ސީރިއާގެ ސަރުކާރާއެކު ބާއްވާ ޞުލްޙައިގެ މަޝްވަރާތަކުގައި ބައިވެރިވާ އިދިކޮޅު ފަރާތްތަކުގެ އައު މަންދޫބަކަށް ނަޞްރު އަލް-ހަރީރީ ހަމަޖައްސައިފި އެވެ.

އދ. އިން އިސްނަގައިގެން ބާއްވާ މިމަޝްވަރާތައް ފެށުމަށް ތާވަލްކޮށްފައިވަނީ މިމަހުގެ 28 ވަނަ ދުވަހު އެވެ. މަޝްވަރާތައް ބޭއްވުމަށް ނިންމާފައިވަނީ ސްވިޓްޒަލެންޑްގެ ޖެނީވާގައެވެ.

ޞުލްޙައިގެ މަޝްވަރާތަކުގައި ބައިވެރިވާ އިދިކޮޅު ފަރާތްތަކުގެ މަންދޫބަކަށް ނަޞްރު އަލް-ހަރީރީ ހަމަޖެއްސެވިކަން އިޢުލާން ކޮށްފައިވަނީ ސައުދީ އަރަބިއްޔާގެ ރިޔާދުގައި ބޭއްވި ސީރިއާގެ އިދިކޮޅު ފަރާތްތަކުގެ ސަމިޓުގެ ތެރޭގައެވެ.

ނަޞްރު އަލް-ހަރީރީ ވަނީ މަޝްވަރާގެ މޭޒުދޮށުގައި ހުރިހާ މައްސަލައަކާއިމެދު ވާހަކަ ދެއްކުމަށް އިދިކޮޅު ފަރާތްތަކުން ތައްޔާރަށް އޮތް ކަމަށް ވިދާޅުވެފައެވެ.

ނަޞްރު އަލް-ހަރީރީގެ އިތުރުން ޞުލްޙައިގެ މަޝްވަރާތަކުގައި ބައިވެރިވާ އިދިކޮޅު ފަރާތްތަކުގެ ވަފްދުގައި ދެން ހިމެނެނީ ޖަމާލް ސުލެއިމާން، ޚާލިދު އަލް-މަހާމިދު އަދި ހަނާދީ އަބޫ ޔަރޫބް ކަމަށް އަލްއަރަބިއްޔާ އިން ރިޕޯޓް ކޮށްފައިވެއެވެ.

ސީރިއާގެ އިދިކޮޅު ފަރާތްތަކުން ޞުލްޙައިގެ މަޝްވަރާތަކަށް ފެހި ސިގްނަލެއް ދީފައިވަނީ، އިންތިގާލީ މުއްދަތުގައި ސީރިއާގެ ރައީސް ބައްޝާރުލް އަސަދުގެ ދައުރެއް އޮވެގެން ނުވާނެ ކަމަށް ބުނެ، އިދިކޮޅު ފަރާތްތަކުން ކޮށްފައިވާ ޑިމާންޑް ތަކުރާރު ކުރިތާ އެއް ދުވަސްވެސް ނުވަނީހެވެ. ސީރިއާގެ ހަނގުރާމާގައި ބައްޝާރުގެ ފައުޖުތަކުން ހޯދާފައިވާ ކުރިއެރުންތަކާއި ގުޅިގެން، އިދިކޮޅު ފަރާތްތަކުގެ ވިސްނުން ބަދަލުކުރާނެ ކަމަށް ކުރިންވެސް އޮތީ ބެލެވިފައެވެ.

ސީރިއާގެ ދާޚިލީ ހަނގުރާމައިގެ ތެރެއަށް ރަޝިއާ އިން ވަދެފައިވާތާ ދެ އަހަރު ވެފައިވާއިރު، ރަޝިއާގެ އަސްކަރިއްޔާގެ ފައުޖުތަކުގެ އެހީތެރިކަމާއެކު ސީރިއާގެ ސަރުކާރުން ވަނީ ބޮޑެތި ކުރިއެރުންތަކެއް ހޯދާފައެވެ. އެގޮތުން، ހަނގުރާމައިގެ ކުރީކޮޅު ސަރުކާރަށް ގެއްލުނު ގިނަ ސަރަޙައްދުތަކެއް ވަނީ، ސަރުކާރުގެ ބާރުގެ ދަށަށް ގެންގޮސްފައެވެ.

