ޝަޝީ ކަޕޫރު :އޭނާ އަށް ބޮލީވުޑަށް ވަދެވުނު ގޮތް ވަނީ ކިޔާދީފައި

އިންޑިއާގެ ގިނަބައެއްގެ ލޯބި ލިބިފައިވާ ފިލްމީތަރި ޝަޝީ ކަޕޫރު މަރުވެފައިވަނީ މިދިޔަ ހޯމަދުވަހުގެ ހެނދުނުގައެވެ.

ޝަޝީ މަރުވެފައިވަނީ ކިޑްނީގެ ބައްޔަށް ފަރުވާ ކުރަމުންދަނިކޮށް އިންޑިއާގެ ހޮސްޕިޓަލެއް ކަމަށްވާ މުމްބާއީގެ ކޮކިލަބެން ހޮސްޕިޓަލުގައި ފަރުވާ ދެމުންދަނިކޮށެވެ.

އޭނާ މަރު ވެގެންދިޔައީ އެތައް ބަޔަކަށް ސިހުމެއް ގެނުވި ކަމަކަށެވެ. އޭނާގެ ޖަނާޒާގައި ވަނީ ފިލްމީދާއިރާގައި ހަރަކާތްތެރިވާ އެތަށް ފަންނާނުންނެއް ބައިވެރިވެފައެވެ.

ބޮލީވުޑްގެ ޚަބަރުތައް ގެނެސްދޭ ނޫހެއް ކަމަށްވާ ޕިންކް ވިލާއިން ވަނީ ޝަޝީ ކަޕޫރު ކުރިން ދީފައިވާ އިންޓަވިއު ގެނެސްދީފައެވެ. އެވީޑިއޯގައި ޝަޝީ ބުނެފައިވަނީ އޭނާގެ ފިލްމީ ކެރިއާ އެންމެ ފުރަތަމަ ފަށާފައިވަނީ ކުޑަކުއްޖެއްގެ ރޯލުން ކަމަށެވެ. އޭނާ ކުޑަކުއްޖެއްގެ ރޯލު ކުޅެފައިވަނީ ރާޖް ކަޕޫރުގެ "އާގް"(1948)، "އާވާރާ"(1951) އިން ކަމަށް ޝަޝީ އެ ވީޑިއޯގައި ވަނީ ބުނެފައެވެ.

ޝަޝީ ބުނެފައިވަނީ އޭނާ ގެ އުމުރުން 20 އަހަރާއި 21 އަހަރު ވުމުން ފިލްމުތަކުގެ ލީޑްރޯލުން ޖާގަ ލިބުނު ކަމަށެވެ. އޭގެ ފަހުން 1950 ވަނަ އަހަރު އޭނާ ފިލްމު ޑައިރެކްޓް ކުރަން ފެށި ކަމަށް އެ އިންޓަވިއުގައި ޝަޝީ ވަނީ ބުނެފައެވެ.

ޝަޝީ އާއި އޭނާގެ އަންހެނުން ޖެނިފާ ކެންޑަލް ދެމީހުން ވެގެން ޕްރިތްވީ ތިއޭޓަރ ނަމުގައި ސިނަމާއެއް އުފައްދާފައި ވަނީ 1978 ވަނަ އަހަރުގައި މުމްބާއީގައެވެ.

