މިނިސްޓްރީ އޮފް އެޑިއުކޭޝަނާއި އެމިނިސްޓްރީގެ ދަށުން ހިންގާ ތަންތަނުން 2015 ވަނަ އަހަރު ބަލައިގެންފައިވާ ފައިސާގެ ޢަދަދު ތަކުގެ ސައްޙަކަން ކަށަވަރު ނުވާކަމާއި 12 މިލިއަނަށްވުރެ ގިނަ ރުފިޔާ މަދުކަން ފަޅާ އަރައިފިއެވެ.

އެކަން ފަޅާއެރީ އޮޑިޓަރ ޖެނެރަލް ހަސަން ޒިޔާތު ނެރުއްވި އެޑިއުކޭޝަން މިނިސްޓްރީގެ އޮޑިޓް ރިޕޯޓުންނެވެ.

އޮޑިޓަރ ޖެނެރަލް ނެރުއްވާފައިވާ އެޑިއުކޭޝަން މިނިސްޓްރީގެ 2015 ވަނަ އަހަރުގެ މާލީ އޮޑިޓް ރިޕޯޓުގައި ވިދާޅުވެފައިވަނީ އެމިނިސްޓްރީއާއި އެމިނިސްޓްރީގެ ދަށުން ހިންގާ އެކިއެކި ސްކޫލްތަކާއި އިދާރާތަކުގެ މާލީ ބަޔާންތަކުގައި ދައުލަތުގެ އާމްދަނީގެ ގޮތުގައި ބަލައިގަތް ފައިސާކަމަށް ހިމަނާފައިވާ ޢަދަދުތަކާއި ފިނޭންސް މިނިސްޓްރީގެ ޕަބްލިކް އެކައުންޓް ސިސްޓަމްގެ ޖެނެރަލް ލެޖަރއިން ދައްކާ ޢަދަދުތައް ދިމާ ނުވާ ކަމަށެވެ. އެގޮތުން މިނިސްޓްރީގެ ކޮންސޮލިޑޭޓް ކޮށްފައިވާ މާލީ ބަޔާންތަކުގައި ދައުލަތުގެ އާމްދަނީގެ ގޮތުގައި ބަލައިގަތް ފައިސާގެ ގޮތުގައި ހިމަނާފައިވާ 26536246 (ސައްބީސް މިލިއަން ފަސް ސަތޭކަ ތިރީސް ހަ ހާސް ދުއިސައްތަ ސާޅީސް ހައެއް) ރުފިޔާއަކީ ޖެނެރަލް ލެޖަރއިން ދައްކާ ޢަދަދަށްވުރެ 12987289 (ބާރަ މިލިއަން ނުވަ ސަތޭކަ އަށްޑިހަ ހަތް ހާސް ދުއިސައްތަ އަށްޑިހަ ނުވައެއް) ރުފިޔާ މަދު އަދަދެއްކަން ފާހަގަ ކުރެވިފައިވާ ކަމަށް އޮޑިޓަރ ޖެނެރަލް ވަނީ ވިދާޅުވެފައެވެ.

އޮޑިޓަރ ޖެނެރަލް ވިދާޅުވީ އެހެން ދިމާވެފައިވަނީ، އަތޮޅު ތެރޭގެ ބައެއް ސްކޫލްތަކުން ދައުލަތުގެ އާމްދަނީ ފައިސާގެ ގޮތުގައި ޕަބްލިކް ބޭންކް އެކައުންޓަށް ޖަމާކޮށްފައިވާ ފައިސާ އެސްކޫލްތަކުގެ މާލީ ބަޔާންތަކުގައި ހިމަނާފައި ނުވާތީކަން ފާހަގަ ކުރައްވާ ކަމަށެވެ. އަދި އެހެންވުމުގެ ސަބަބުން މިނިސްޓްރީގެ ކޮންސޮލިޑޭޓް ކޮށްފައިވާ މާލީ ބަޔާންތަކުގައި ދައުލަތުގެ އާމްދަނީގެ ގޮތުގައި ހިމަނާފައިވާ 26536246 (ސައްބީސް މިލިއަން ފަސް ސަތޭކަ ތިރީސް ހަ ހާސް ދުއިސައްތަ ސާޅީސް ހައެއް) ރުފިޔާއަކީ މިނިސްޓްރީ އޮފް އެޑިއުކޭޝަންއިން ދައުލަތުގެ އާމްދަނީގެ ގޮތުގައި އަހަރުތެރޭ ބަލައިގަނެ، ޖަމާކޮށްފައިވާ ފައިސާގެ ސައްޙަ ޢަދަދުކަން ކަނޑައެޅެން ނެތްކަމަށް އޮޑިޓަރ ޖެނެރަލް ހަސަން ޒިޔާތު ވަނީ ވިދާޅުވެފައެވެ.

ކަން މިހެން ހުރިނަމަވެސް މީހަކާމެދު ފިޔަވަޅެއް އަޅާކަށް އޮޑިޓަރ ޖެނެރަލް ލަފާއަރުވާފައެއް ނުވެއެވެ. އެގޮތުން އިސްލާހް ކުރަން ދެއްވާފައިވާ ލަފާގައި ވިދާޅުވެފައިވަނީ މާލީ ބަޔާން ތައްޔާރު ކުރުމުގެ މަރުޙަލާގައި، މިނިސްޓްރީ އޮފް ފިނޭންސް އެންޑް ޓްރެޜަރީ އާއިއެކު މަޝްވަރާކޮށް، މާލީ ހިސާބުތަކަށް ގެންނަންޖެހޭ އިސްލާހްތައް ފާހަގަކޮށް، އެކަންކަން ރަނގަޅު ކުރުމަށާއި، މާލީ ބަޔާންތައް ތައްޔާރު ކުރުމުގެ ކުރިން މިނިސްޓްރީގެ ހިސާބުތައް ޕަބްލިކް އެކައުންޓިންގ ސިސްޓަމްގެ ރެކޯޑްތަކާ ރިކޮންސައިލް ކުރުމަށެވެ.