އިޓަލީގެ މަޝްހޫރު ކުރެހުންތެރިޔާ ލިއޮނާޑޯ ޑާވިންސީގެ ކުރެހުމެއް 450 މިލިއަން ޑޮލަރަށް ވިއްކާލައިފިއެވެ.

މި ކުރެހުން ވިއްކާލާފައިވަނީ އިނގިރޭސިވިލާތުގެ ނީލަންކިޔާ ކުންފުންޏެއް ކަމަށްވާ 'ކްރިސްޓީސް' އިން އެމެރިކާގެ ނިއުޔޯކުގައި ކުރިޔަށް ގެންދިޔަ ނީލަމެއްގައެވެ. 'ސަލްވެޓޯރ މުންޑީ' ނުވަތަ 'ސޭވިއާ އޮފް ދަ ވާރލްޑް' ގެ ނަމުން ނަން ދީފައިވާ މި ކުރެހުމަކީ ޑާވިންސީގެ ކުރެހުންތަކުގެ ތެރެއިން އާންމުކޮށް ދައްކާލުމަށް ބެހެއްޓިފައި ނުވާ ހަމައެކަނި ކުރެހުމެވެ.

ނީލަން ކާމިޔާބު ކުރި ފަރާތުގެ ނަން ހާމަކޮށްފައި ނުވާއިރު 19 މިނެޓަށް ދިގު ދެމިގެންދިޔަ މި ނީލަން އެ ފަރާތުން ކާމިޔާބުކޮށްފައިވަނީ 450،312،500 ބިޑެއް ހުށަހަޅައިގެންނެވެ.

ބެލެވޭ ގޮތުގައި މި ކުރެހުމަކީ 1500 ގެ އަހަރުތަކުގައި ޑާވިންސީ ކުރާހާފައިވާ ކުރެހުމެކެވެ. މި ކުރެހުން 1649 ވަނަ އަހަރު އެންމެ ފުރަތަމަ ގަތް ފަރާތަކީ އިނގިރޭސިވިލާތުގައި އޭރު ރަސްކަން ކުރެއްވި ޗާލްސް 1 އެވެ. އެންމެ ފަހުން މި ކުރެހުން ގަނެފައިވަނީ ރަޝިއާގެ އިންވެސްޓަރެއް ކަމަށްވާ ޑިމިޓްރީ ރައިބްލޯވެއެވެ. ފްރާންސްގެ މޮނާކޯގެ ވެސް ޗެއާމަންކަން ކުރަމުން އަންނަ ޑިމިޓްރީ 2013 ވަނަ އަހަރު މި ކުރެހުން ގަނެފައިވަނީ 127.5 މިލިއަން ޑޮލަރަށެވެ.

މި ކުރެހުން ވެގެން ގޮސްފައިވަނީ 100 މިލިއަން ޑޮލަރަށް ވުރެ އަގުބޮޑުކޮށް ވިއްކާލެވުނު 12 ވަނަ ކުރެހުމަށެވެ. އަދި މި ނީލަން ނިމުމާއެކު ދުނިޔޭގެ އެންމެ އަގުބޮޑު ކުރެހުމަކަށް ވެގެން ގޮސްފައިވަނީ މި ކުރެހުމެވެ.

މީގެ ކުރިން މި ރެކޯޑު އޮންނަނީ ޕަބްލޯ ޕިކާސޯގެ ކުރެހުމެއް ކަމަށްވާ 'ލެސް ފެމޭސް ޑިއަލްގާ' އަތުގައެވެ. އެގޮތުން 2015 ވަނަ އަހަރު މި ކުރެހުން ވިއްކާލާފައިވަނީ 179.4 މިލިއަން ޑޮލަރަށެވެ.