ގައުމީ ދުވަސް: ބޮޑުތަކުރުފާނު ފަސްތާނުލާފައިވާ ބިން ހަމަ ނަގަނީ ހެއްޔެވެ؟

ފަހުރުވެރި ގައުމީ ދުވަސް ފާހަގަކުރާއިރު، ގައުމީ ދުވަސް ނިސްބަތްވާ ތާރީހީ ޖިހާދުގެ މައުލޫމާތާއި އެ ޖިހާދުގެ ބަތޮލުންގެ ކުޅަދާނަކަމާއި ހުޝިޔާރުކަމާއި ވެވަޑައިގެންނެވި ގުރުބާނީ މި ޖީލުގެ ދަރިންނަށް ފުރިހަމަ އަށް ބުނެއެއް ނުދެވެ އެވެ. ސްކޫލް ޓެކްސްޓް ފޮތްތަކާއި ޖަލްސާތަކުގައި ވެސް ދައްކަނީ ބާވާހަކަތަކެވެ.

ޒަމާން ބަދަލުވި ނަމަވެސް، ގައުމީ ދުވަސް ފާހަގަކުރުމުގެ ވައްޓަފާޅިއަކަށް ބަދަލެއް ނާދެ އެވެ. މިއަދު ވެސް އިވެމުންދަނީ ބައިތު ބާޒީ އާއި ބަހުސް ކުރުމާއި ގައުމީ ލަވައިގެ އަޑެވެ. ފެންނަމުންދަނީ ސަގާފީ ކެއުންތަކާއި ދިވެހި ހެދުމެވެ. މިވަރުން ނުފުދެ އެވެ. ގައުމީ ދުވެހެއް ފާހަގަ ކުރުމުގެ ބޭނުމަކީ މާނައެއް ނެތް ގޮތުގައި ކަންކަން ކުރުމެއް ނޫނެވެ. ގައުމީ ދުވަހެއް ފާހަގަކުރުމުގެ އެންމެ މުހިންމު ބައިތު ބާޒީ ކުރުމާއި ދިވެހި ހެދުން ލުމެއް ނޫނެވެ. އެންމެ މުހިންމު ބޭނުމަކީ އެ ގައުމެއްގެ ރައްޔިތުން ބަލައިގެންފައިވާ ނުވަތަ ގަބޫލުކުރާ ހަމަތަކާއި އަހްލާގު އާލާކުރުމެވެ. ގައުމިއްޔަތު އަސާސްތައް ދިރުވުމެވެ.

މިކަންކަން މިއަދު ނުކުރެވެ އެވެ. އެންމެ މިސާލަކަށް ބަލާލަމާ ހިނގާށެވެ. ގައުމީ ދުވަސް ފާހަގަކުރުމުގައި އެ ދުވަސް ނިސްބަތްވާ އުތީމު މުހައްމަދު ތަކުރުފާނުގެ ޖިހާދުގެ ވާހަކަ ވަރަށް ފަހުރުވެރިކަމާއެކު ދެއްކި ނަމަވެސް ބޮޑުތަކުރުފާނާއި އެ މަނިކުފާނުގެ ޖިހާދުގެ ބައިވެރިން ފަސްތާނުލާފައިވާ ތަން އެނގެނީ ކިތައް ދިވެހިންނަށް ހެއްޔެވެ؟ އެތަނަށް ހަދަން އުޅޭ ގޮތެއް އެނގި ކަންބޮޑުވޭ ހެއްޔެވެ؟

ޕޯޗްގީޒުންގެ އަޅުވެތިކަމުން ގައުމު ސަލާމަތްކޮށް ދެއްވި އެ ބަތޮލުން ފަސްތާނުލާފައި ވަނީ އެތައް ގަރުނެއްވެފައިވާ ބިހުރޯޒު ކަމަނާ މިސްކިތުގެ ގަބުރުސްތާނުގަ އެވެ. ނަމަވެސް މިއަދު އަޑުއިވެމުން ދަނީ އެ މިސްކިތާއި ޒިޔާރަތާއި ގަބުރުސްތާނު ވެސް ނަގައި އެ ބިމުގައި ބިޔަ އިމާރާތެއް އެޅުމަށް ސަރުކާރުން ނިންމާފައިވާ ވާހަކައެވެ.

