އޭސީ މިލާންގެ ކޯޗުކަށް ގަޓޫސޯ ހަމަޖައްސައިފި

އޭސީ މިލާންގެ ކޯޗުގެ މަގާމުގައި ހުރި ވިންސެންޒޯ މޮންޓެލާ ވަކިކޮށް އެ މަގާމަށް ޖެނާރޯ ގަޓޫސޯ ހަމަޖައްސައިފިއެވެ.

މިލާންގެ ކޯޗުކަމުގެ މަގާމާއި މިދިޔަ އަހަރުގެ ޖޫން މަހު ހަވާލުވި މޮންޓެލާ އެ މަގާމުން ވަކިކުރިކަން މިލާންއިން އިއުލާނު ކޮށްފައިވަނީ އެ ކްލަބުގެ ޓްވިޓާ އެކައުންޓުން ކުރި ޓްވީޓަކުންނެވެ. އެގޮތުން އެ ޓްވީޓުގައި ވަނީ އެ ކްލަބުގެ ކޯޗުގެ މަގާމުން މޮންޓެލާ ވަކިކޮށްފައިވާ ކަމަށާއި އެ މަގާމުގެ ހުރިހާ ޒިންމާތަކެއް އެ ކްލަބުގެ ޒުވާން ޓީމުގެ ކޯޗުގެ ގޮތުގައި ހުރި ޖެނާރޯ ގަޓޫސޯއާއި ހަވާލުކޮށްފައިވާ ކަމަށެވެ. މި ޓްވީޓުގައި މިލާންއިން ވަނީ މޮންޓެލާއަށް ހެޔޮ މުސްތަގުބަލަކަށް އެދިފައެވެ.

މޮންޓެލާއަށް މިލާނުގެ ކޯޗުގެ މަގާމު ދީފައިވަނީ އެ ކްލަބު އަލުން އަނބުރާ އިޓަލީއާއި ޔޫރަޕުގެ ގަދަ ބާރަކަށް ހެދުމުގެ އުއްމީދުގައެވެ. އޭނާއަށް އެ އަމާޒަށް ވާސިލުވުމަށް އެހީތެރިވެދިނުމުގެ ގޮތުން އެ ކްލަބުންވަނީ މިދިޔަ ހޫނު މޫސުމުގެ ޓްރާންސްފާގައި އައު 10 ކުޅުންތެރިން ގެނެސްފައެވެ. މުޅި ޖުމްލަ 180 މިލިއަން ޔޫރޯއަށްވުރެ ގިނައިން އެ ޓީމުން ހަރަދުކުރި ނަމަވެސް މޮންޓެލާގެ އިރުޝާދުގެ ދަށުން މިލާންއަށް މާ އެދެވޭ ނަތީޖާތަކެއް ހޯދިފައެއް ނުވެއެވެ.

މިވަގުތު މިލާން އޮތީ އިޓާލިއަން ސެރީއޭގެ އެއްވަނައިގައި އޮތް ނަޕޯލީއަށްވުރެ 18 ޕޮއިންޓް ފަހަތުގައެވެ. އެގޮތުން މޮންޓެލާގެ އިރުޝާދުގެ ދަށުން އެންމެ ފަހުން ކުޅުނު ނުވަ މެޗުގެ ތެރެއިން މިލާން މޮޅުވެފައިވަނީ އެންމެ ދެ މެޗުންނެވެ. އެ ޓީމު އޮތީ ކުޅުނު 14 މެޗުން ލިބުނު 20 ޕޮއިންޓާއެކު ތާވަލުގެ ހަތް ވަނައިގައެވެ.

ކޯޗުކަމުގެ މަގާމުން އޭނާ ވަކިކުރުމުގެ ގަޑިއިރުތަކެއް ކުރިން މޮންޓެލާ ދިން އިންޓަވިއުއެއްގައި އޭނާ ބުނީ އަދިވެސް ލީގު ކާމިޔާބު ކުރެވޭނެކަމުގެ އުއްމީދު އެބައޮތް ކަމަށާއި ކުޅުންތެރިންގެ ފަރާތުން ރަނގަޅު ކުޅުމެއް ފެންނަމުންދާ ކަމަށެވެ.

މިލާންގެ ކޯޗުކަމުގެ ޒިންމާތައް ގަޓޫސޯއާއި ހަވާލުކޮށްފައިވާއިރު އޭނާއަކީ އެ ކްލަބުގައި ކާމިޔާބު ދުވަސްތަކެއް ވޭތުކުރި ކުޅުންތެރިޔެކެވެ. މިލާންއަށް 387 މެޗު ކުޅެދީފައިވާ ގަޓޫސޯ ވަނީ އެ ކްލަބާއެކު ދެ ޔުއެފާ ޗެމްޕިއަންސް ލީގާއި ދެ ޔުއެފާ ސުޕާކަޕް އަދި ދެ އިޓާލިއަން ސެރީއޭގެ އިތުރުން ދެ ކޮޕާ އިޓާލިއާ ކާމިޔާބުކޮށްފައެވެ. އިޓަލީގެ ގައުމީ ޓީމާއެކު 2006 ވަނަ އަހަރުގެ ފީފާ ވޯލްޑް ކަޕް ކާމިޔާބުކުރި ގަޓޫސޯ މީގެކުރިން އެއްވަނަ ޑިވިޝަނުގެ ޓީމަކަށް ކޯޗުކަން ކޮށްދީފައެއް ނުވެއެވެ.