ސިލޯނުގައި އުޅޭ ދިވެހިން މޫސުމަށް ސަމާލުވުމަށް އެމްބަސީ އިން އިލްތިމާސްކޮށްފި
ސްރީލަންކާގެ މެޓް ޑިޕާޓްމަންޓުން ކުރިއަށް އޮތް 12 ގަޑިއިރަށް ލަންކާގެ މޫސުން ގޯސްވާނެ ކަމަށް ލަފާކުރެވޭތީ ރެޑް ނޯޓިސް ވަނީ ނެރެފައި
ސްރީލަންކާއަށް ރާއްޖެއިން ކަނޑައަޅާފައިވާ ސަފީރު މުހައްމަދު ހުސެން ޝަރީފް (ވ)
ސްރީލަންކާގައި ދިރިއުޅޭ ދިވެހިން މޫސުމަށް ސަމާލުވުމަށް ލަންކާގައި ހުންނަ ރާއްޖޭގެ އެމްބަސީ އިން އިލްތިމާސްކޮށްފިއެވެ.
ރާއްޖެއިން ލަންކާއަށް ކަނޑައަޅުއްވާފައިވާ ސަފީރު މުހައްމަދު ހުސައިން ޝަރީފު (މުންދު) ބުދަ ދުވަހުގެ ރޭ ކުރެއްވި ޓުވީޓެއްގައި ވިދާޅުވީ ސްރީލަންކާގައި ދިރިއުޅެމުންގެންދާ ދިވެހިން ކޮންމެހެން ކުރަންޖެހޭ މުހިންމު ދަތުރުތައް ނޫނީ ނުކުރުމަށް އިލްތިމާސްކުރައްވާ ކަމަށާއި ހުރިހާ ބޭފުޅުންވެސް ގޭގައި ތިއްބެވުމަށް ނަސޭހަތްތެރިވާ ކަމަށެވެ. ސަބަބަކީ ސްރީލަންކާގައި ކޮޅިގަނޑެއް އުފެދި މިވަގުތު މޫސުން ގޯސްވެ، ގަދަޔަށް ވިއްސާރަކުރާތީކަމަށް ސަފީރު ވިދާޅުވިއެވެ.
މުންދު ވިދާޅުވީ ސްރީލަންކާގެ މެޓް ޑިޕާޓްމަންޓުން ކުރިއަށް އޮތް 12 ގަޑިއިރަށް ލަންކާގެ މޫސުން ގޯސްވާނެ ކަމަށް ލަފާކުރެވޭތީ ރެޑް ނޯޓިސް ނެރެފައިވާ ކަމަށެވެ.
މުންދުގެ ޓްވީޓްގައި އިތުރަށް ވިދާޅުވީ ސްރީލަންކާއަށް މޫސުން ގޯސްވުމާއި ގުޅިގެން ބޯކޮށް ވާރޭ ވެހި، ކަނޑު ގަދަވާނެ ކަމަށެވެ. އަދި ސްރީލަންކާގެ ހުންނަ ރާއްޖޭ އެމްބަސީގެ ކޮންސިއުލާ ޑިޕާޓްމަންޓުގެ ހެލްޕް ލައިން 0768096660 އަށް، އެމެޖެންސީ ހާލަތެއް ދިމާވެއްޖެނަމަ ހުރިހާ ބޭފުޅުންނަށް ގުޅުއްވުމަށް މުންދު ޓުވީޓުގައި އެދިވަޑައިގެންނެވިއެވެ.
ލަންކާ ކައިރީގައި ކޮޅިގަނޑު އުފެދުމާއި ގުޅިގެން މޫސުމަށް ސަމާލުވުމަށް ރާއްޖޭގެ މެޓް އޮފީހުންވެސް ވަނީ އިލްތިމާސް ކޮށްފައެވެ.
