އައްޑޫގައި ހުކުރު ނަމާދަށް ފަހު އަނިޔާވެރިކަމާ ދެކޮޅަށް ދުއާކޮށްގެން ހައްޔަރުކުރި އަހުމަދު ފަރްހާން (ފަރާ) ގެ މައްޗަށް ދައުލަތުން ކުރާ ދައުވާގެ ހުކުމް އިއްވުން އަންގާރަ ދުވަހަށް ތާވަލް ކުރުމަށްފަހު ކެންސަލްކޮށް ހުކުމް ކުރުން ފަސްކޮށްފިއެވެ.

ހުކުމް އިއްވުމުގެ ޝަރީއަތުގެ މަޖިލިސް ތާވަލްކޮށްފައި ވަނީ އަންގާރަ ދުވަހުގެ މެންދުރު ފަހު 14:15 އަށް ހިތަދޫ މެޖިސްޓްރޭޓް ކޯޓުގައެވެ. ނަމަވެސް އެ ޝަރީއަތުގެ މަޖިލީސް ކެންސަލްކޮށް ހުކުމް ކުރި ސަބަބެއް އެކޯޓުން ހާމަކޮށްފައެއް ނުވެއެވެ.

މައުލޫމާތު ލިބިފައިވާ ގޮތުގައި ފަރާގެ މައްޗަށް ދައުލަތުން އުފުލާފައި ވަނީ ޤާނޫނު ތަންފީޒު ކުރާ މުވައްޒަފެއްގެ މަސައްކަތަށް ޤަސްދުގައި ހުރަސް އެޅުމުގެ ކުށުގެ ދައުވާއެވެ. އަދި ހިތަދޫ މެޖިސްޓްރޭޓް ކޯޓުގައި ކުރިއަށްދާ މި މައްސަލަ ބައްލަވަނީ އެ ކޯޓުގެ މެޖިސްޓްރޭޓް ރަފީއުއްދީން އަހުމަދެވެ.

އޯގަސްޓް، 12، 2016 ގައި ފުލުހުން ފަރާ ހައްޔަރު ކުރީ ހިތަދޫ ފަޒާ މިސްކިތުގައި ހުކުރު ނަމާދަށް ފަހު ދުއާ ކުރަން ހުއްޓައެވެ.

ފަރާގެ މައްޗަށް ދައުލަތުން އުފުލާފައިވާ، ދައުވާ ސާބިތުވެއްޖެ ނަމަ ކަނޑައެޅޭނެ އެންމެ ބޮޑު އަދަބަކީ ހަތަރު މަހާއި 24 ދުވަހަށް ޖަލަށްލުމެވެ.