ރައީސް މުހައްމަދު ނަޝީދުގެ ސަރުކާރުގެ ޑިފެންސް މިނިސްޓަރު ތޮލްހަތު އިބްރާހީމްކަލޭފާނު 10 އަހަރަށް ޖަލަށްލާން ދަށު ކޯޓުން ކުރި ހުކުމަށް ހައިކޯޓުން ވެސް ތާއީދުކޮށްފި އެވެ.
ތޮލްހަތު 10 އަހަރަށް ޖަލަށް ލުމަށް ކްރިމިނަލް ކޯޓުން ހުކުމް ކުރީ 2015 ވަނަ އަހަރުގެ އޭޕްރީލް 10 ވަނަ ދުވަހު އެވެ. އޭނާގެ މައްޗަށް އެ ހުކުމް ކުރީ ރައީސް ނަޝީދުގެ ވެރިކަމުގައި ކްރިމިނަލް ކޯޓުގެ އެއިރުގެ އިސްގާޒީ އަބްދުﷲ މުހައްމަދު(އަބްދުﷲ ގާޒީ) އެކަހެރި ކުރި މައްސަލައިގައި ދައުލަތުން ކުރި ޓެރަރިޒަމުގެ ދައުވާ ސާބިތުވުމުންނެވެ.
ތޮލްހަތުގެ މައްޗަށް ކްރިމިނަލް ކޯޓުން އިއްވި ހުކުމުގައި ވަނީ، އަބްދުﷲ ގާޒީ ހައްޔަރު ކުރުމަށް ސިފައިންގެ އެންމެ މަތީވެރިޔާގެ ހައިސިއްޔަތުން ރައީސް ނަޝީދު ނިންމެވުމުން، ތޮލްހަތު އެކަން ރާވައި ހިންގާފައިވާކަން އޭނާ ޝަރީއަތުގައި ދެއްކެވި ވާހަކަތަކާއި ހެކީންގެ ހެކިބަހުން ޝަރީއަތަށް ސާބިތުވާ ކަމަށެވެ.
ކްރިމިނަލް ކޯޓުން ކުރި ހުކުމް ތޮލްހަތުގެ ފަރާތުން އިސްތިއުނާފުކުރިއިރު، އިސްތިއުނާފު މައްސަލައިގައި ހައިކޯޓުން އަންގާރަ ދުވަހު ވަނީ، ދަށު ކޯޓުގެ ހުކުމަށް ބަދަލު ގެންނަންޖެހޭ ސަބަބެއް ނެތް ކަމަށް ކަނޑައަޅާފަ އެވެ.
ތޮލްހަތު 10 އަހަރަށް ޖަލަށް ލުމަށް ހުކުމް ކޮށްފައިވާއިރު، އޭނާ ހުކުމް ތަންފީޒު ކުރައްވަމުން ގެންދަވަނީ ގޭބަންދުގައި ހުންނަވައިގެންނެވެ.
އަބްދުﷲ ގާޒީ އެކަހެރި ކުރި މައްސަލައާ ގުޅިގެން ރައީސް މުހައްމަދު ނަޝީދު 13 އަހަރަށް ޖަލަށް ލުމަށް ހުކުމް އިއްވާފައިވެއެވެ. މީގެ އިތުރުން، އެ މައްސަލައާ ގުޅިގެން އެއިރުގެ ސިފައިންގެ މާލޭ އޭރިއާ ކޮމާންޑަރު، މިހާރުގެ ހިތަދޫ މެދު ދާއިރާގެ މެންބަރު އިބްރާހިމް މުހައްމަދު ދީދީގެ މައްޗަށް ޝަރީއަތް ދަނީ ހިންގަމުންނެވެ.
އެއިރުގެ ޗީފް އޮފް ޑިފެންސް ފޯސް މޫސާ އަލީ ޖަލީލުއާއި ކާނަލް މުހައްމަދު ޒިޔާދުގެ މައްޗަށްވެސް ދައުލަތުން ދައުވާ އުފުލި އެވެ. އެހެން ނަމަވެސް، އެ ދެބޭފުޅުންގެ މައްޗަށް ކުށް ސާބިތުނުވާ ކަމަށް ކޯޓުން ވަނީ ހުކުމް ކޮށްފަ އެވެ.