ނަތަންޔާހޫ ޖަލަށް ލުމަށް ގޮވާލާ އިސްރާއީލުގައި މުޒާހަރާކުރަނީ!
17 ޑިސެމްބަރު 2017 | އާދީއްތަ 16:47ނަތަންޔާހޫގެ މައްޗަށް ކޮރަޕްޝަންގެ 2 ތުހުމަތެއް ވަނީ ކުރެވިފައި
އިސްރާއިލްގެ ވެރިރަށް ތެލްއަވީވްގައި ބޮޑުވަޒީރު ނަތަންޔާހޫއާއި ދެކޮޅަށް މުޒާހަރާކުރަނީ
ކޮރަޕްޝަންގެ އަމަލުތަކެއް ހިންގެވިކަމަށް ތުހުމަތުކުރެވިފައިވާ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ޖަލަށް ލުމަށް ގޮވާލައި، އިސްރާއީލުގެ އެކި ކަންކޮޅުތަކުގައި މުޒާހަރާކުރަން ފަށައިފިއެވެ.
ވެރިރަށް ތެލްއަވީވްއާއި އެހެން ބައެއް ބޮޑެތި ރަށްރަށުގައި އެތައް ހާސް ބަޔަކު ނަތަންޔާހޫއާ ދެކޮޅަށް މުޒާހަރާއަށް ނިކުމެފައިވާއިރު، މުޒާހަރާ މީހުން ބުނަމުންދަނީ "ނަތަންޔާހޫ ޖަލަށް ލާން ޖެހޭ" ކަމަށާއި، "ނަތަންޔާހޫ އަކީ އިސްރާއީލަށް ހުރި ލަދެއް" ކަމަށެވެ. ހޮނިހިރު ދުވަހު ފެށުނު މުޒާހަރާތަކަކީ ނަތަންޔާހޫއާ ދެކޮޅަށް އިސްރާއީލުގައި އެއް މަސްތެރޭ ބޭއްވި މިފަދަ ތިންވަނަ ބޮޑު މުޒާހަރާއެވެ. ވެރިރަށް ތެލްއަވީވް ފިޔަވައި މުޒާހަރާ ބޭއްވި އެހެން ރަށްތަކުގެ ތެރޭގައި ހައިފާ، ޤުދުސް، އަޝްކެލޯން އަދި އަޝްދޯދް ހިމެނެއެވެ.
ނަތަންޔާހޫއާއި ދެކޮޅަށް ކުރެވޭ ތުހުމަތުތަކަށް އޭނާ ދެކޮޅު ހައްދަވާއިރު، މި ތުހުމަތުތަކާއި ގުޅިގެން ކުރިއަށް ގެންދާ ތަހުޤީޤުގައި މިދިޔަ ހަފްތާގައި ނަތަންޔާހޫއާއި 7 ވަނަ ފަހަރަށް ފުލުހުން ވަނީ ސުވާލުކޮށްފައެވެ. ނަތަންޔާހޫ ވިދާޅުވަނީ މިއީ ސިޔާސީ ގޮތުން އޭނާގެ އަގު ވައްޓާލަން އިދިކޮޅު ފަރާތްތަކުން ކުރާ ކަމެއްކަމަށެވެ.
އިސްރާއީލުގެ މީޑިއާ ރިޕޯޓްތައް ބުނާ ގޮތުން ނަތަންޔާހޫ އާއި ދެކޮޅަށް ރަސްމީކޮށް ދައުވާކުރެވޭ ވަރަށް މިހާރު ވަނީ ހެކި ލިބިފައެވެ.
ނަތަންޔާހޫގެ މައްޗަށް ތުހުމަތުކުރެވެނީ މުއްސަނދި ސަޕޯޓަރުންގެ އަތުން ރިޝްވަތު ނެންގެވި ކަމަށާއި، މަޤާމުގެ ނުފޫޒު ބޭނުން ކުރައްވައިގެން އޭނާއަށް ތާޢީދުކުރާ ނޫހަކަށް ފައިދާތަކެއް ހޯއްދަވައިދެއްވިކަމަށެވެ.
