޮށްފައެވެ. އަލީ ވަހީދާއި ޑރ. ޖަމީލް ޖަރުމަނު ވިލާތަށް ވަޑައިގެންފައިވާކަން ވަނީ ކަށަވަރުވެފަ އެވެ. ނަމަވެސް ދަތުރާ ގުޅޭ ގޮތުން ދެ ބޭފުޅުން ވެސް މީޑިއާއަށް އެއްވެސް އެއްޗެއް ހާމަކުރައްވާފައެއް ނުވެއެވެ.
އުމަރު ޖުމްހޫރީ ޕާޓީއަށް ސޮއިކުރައްވާފައި ވަނީ ވެސް އަލީ ވަހީދާއި، ޖަމީލާ އެކުގައި ބޭއްވެވި މަޝްވަރާތަކަށް ފަހު ޢެގެ ކުޑަ ދުވަސްކޮޅެއް ފަހުންނެވެ.
އިނގެރޭސި ސަރުކާރުގެ ސިޔާސީ ހިމާޔަތް ހޯދަވައިގެން ހުންނެވި ޖަމީލާއި އަލީ ވަހީދު ވެސް ކުރިން އިދިކޮޅު ހަރަކާތްތަކުގައި އުޅުއްވި ނަމަވެސް ފަހަކަށް އައިސް އެ ދެ ބޭފުޅުންގެ މާ ބޮޑު ދައުރެއް ފެނިގެން ގޮސްފައެއް ނުވެއެވެ. އެމްޑީޕީގެ ޗެއަރޕާސަންގެ މަޤާމުން އަލީ ވަހީދު އިސްތިއުފާދެއްވުމަށް ފަހު، އެ ޕާޓީގެ ހަރަކާތްތަކުގައި އެއްވެސް ވަރަކަށް ބައިވެރިވެވަޑައެއް ނުގަންނަވައެވެ. އަދި އެމްއޯޔޫގެ ލީޑަރުގެ ގޮތުގައި ހުންނެވި ޖަމީލް ވެސް އިދިކޮޅު ހަރަކާތްތަކުގައި ފާޅުގައި މަސައްކަތް ނުކުރައްވާތާ ދުވަސްކޮޅެއް ވަނީ ވެފައެވެ.
އިއްތިހާދުގައި ހިމެނޭ އެންމެ ބޮޑު ޕާޓީގެ ލީޑަރު މުހައްމަދު ނަޝީދު ވިދާޅުވެފައި ވަނީ އިއްތިހާދުން ނެރެން ވާނީ އެއް ކެނޑިޑޭޓެއް ކަމަށެވެ. އަދި އެއް ކެނޑިޑޭޓަކު ނެރުމުގެ މަޝްވަރާތައްކުރާ ޕާޓީތަކުން ކަމަށް އެމަނިކުފާނު ވިދާޅުވެފައެވެ. ނަމަވެސް އެ މަޝްވަރާތަކުން ކުރިމަގެއް ފެންނަ ކަމެއް ނުވަތަ ނޫން ކަމެއް ވެސް އެމަނިކުފާނު ހާމަކުރައްވާފައެއް ނުވެއެވެ.
އިއްތިހާދުގެ ބައެއް ޕާޓީތަކުގެ ލީޑަރުންގެ ވާހަކަތަކުން އެއިން ކޮންމެ ޕާޓީއަކުން ވެސް ކެނޑިޑޭޓަކު ނެރުމުގެ ވިސްނުމެއް ގެންގުޅޭކަން ހާމަވެއެވެ.