ތެދެކެވެ. އިސް އުފުލާލުމުން ބޮލުގައި އޮންނަ ތޮފި ނުވަތަ ތާކިހާ ވެއްޓޭވަރުގެ އުސް އިމާރާތްތައް ބިނާކުރެވިދާނެ އެވެ. ނަމަވެސް އެފަދަ ބިނާތަން ހަދަންޖެހޭނީ ގައުމުގެ ތާރީހީ އިމާރާތްތައް ފުނޑާލާފައެއް ނޫނެވެ. ގައުމެއްގެ ހައިސިއްޔަތުން ސުންނާފަތިކޮށްގެން ނުވާނެ ބިނާތަކެއް ހުންނާނެ އެވެ. އެފަދަ ތަންތަނަކީ ގައުމީ ބަތޮލުންގެ ހަނދާންތައް ރަމްޒުކޮށްދޭ ތަންތަނެވެ. ޒިޔާރަތްތަކެވެ. ތާރީހީ ތަންތަނެވެ. ނަމަވެސް މިއަދު މި ސަރުކާރުގެ އަމާޒު ހިފާފައި އެހުރީ އެފަދަ ބައެއް ތަންތަން ނަގައި ޒަމާނީ ބިނާތަކާއި ކުޅިވަރު މައިދާންތައް އެޅުމަށެވެ.

ހިރިގަލުގެ ކަޅުވަކަރު މިސްކިތް ނެގުމަށް ފަހު އެތަނުގައި ހަދަން ރާވާފައި ވަނީ ސްކޭޓްކުރަން އައިސް ރިންގެކެވެ. މަސްޖިދުލް ސުލްތޯން އާދިލާއި ބިހުރޯޒު ކަމަނާ މިސްކިތާއި ޒިކުރާ މިސްކިތް ހުރި ތަނުގައި މަލްޓިޕާޕަސް ޓަވަރެވެ. ތާރީޚީ ބިނާތަކަކީ މި ސަރުކާރުގެ ކުރިމަތީގައި އަގެއް ހުރި ތަންތަނެއް ނޫން ކަމެވެ. އެހެން ނޫންނަމަ ކަޅުވަކަރު މިސްކިތެއް ނުނަގާނެ އެވެ. އެހެން ނޫންނަމަ ބިހުރޯޒު ކަމަނާ މިސްކިތެއް ތަޅައެއް ނުލާނެ އެވެ. އެ މިސްކިތުގައިވާ ވަޅަކީ ވެސް ހާއްސަ ވަޅެވެ. އެއީ ހިރިގަލުގެ އަށް ކަން ވަޅެކެވެ. އެ ވައްތަރުގެ ވަޅަކީ ރާއްޖޭގައި ވެސް، ހާއްސަކޮށް މާލޭގައި ވަރަށް މަދު ވައްތަރެއްގެ ވަޅެކެވެ. ނަމަވެސް އެކަމަށް ވެސް ބެލުމެއް ނެތެވެ.

ބިހުރޯޒް ކަމަނާ މިސްކިތުގެ ޤަބުރުސްތާނުގައި ފަސްތާނު ލާފައިވާ އުތީމު ދެބެންނާއި އެ ދެ ބެއިންގެ ފަހުލަވާނުންގެ ހަށިކޮޅު ނަގައި، އެތަނަށް ކޮންކްރިޓް އަޅައި، އެ ބަތޮލުންގެ ހަނދާންތައް ފޮހެލުމަކީ ޖަރީމާއެކެވެ. ގައުމީ ދުވަސް ފާހަގަކުރާއިރު، މި ޖަރީމާއާ ދެކޮޅަށް އަޑު ނުއުފުލާ ނަމަ ގައުމީ ރޫހެއް ނެތީވެ. މިވަރުގެ ޖަރީމާއަކާ ދެކޮޅަށް ނުތެދުވާނަމަ ގައުމީ ދުވަހުގެ ބަތޮލުގެ ޒިކުރާ އާކުރަން، ގައުމީ ދުވަސް ފާހަގަކުރުމުގެ ބޭނުމެއް ވެސް އެބަ އޮތް ހެއްޔެވެ؟