ނަޞްރު އަލް-ހަރީރީގެ ބަދަލުގައި ކުރިން ބޭއްވި ހަޔަރ ނެގޯސިއޭޝަންސް ކޮމިޓީ (އެޗްއެންސީ) ގެ ބައްދަލުވުންތަކުގައި މީގެ ކުރިން ބައިވެރިވެފައިވަނީ ރިޔާދު ހިޖާބެވެ. ހިޖާބް ވަނީ، މަޝްވަރާތަކުގައި ބައްޝާރުލް އަސަދުގެ ސަރުކާރަށް ފައިދާވާފަދަ ނިންމުންތަކަށް ދޫދިނުމަށް އެޗްއެންސީ އިން ބާރުއަޅާ ކަމަށް ބުނެ، އެމަގާމުން މިހަފްތާގެ ތެރޭގައި އިސްތިއުފާ ދެއްވާފައެވެ.

ޖެނީވާގައި ބާއްވާ ޞުލްޙައިގެ މަޝްވަރާތަކަށް ތައްޔާރުވުމުގެ ގޮތުން އދ.ގެ މަންދޫބު ސްޓެފަން ޑި މިސްތޫރާ ވަނީ ރަޝިއާގެ ޚާރިޖީ ވަޒީރު ސަރްގޭ ލެވްރޯފާއި ހުކުރު ދުވަހު ބައްދަލު ކުރައްވާފައެވެ. ލަވްރޯފްވެސް ވަނީ، ސީރިއާގެ އިދިކޮޅު ފަރާތްތައް އެއްބައިވަންތަ ކުރުމަށް ސައުދީ އަރަބިއްޔާ އާއެކު ރަޝިއާ އިން މަސައްކަތް ކުރަމުންދާ ކަން ހާމަކޮށްފައެވެ.

ހުޅަނގާއި އަރަބި ބައެއް ގައުމުތަކުގެ މަދަދު ލިބިފައިވާ ސީރިއާގެ އިދިކޮޅު ފަރާތްތަކުން ގިނަ އަހަރުތަކެއް ވަންދެން ވަނީ، ސީރިއާގެ ރައީސް ބައްޝާރުލް އަސަދު އިސްތިއުފާ ދިނުމަށް ޑިމާންޑްކޮށްފައެވެ. އެހެންނަމަވެސް، ސީރިއާ ހަނގުރާމައިގެ ތެރެއަށް ރަޝިއާ ވަން ފަހުން ހަނގުރާމައިގެ މައިދާނުގައި އިދިކޮޅު ފަރާތްތަކަށް ކުރިލިބޭނެ މަގެއް ނެތް ކަން ވަނީ ސާފުވެފައެވެ.

ރަޝިއާގެ ރައީސް ވްލަޑިމިއާ ޕޫޓިން ވަނީ، ސީރިއާގެ ސަރުކާރާއި އިދިކޮޅު ފަރާތްތަކުން ގުޅިގެން ސީރިއާގެ ކުރިމަގާއިމެދު މަސައްކަތް ކުރާނެ އޮނިގަނޑެއް އެކުލަވާލުމުގެ މަޝްވަރާތައް ފެށުމަށް ގޮވާލާފައެވެ. މީގެ އިތުރުން ދެ ފަރާތް ބައިވެރިވެގެން ސީރިއާގެ އައު ގާނޫނު އަސާސީ އެކުލަވާލުމާއި، އދ.ގެ ބެލުމުގެ ދަށުން އައު އިންތިޚާބެއް ބޭއްވުމަށްވެސް ޕޫޓިން ގޮވާލާފައިވެއެވެ.

އދި ސީރިއާގެ މައްސަލައަށް ސިޔާސީ ޙައްލެއް ހޯދޭނީ، އދ.ގެ ބެލުމުގެ ދަށުން ޖެނީވާގައި ކުރިއަށްދާ ޞުލްޙައިގެ މަޝްވަރާތަކުގެ މަރުޙަލާގެ ތެރެއިން ކަމަށް ޕޫޓީން ވިދާޅުވި އެވެ.