ސަތޭކަ ފަސްދޮޅަހަށް ވުރެ ގިނަ ފިލްމު ކުޅެފައިވާ ޝަޝީ ވަނީ ހިންދީ ފިލްމުތަކުގެ އިތުރުން އިނގިރޭސި ފިލްމުތަކުން ވެސް ފެނިގެން ގޮސްފައެވެ. އޭނާ އެންމެ ފަހުން ފެނިގެން ގޮސްފައި ވަނީ ވެސް އިނގިރޭސި ދެ ފިލްމަކުންނެވެ. އެއީ 1998 ވަނަ އަހަރު ރިލީޒް ކުރި "ޖިނާހް" އާއި "ސައިޑް ސްޓްރީޓްސް" ކިޔާ ފިލްމަކުންނެވެ. ޕާކިސްތާނު ވުޖޫދަށް ގެނައުމުގައި އިސްކޮށް އުޅުއްވި ބާނީ މުހައްމަދު އަލީ ޖިނާހްގެ ހަޔާތުގެ މައްޗަށް ބިނާކޮށް ތައްޔާރުކުރި "ޖިނާހް" އަކީ ޝަޝީގެ އެންމެ ފަހުގެ މަސައްކަތެކެވެ. އޭގެ އިތުރުން އޭނާ ފެނިގެން ދިޔަ ބައެއް މަޝްހޫރު އިނގިރޭސި ފިލްމްތަކުގެ ތެރޭގައި "ޝޭކްސްޕުއާ ވައްލާހް" އާއި "ބޮމްބޭ ޓޯކީ"، "އަ މެޓަރ އޮފް އިނޮސެންސް"، "ހީޓް އެންޑް ޑަސްޓް" އަދި "އިން ކަސްޓޮޑީ" ފާހަގަ ކޮށްލެވެއެވެ. މީގެ އިތުރުން ހޮލީވޫޑްގެ މަޝްހޫރު ތަރި އަދި ބޮންޑްގެ ރޯލުން ވެސް ފެނިގެން ގޮސްފައިވާ ޕިއާސް ބްރޮސްނަންާ އެކު (1988) ވަނަ އަހަރު "ދަ ޑިސީވާސް" ގައި އޭނާ ވަނީ އެކްޓް ކޮށްފައެވެ. އޭގެ ކުރިން 1996 ވަނަ އަހަރު މިނީ ސީރީޒެއް ކަމަށްވާ "ގުލިވާސް ޓްރެވެލްސް" ގައި ވެސް އޭނާ ފެނިގެން ގޮސްފައި ވެއެވެ. އެންމެ ފަހުން ޝަޝީ ކުޅެފައިވާ ހިންދީ ފިލްމަކީ 1991 ވަނަ އަހަރު އަމީތާބު ބައްޗަން އާއި ޖެކީ ޝްރޯފްއާ އެކު ފެނިގެންދިޔަ "އަކޭލާ" އެވެ. ފިލްމް ކުޅުމުގެ އިތުރުން އޭނާ ވަނީ ބައެއް ފިލްމްތައް ޕްރޮޑިއުސްކޮށް އަދި ދެ ފިލްމެއް ޑައިރެކްޓް ވެސް ކޮށްފައެވެ. އޭނާ ފާހަގަކުރެވިފައި ވަނީ އޭނާގެ ދައުރުގައި އެންމެ ކާމިޔާބު އެއް ތަރީގެ ގޮތުގައެވެ.

އޭނާ މަރުވި އިރު އަންހެން ދަރިއަކާއި ތިން ފިރިހެން ދަރިން ދުނިޔޭގައި އެބަ ތިއްބެވެ. އެއީ ކުނާލް ކަޕޫރާއި ކަރަން ކަޕޫރު އަދި ސަންޖަނާ ކަޕޫރެވެ. ކަޕޫރު އާއިލާގެ އެހެން ފަންނާނުންނާ ތަފާތުކޮށް ޝަޝީގެ ދަރިން ފިލްމީ ދާއިރާ އިން މާ ބޮޑަށް ފެނިގެން ގޮސްފައެއް ނުވެއެވެ. ނަމަވެސް ހަޔާތުގެ ކުރީކޮޅު ކޮންމެވެސް ވަރަކަށް ފިލްމްތަކުން ފެނިގެން ގޮސްފައި ވެއެވެ. އެ ގޮތުން ކަރަން ވަނީ "ލޯހާ" ގައި ދަރުމެންދުރާ އާއި ސަތަރުގަން ސިންހާއާ އެކު މުހިންމު ރޯލަކުން ފެނިގެން ގޮސްފައެވެެ. ޝަޝީގެ އަންހެނުން ޖެނިފާ ކެންޑެލްއަކީ އިނގިރޭސިއެކެވެ. އޭނާ ވަނީ އުމުރުން 54 އަހަރުގައި 1984 ވަނަ އަހަރުގެ ތެރޭގައި ނިޔާވެފައެވެ. އޭނާ ވަނީ ޝަޝީއާ އެކު "ޝޭކްސްޕިއާ ވައްލާހް" ގައި ހަރަކާތްތެރިވެފައެވެ. ޝަޝީގެ އެހެން ބައެއް އިނގިރޭސި ފިލްމްތަކުގައި ވެސް އޭނާ ފެނިގެން ގޮސްފައި ވެއެވެ. އޭނާ ވަނީ އިނގިރޭސި ފިލްމް "36 ޗައުރިންގީ ލޭން" އިން ބަފްޓާގެ ބެސްޓް އެކްޓްރެސް ރޯލް އަށް ވެސް ނޮމިނޭޓްވެފައެވެ.