ކްލެސިކޯއާ ހިސާބުން ލީގެ ނުނިމޭނެ: ވަލްވާޑޭ

ބާސެލޯނާ އަދި ރެއާލް މެޑްރިޑް ކުޅޭ 'އެލް ކްލެސިކޯ' މެޗާއި ހިސާބުން ލީގު ނުނިމޭނެ ކަމަށް ބާސެލޯނާގެ ކޯޗު އާނެސްޓޯ ވަލްވާޑޭ ބުނެފިއެވެ.

އަންނަ ހަފްތާގައި މި ދެ ޓީމުގެ ކުރިމަތިލުމެއް ފެނިގެންދާއިރު ބާސާ އޮތީ ރެއާލްއަށް ވުރެ 11 ޕޮއިންޓް ކުރީގައެވެ. އެހެން ނަމަވެސް ކްލަބް ވޯލްޑް ކަޕްއަށް ފުރުސަތު ދިނުމުގެ ގޮތުން ރެއާލްއިން ލަލީގާގައި ކުޅެފައިވަނީ ބާސާއަށް ވުރެ އެއް މެޗު މަދުންނެވެ. އަންނަ ހަފްތާގައި ކުޅޭ މެޗުން ބާސާ މޮޅުވެއްޖެނަމަ ލަލީގާގެ ޕޮއިންޓް ތާވަލުގައި ބާސާއަށް ރެއާލްގެ މައްޗަށް 14 ޕޮއިންޓްގެ ލީޑެއް ލިބިގެންދާނެއެވެ.

އަމިއްލަ ދަނޑުގައި 4-0 ގެ ނަތީޖާއަކުން ޑިޕޯޓިވޯ ބަލިކުރި މެޗަށް ފަހު ނޫސްވެރިންނާ ވާހަކަ ދައްކަމުން ވަލްވާޑޭ ބުނީ ކްލެސިކޯއިން މޮޅިވި ނަމަވެސް ލަލީގާގެ ތަށި ލިބުނު ކަމަކަށް ގަބޫލް ނުކުރާނެ ކަމަށެވެ. މިއީ ދިގު ސީޒަނެއް ކަމަށާއި މި ދަނޑިވަޅުގައި މެޗަކުން މޮޅުވުމުން ތަށި ލިބުނު ކަމަށް ގަބޫލުކުރުމަކީ މޮޔަ ކަމެއް ކަމަށް ވަލްވާޑޭ ހާމަކުރިއެވެ.

ރެއާލްއާ ދެކޮޅަށް ކުޅޭ މެޗަކީ އުނދަގޫވާނެ މެޗެއްކަން ފާހަގަކުރަމުން ވަލްވާޑޭ ބުނީ ރެއާލްއާ ދެކޮޅަށް ނުކުންނަން ބާސާގެ ކުޅުންތެރިން ތިބީ ކެތްމަދުވެފައި ކަމަށާއި ހަފްތާއެއްގެ މަސައްކަތަށް ފަހު އެ މެޗާ ކުރިމަތިލާނީ މެޗުން މޮޅުވުމުގެ އުއްމީދުގައި ކަމަށެވެ.

ޑިޕޯޓިވޯއާ ދެކޮޅަށް ކުޅުނު މެޗުގައި ބާސާގެ ފޯވާޑް ޕަކޯ އަލްކޭސާއަށް އަނިޔާވެ ތިން ހަފްތާއަށް ކުޅުމާ ދުރަށް ދާން ވަނީ ޖެހިފައެވެ. މިކަމާ ގުޅޭ ގޮތުން ވާހަކަ ދައްކަމުން ވަލްވާޑޭ ބުނީ އެއީ ޓީމަށް ލިބޭ ހީނަރުކަމެއް ކަމަށާއި ރެއާލް ކަހަލަ ވަރުގަދަ ޓީމަކާއި ދެކޮޅަށް ނުކުންނައިރު ހުރިހާ ކުޅުންތެރިން ވެސް ފިޓުކޮށް ތިބުމަކީ މުހިންމު ކަމެއް ކަމަށެވެ.

މި މެޗުގައި ބާސާގެ ކެޕްޓަން އިނިއެސްޓާއަށް ވެސް ފުރިހަމަ 90 މިނެޓު ކުޅުމުގެ ފުރުސަތު ދީފައިނުވާއިރު ވަލްވާޑޭ ބުނީ އިނިއެސްޓާ ދަނޑުން ބޭލީ އޭނާއަށް އަނިޔާވެދާނެ ކަމުގެ ބިރު އޮތުމާއި ގުޅިގެން އޭނާއަށް އަރާމުކުރުމުގެ ފުރުސަތު ދިނުމުގެ ގޮތުން ކަމަށެވެ. މި މެޗުގައި އިނިއެސްޓާ ކުޅުނު ބައިގައި އޭނާ މޮޅު ކުޅުމެއް ދައްކާފައި ވާއިރު ވަލްވާޑޭ ބުނީ އިނިއެސްޓާ ފަދަ ކުޅުންތެރިޔަކު ޓީމުގައި ހުރުމަކީ ލިބޭ ވަރަށް ބޮޑު ހިތްހަމަޖެހުމެއް ކަމަށެވެ.

މިވަގުތު އަނިޔާގައި ހުރި ބާސާގެ ފޯވާޑް އުސްމާން ޑެމްބެލޭއަށް އެލް ކްލެސިކޯގައި ނުކުޅެވޭނެކަން ވަލްވާޑޭ ވަނީ ކަށަވަރު ކޮށްދީފައެވެ. އެގޮތުން ވަލްވާޑޭ ބުނީ ޑެމްބެލޭ ކުޅުމުގެ ތެރެއަށް އެނބުރި އަންނާނީ ޖެނުއަރީ މަހު ކަމަށާއި އޭގެ ކުރިން އޭނާ ކުޅުމުގެ ތެރެއަށް ގެނެސްފިނަމަ ލިބޭ ގެއްލުން މާ ބޮޑުވާނެ ކަމަށެވެ.

މި މެޗާއި ކުރިމަތިލާއިރު މި ސީޒަނުގައި ބާސާ ކުޅުނު އެއްވެސް މެޗަކުން ބަލިވެފައިނުވާއިރު އެ ޓީމު މިވަގުތު އޮތީ 42 ޕޮއިންޓާއެކު ލަލީގާގެ އެއްވަނައިގައެވެ. ރެއާލް އޮތީ 31 ޕޮއިންޓާއެކު ތާވަލުގެ ހަތަރު ވަނައިގައެވެ. މި ދެ ޓީމުގެ 235 ކުރިމަތިލިމެއް މީގެކުރިން ފެނިފައިވާއިރު އޭގެ ތެރެއިން 95 މެޗުން މޮޅުވެފައިވަނީ ރެއާލް މެޑްރިޑްއެވެ. ބާސާ 91 މެޗުން މޮޅުވެފައިވާއިރު ބާކީ 49 މެޗު ނިމިފައިވަނީ އެއްވަރުވެގެންނެވެ.

މި ދެ ޓީމު ބައްދަލުކުރާ ފޯރިގަދަ މެޗު ކުޅުމަށް ހަމަޖެހިފައިވަނީ މި މަހުގެ 23 ވަނަ ދުވަހު ރެއާލްގެ ސެންޓިއާގޯ ބާނެބައު ސްޓޭޑިއަމްގައެވެ.