ކްރިމިނަލް ކޯޓް ވެސް ރިސެސްއަށް ހިނގައްޖެ އެވެ.
ކްރިމިނަލް ކޯޓްގެ އިސް ގާޒީ އާދަމް އާރިފް ވިދާޅުވީ އެ ކޯޓް ރިސެސްއަށް ދިޔައީ އިއްޔެއިން ފެށިގެން ޑިސެމްބަރު މަހުގެ ނިޔަލަށް ކަމަށެވެ. ރިސެސް އަށް ފަހު ކޯޓްގެ މައްސަލަތައް ފުރިހަމަ އަށް ފަށާނީ ޖެނުއަރީ 2 ގަ އެވެ.
ރިސެސްގެ މުއްދަތުގައި އާންމު އުސޫލުން ޝަރީއަތްތައް ކުރިއަށް ނުގެންދިޔަ ނަމަވެސް، ހައްޔަރުކޮށްފައިވާ މީހުންގެ ބަންދުގެ މުއްދަތާ ގުޅޭ މައްސަލަތަކާއި ބޮޑެތި މައްސަލަތައް ކުރިއަށް ގެންދާނެ އެވެ. އަދި އިދާރީ މަސައްކަތްތައް ވެސް ކުރާނެ ކަމަށް އެ ކޯޓުން ބުންޏެވެ.
"ރިސެސްގެ ތެރޭގައި ބައެއް މައްސަލަތައް ހިންގަން ބޮޑެތި މައްސަލަތައް. މިސާލަކަށް މަރުގެ މައްސަލަތައް، ހައްސާސީ މައްސަލަތައް. މުޖުތަމައުގެ މަސްލަހަތާ ގުޅުން އޮތް ބޮޑެތި މައްސަލަތައް،" ގާޒީ އާދަމް އާރިފް ވިދާޅުވި އެވެ.
ރިސެސްގެ މުއްދަތުގައި ބަލާ ބޮޑެތި މައްސަލަތަކުގެ ތެރޭގައި ސިޔާސީ މައްސަލަތައް ނުހިމެނެ އެވެ.
އަހަރަކު ދެ ފަހަރު ކޯޓްތައް ރިސެސްއަށް ދެ އެވެ. އެގޮތުން ޖޫން މަހާއި ޑިސެމްބަރު މަހުގެ ވަކި މުއްދަތެއްގައި ކޯޓުތައް އޮންނަނީ ރިސެސްގަ އެވެ. ކްރިމިނަލް ކޯޓު ރިސެސްއަށް ދިޔައިރު ސިވިލް ކޯޓާއި ޖުވެނައިލް ކޯޓު ވެސް މިހާރު އޮތީ ރިސެސްގަ އެވެ. އަދި ސުޕްރީމް ކޯޓް ވެސް ވަނީ ރިސެސްއަށް ގޮސްފަ އެވެ.
