ރެނާޓޯ ސަންޗޭޒް އަނބުރާ ހޯދުމަށް ބަޔާން އިން މަސައްކަތް ފަށައިފި

ލޯން އެއްބަސްވުމެއްގެ ދަށުން ސްވަންސީ ސިޓީއަށް ދޫކޮށްފައިވާ ރެނާޓޯ ސަންޗޭޒްގެ އެއްބަސްވުމުގެ މުއްދަތު ކުރުކޮށް، އޭނާ އަނބުރާ ބަޔާން މިއުނިކަށް ގެންނަން އެ ކްލަބުން މަސައްކަތް ފަށައިފިކަމަށް ރިޕޯޓްތައް ބުނެފިއެވެ.

"މެއިސް ފުޓްބޯލް" ނަމަކަށް ކިޔާ މަޖައްލާއަކުން ބުނީ ލޯން އެއްބަސްވުމެއްގެ ދަށުން މިހާރު ސްވަންސީ ސިޓީއަށް ކުޅެމުން އަންނަ ރެނާޓޯ ސަންޗޭޒްގެ އެއްބަސްވުން ކުރުކޮށް، އަންނަ ޖެނުއަރީ ޓްރާންސްފާއަށް އޭނާ ބަޔާން އަށް ގެންނަން އެ ކްލަބުން މަސައްކަތްކުރަމުން އަންނަ ކަމަށެވެ.

ރިޕޯޓްތައް ބުނާގޮތުން ސްވަންސީގައި ރެނާޓޯ ސަންޗޭޒް އަށް ރަނގަޅު ކުޅުމެއް ނުދެއްކޭތީ، އޭނާ އަނބުރާ ބަޔާންއަށް ދިޔުމަށް ވަނީ އެދިފައެވެ. އެހެންނަމަވެސް މިކަމާ ގުޅިގެން އަދި އެއްވެސް ރަސްމީ ބަހެއް ނުލިބެއެވެ.

އޭސީ މިލާންގެ އިތުރުން ދުނިޔޭގެ ނަން މަޝްހޫރު ގިނަ ކްލަބްތަކުން އަންނަނީ ރެނާޓޯ ސަންޗޭޒް ހޯދުމަށް މަސައްކަތްކުރަމުންނެވެ. އޭގެ ތެރޭގައި ޔުވަންޓަސްވެސް ހިމެނެއެވެ.

ސަންޗޭޒް ބަޔާން އަށް ބަދަލުވީ މިދިޔަ އަހަރުގެ މެއި މަހު، ފަސް އަހަރު ދުވަހުގެ އެއްބަސްވުމެއްގެ ދަށުން 35 މިލިއަން ޕައުންޑަށެވެ. އެހެންކަމުން އޭނާގެ އެއްބަސްވުން ހަމަވާނީ 2021 ވަނަ އަހަރެވެ.

ބެންފީކާ އިން ކެރިޔަރު ފެށި އުމުރުން އެންމެ 20 އަހަރުގެ ސަންޗޭޒް އަންނަނީ ޒުވާން އުމުރުގައި މޮޅު ކުޅުމެއް ދައްކަމުންނެވެ. އެގޮތުން މިދިޔަ ސީޒަނުގައި އޭނާ ވަނީ ބަޔާނަށް 26 މެޗު ކުޅެފައެވެ.

މި ސީޒަނުގައި ސްވަންސީ އަށް ލޯން އެއްބަސްވުމެއްގެ ދަށުން ބަދަލުވެ ރެނާޓޯ ސަންޗޭޒް ވަނީ އެ ކްލަބަށް 10 މެޗު ކުޅެފައެވެ.