ޔުއެފާ ޗެމްޕިއަންސް ލީގުގައި ރެއާލް މެޑްރިޑް ކުޅުނު މެޗުން އެ ޓީމު ތަފާތު ބޮޑު ނަތީޖާއަކުން މޮޅުވެ ދެވަނަ ބުރުގެ ޖާގައެއް ހޯދައިފިއެވެ.

ޗެމްޕިއަންސް ލީގުގެ ގްރޫޕް 'އެޗް' ގައި ސައިޕްރަސްގެ އެޕޮއެލް ނިކޯސިއާ އާއި ދެކޮޅަށް ރަށުން ބޭރުގައި ކުޅުނު މެޗުން ރެއާލް މެޑްރިޑް މޮޅުވެފައި ވަނީ 6-0 ގެ ތަފާތު ބޮޑު ނަތީޖާއަކުންނެވެ. މި މެޗުގައި އެ ޓީމުގެ ފަރާތުން މޮޅު ކުޅުމެއް ފެނިގެންދިޔައިރު އެ ޓީމުން ވަނީ ލަނޑު ޖެހުމަށް ގިނަ ފުރުސަތުތަކެއް ތަނަވަސްކޮށްފައެވެ.

ރެއާލްއިން މެޗުގައި ޖެހި ފުރަތަމަ ލަނޑު އެ ޓީމަށް މެޗުގެ 23 ވަނަ މިނެޓުގައި ޖަހައިދިނީ ކްރޮއޭޝިއާގެ ތަޖުރިބާކާރު މިޑްފީލްޑަރު ލޫކާ މޮޑްރިޗްއެވެ. މި ލަނޑަކީ އެޕޮއެލްގެ ކުޅުންތެރިންނަށް ބޯޅަ ސާފު ނުކޮށްލެވިގެން އުޅެނިކޮށް އޭނާ ޖެހި ލަނޑެކެވެ. ރެއާލްގެ ދެވަނަ ލަނޑު މެޗުގެ 39 ވަނަ މިނެޓުގައި ޓޯނީ ކްރޫސްގެ އެހީތެރިކަމާއެކު ކާމިޔާބުކޮށްދިނީ ފްރާންސްގެ ފޯވާޑް ކަރިމް ބެންޒެމާއެވެ.

ރެއާލް މި މެޗުގެ ފުރަތަމަ ހާފުގައި ހަތަރު ލަނޑު ޖެހިއިރު މި ލަނޑުތަކުގެ ތެރެއިން އެ ޓީމުގެ ތިންވަނަ ލަނޑު މެޗުގެ 41 ވަނަ މިނެޓުގައި ރަފައޭލް ވަރާންގެ އެހީތެރިކަމާއެކު ޖަހައިދިނީ ނާޗޯ ފަނާންޑޭޒްއެވެ. ރެއާލްގެ ހަތަރު ވަނަ ލަނޑު ފުރަތަމަ ހާފުގެ އިތުރު ވަގުތުގެ ތެރޭގައި ޖަހައިދިނީ ވެސް ބެންޒެމާއެވެ.

ހަތަރު ލަނޑުގެ ލީޑެއްގައި އޮވެ ރެއާލްއިން ފުރަތަމަ ހާފު ނިންމާލިއިރު އެ ޓީމުން ވަނީ ދެވަނަ ހާފުގައި ވެސް ގިނަ ވަގުތު ބޯޅަ ގެންގުޅެ އެޕޮއެލްގެ ގޯލާއި އަމާޒުކޮށް ގިނަ ހަމަލާތަކެއް ފޮނުވާލާފައެވެ. މި ހާފުގައި ރެއާލްގެ ފަރާތުން ފެނުނު ދެ ލަނޑު ވެސް އެ ޓީމަށް ޖަހައިދިނީ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯއެވެ. އޭނާގެ ފުރަތަމަ ލަނޑު މެޗުގެ 49 ވަނަ މިނެޓުގައި ޖެހިއިރު ދެވަނަ ލަނޑު އޭނާ ޖަހައިދިނީ 54 ވަނަ މިނެޓުގައެވެ.

މި ގްރޫޕުގެ ދެވަނަ މެޗުގައި އިނގިރޭސިވިލާތުގެ ޓޮޓެންހަމް ހޮޓްސްޕާސްވަނީ ރަށުން ބޭރުގައި 2-1 ގެ ނަތީޖާއަކުން ޖަރުމަނުގެ ބޮރޫޝިއާ ޑޯޓްމަންޑް ބަލިކޮށްފައެވެ. މި މެޗުގެ ފުރަތަމަ ލަނޑު ޖަހާ ލީޑު ނަގާފައިވަނީ ޑޯޓްމަންޑުންނެވެ. މެޗުގެ 31 ވަނަ މިނެޓުގައި ޑޯޓްމަންޑަށް ލީޑު ނަގައިދިނީ ޕިއާ އެމެރިކް އޮބަމަޔާންގްއެވެ.

އެހެނަސް ޓޮޓެންހަމްއިން ވަނީ ދެވަނަ ހާފުގައި ނަތީޖާ އެ ޓީމުގެ ކޮޅަށް އަނބުރާލާފައެވެ. އެގޮތުން މެޗުގެ 49 ވަނަ މިނެޓުގައި އެ ޓީމަށް ނަތީޖާ ހަމަހަމަ ކޮށްދިނީ ހުނަރުވެރި ފޯވާޑް ހެރީ ކޭންއެވެ. ޓޮޓެންހަމްއަށް މެޗުގައި ލީޑު ލިބިގެންދިޔައީ 76 ވަނަ މިނެޓުގައި ދެކުނު ކޮރެއާގެ ފޯވާޑް ހެއުން މިން ސޮން ޖަހައިދިން ލަނޑުންނެވެ.

މި ގްރޫޕުން ދެވަނަ ބުރަށް ކޮލިފައިވެފައިވާ ދެ ޓީމަކީ ރެއާލްއާއި ޓޮޓެންހަމްއެވެ. އެގޮތުން ކުޅުނު ފަސް މެޗުން ލިބުނު 13 ޕޮއިންޓާއެކު ޓޮޓެންހަމް ގްރޫޕުގެ އެއްވަނައިގައި އޮތްއިރު ދެވަނައިގައި ރެއާލް އޮތީ 10 ޕޮއިންޓާއެކުއެވެ. ގްރޫޕުގައި ދެން  އޮތް ދެ ޓީމަށް ވެސް އެއްވަރަކަށް ޕޮއިންޓް ލިބިފައިވާއިރު ތިން ވަނަ ޑޯޓްމަންޑަށް ލިބެނީ ލަނޑުގެ ތަފާތުންނެވެ. މި ގްރޫޕުގެ ފުލުގައި އޮތީ އެޕޮއެލް ނިކޯސިއާއެވެ.