ތޮއްޔިބަަށް ފުލުހުން ކުރާ ފުރައްސާރަ ހުއްޓާލުމަށް އެމްޑީޕީން ގޮވާލައިފި
ތޮއްޔިބަކީ ސޯޝަލް މީޑިޔާ މެދުވެރިކޮށް ސަރުކާރުގެ ތެރޭގައި ހިނގަމުން އަންނަ ކޮރަޕްޝަން ހާމަކުރަން އަންނަ ހިތްވަރުގަދަ އެކްޓިވިސްޓެއް
ސޯޝަލް މީޑިއާ އެކްޓވިސްޓް ތޮއްޔިބު ޝަހީމް
ސޯޝަލް މީޑިޔާ އެކްޓިވިސްޓު، ތޮއްޔިބު ޝަހީމަށް ދިވެހި ފުލުހުން ތަކުރާރުކޮށް ފުރައްސާރަ ކުރަމުންދާ ކަމަށަށް ބުނެ، އެކަން ހުއްޓާލުމަށް އިދިކޮޅު އެމްޑީޕީން ގޮވާލައިފިއެވެ.
އެމްޑީޕީން ނެރުނު ނޫސްބަޔާނެއްގައި ބުނެފައިވަނީ ރައީސުލްޖުމްހޫރިއްޔާ އަބްދުﷲ ޔާމީނާއި، އޭސީސީގެ ރައީސް ހަސަން ލުތުފީއާއި، ސަރުކާރުގެ އިސްވެރިންނާއި ގުޅޭގޮތުން ދޮގު މައުލޫމާތު ފަތުރާކަމަށްބުނެ ގާނޫނާއި ޚިލާފު ތުހުމަތުކޮށް ތޮއްޔިބަށް ފުރައްސާރަކުރަމުންދާތީ އެކަން ހަރުކަށި އިބާރާތުން ކުށްވެރި ކުރާ ކަމަށެވެ. އަދި އެކަން ހުއްޓާލުމަށްފަހު ގައުމަށް ކުރިމަތިވެފައިވާ ބިރުވެރިކަމާއި ނުރައްކާތަކުން މުޖުތަމައު ސަލާމަތް ކުރުމަށް އިސްކަންދިނުމަށް މޯލްޑިވްސް ޕޮލިސް ސާވިސްއަށް އެމްޑީޕީގެ ފަރާތުން ވަނީ ގޮވާލާފައެވެ.
ތޮއްޔިބަކީ ސޯޝަލް މީޑިޔާ މެދުވެރިކޮށް ސަރުކާރުގެ ތެރޭގައި ހިނގަމުން އަންނަ ކޮރަޕްޝަން ހާމަކުރަން އަންނަ ހިތްވަރުގަދަ އެކްޓިވިސްޓެއް ކަމަށާއި އޭނާއަށް މައުލޫމާތު ދޭ ފަރާތްތަކުން ހޯދުމަށް ގާނޫނާއި ޚިލާފަށް ކޯޓު އަމުރެއް ނެރެފައިވާކަން އެމްޑީޕީން ފަހަގަކޮށްފައިވެއެވެ. އަދި އޭގެ ދަށުން ތޮއްޔިބުގެ ފޯނާއި ޓެބްލެޓުތަކާއި، މެމޮރީ ކާޑު ހިފަހައްޓާފައިވަނީވެސް ގާނޫނާއި ޚިލާފަށްކަމަށް އެމްޑީޕީގެ ބަޔާނުގައި ބުނެފައިވެއެވެ.
ގާނޫނު އަސާސީގައި ކޮންމެ ރައްޔިތަކަށްވެސް މިނިވަންކަމާއެކު ޚިޔާލު ފާޅުކުރުމާއި ނޫސްވެރިކަން ކުރުމުގެ މިނިވަންކަން ދީފައިވާއިރު މަސްދަރު ހާމަކުރުމަށް މަޖުބޫރުކުރުމަކީ އޭނާއަށް ފުރައްސާރަ ކުރުން ކަމުގައި ދެކޭ ކަމަށްވެސް އެމްޑީޕީގެ ބަޔާނުގައި ބުނެފައިވެއެވެ.
