ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އަހުމަދު ފާރިސް މައުމޫން ޖަލުން މިނިވަންނުކޮށް ބޭއްވުމަކީ ސަރުކާރަށް ހެދޭ ވަރަށް ބޮޑު ގޯހެއް ކަމަށް މަޑުއްވަރީ ދާއިރާގެ މެންބަރު މުހައްމަދު އަމީތު ވިދާޅުވެއްޖެއެވެ.

އިސްލާހީ ހަރަކާތުގައި މަސައްކަތް ކުރައްވާ ރައްޔިތުން މަޖިލީހުގެ މެމްބަރުން ހ. ތެމާގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އަމީތު ވިދާޅުވީ ފާރިސް ދޫ ދެއްވަފާނެ ކަމަށް ހީކޮށް، ފަހަތަށް ޖެހިވަޑައިގަންނަވާނެ ކަމަށް ބަލައި، ޖަލުން މިނިވަންނުކޮށް ބޭއްވުމަކީ ސަރުކާރަށް ހެދޭ ވަރަށް ބޮޑު ގޯހެއް ކަމަށެވެ. އަދި ފާރިސް ހުންނެވީ ވަރަށް ހިތްވަރާއި އަޒުމާއި ސާބިތުކަން މަތީ ކަމަށް އަމީތު ވިދާޅުވިއެވެ.

މި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައްޔިތުންގެ މަޖިލީހުގެ ވިލިނގިލީ ދާއިރާގެ މެންބަރު ސައުދު ހުސައިން ވިދާޅުވީ ފާރިސް ބަންދުގައި ހުންނަވާތާ 150 ދުވަސް ވެފައިވާއިރު ނުކުރެވޭ ޝަރީއަތެއްގެ މައްޗަށް ހިތުހުރި ގޮތަކަށް ސިޔާސީ ގޮތުން މޯލްޑިވްސް ޕޮލިސް ސާރވިސަސް އިން ތަހުގީގު ކުރުމަށް ފަހު ޕްރޮސެކިއުޓަރ ޖެނެރަލް ގާނޫނީ ހުދޫދުގެ ތެރެއަށް ބެލުމެއް ނެތި، ހަމަހަމަކަން ގެއްލޭ ގޮތަށް ޕްރޮސެކިއުޓް ކޮށްގެން މިއަދު ރާއްޖޭގެ ކޯޓުތަކުގައި ފާރިސްގެ ޝަރީއަތް ހިނގަމުންދާ ގޮތް ހުރިހާ ރައްޔިތުންނަށް ވެސް ވަރަށް ސާފުކޮށް ފެނިގެންދާނެ ކަމަށެވެ.

މީގެ އިތުރުން ނޫސްވެރިންގެ ބައްދަލުވުމަގައި ހއ. ދިއްދޫ ދާއިރާގެ މެމްބަރު އަބްދުލް ލަތީފް ވިދާޅުވީ ރައިސުލް ޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމުގެ ސަރުކާރުގެ އަނިޔާވެރިކަމާ ދެކޮޅަށް ފާޅުގައި ފާރިސް މަސައްކަތް ކުރެއްވި ކަމަށާއި ސަރުކާރުން ހިންގާ ކޮރަޕްޝަނާއި ފަސާދަ ހުއްޓުވުމަށް ހިތްވަރާ އެއްކޮށް މަސައްކަތް ކުރައްވާފައިވާ ކަމަށެވެ.

ނޫސްވެރިންގެ ބައްދަލުވުމުގައި ރައްޔިތުންގެ މަޖިލީހުގެ މެމްބަރުން ވަނީ މި ސަރުކާރުން ކަންތައްތައް ކުރަމުންދާ ގޮތަށް ވަރަށް ބޮޑަށް ފާޑުވިދާޅުވެފައެވެ.

އެގޮތުން ނޮޅިވަރަމް ދާއިރާގެ މެންބަރު ހުސައިން އަރީފް ވިދާޅުވީ ރައްޔިތުންގެ ފައިސާ މި ސަރުކާރުގެ އިސްވެރިން ނަހަމަ ގޮތުގައި ބޭނުން ކުރަމުންދާ ކަމަށާއި ކޯޓުތަކުން ނިންމާ ނިންމުންތައް އަދުލުވެރިން ނޫން ކަމަށެވެ. އަދި ހުރިހާ ރައްޔިތުން ވެސް މި އަނިޔާވެރި ވެރިކަމާ ދެކޮޅަށް އަޑު އުފުލުމަށް އަރީފް ވަނީ ގޮވާލައްވާފައެވެ.

ފާރިސް އަށް ނުހައްގުން އަނިޔާ ލިބެމުންދާތީ މި ނޫސްވެރިންގެ ބައްދަލުވުމުގައި އިސްލާހަށް މަސައްކަތް ކުރައްވާ ރައްޔިތުން މަޖިލީހުގެ މެމްބަރުން ވަނީ ކަންބޮޑުވުން ފާޅުކޮށްފައެވެ. އަދި ހުރިހާ މެމްބަރުން ވެސް ސާބިތުކަމާ އެކީ ފާރިސްއާ އެކު މަސައްކަތް ކުރައްވާނެކަން ވަނީ ވިދާޅުވެފައެވެ.

ފާރިސް މައުމޫން ބަންދުގައި ހުންނަވާތާ 150 ދުވަސް ވެފައިވާއިރު، އޭނާ މިނިވަންކުރުމަށް އެކި ފަރާތްތަކުން ވަނީ ސޯޝަލް މީޑިއާ މެދުވެރިކޮށް ސަރުކާރަށް ގޮވާލާފައެވެ.