މަޝްހޫރު ޕޮޕް ލަވަކިޔުންތެރިޔާ ޓެއިލާ ސްވިފްޓްގެ އާ އަލްބަމް ނެރެފައި ވަނީ މިމަހުގެ 10 ވަނަ ދުވަހުގައެވެ.

ޖުމްލަ 15 ލަވަ ހިމެނޭ ޓެއިލާގެ އާ އަލްބަމް "ރެޕިއުޓޭޝަން" އަށް ޓުއާއެއް ދޭން އުޅޭކަމަށް ހޯމަ ދުވަހު އޭނާ ވަނީ އިއުލާންކޮށްފައެވެ. ޓެއިލާގެ ވެބްސައިޓުގައި ވާގޮތުން އެ ޓުއާގެ ނަމަކީ "ޓެއިލާ ސްވިފްޓްސް ރެޕިއުޓޭޝަން ސްޓޭޑިއަމް ޓުއާ" އެވެ.

މި ޓުއާގެ ޓިކެޓްތައް ވިއްކަން ފަށާނީ އޭނާގެ 28 ވަނަ އުފަންދުވަހު އެވެ. ޓެއިލާގެ އުފަންދުވަހަކީ ޑިސެމްބަރު މަހުގެ 13 ވަނަ ދުވަހެވެ.

ނޯތު އެމެރިކާގައި މިމަހުގެ 28 އިން ފެށިގެން އެޑްވާންސްކޮށް ޓިކެޓް ވިއްކާނެ ކަމަށް ވެސް ޓެއިލާގެ ވެބްސައިޓުގައި ވަނީ ބުނެފައެވެ. ޓިކެޓާ ބެހޭ އެންމެ ފަހުގެ މައުލޫމާތު ޓިކެޓް މާސްޓާ ވެބްސައިޓުން ލިބެން ހުންނާނެ ކަމަށް ވެސް އެ ވެބްސައިޓުގައި ވެއެވެ. ބެލެވޭ ގޮތުގައި ޓެއިލާގެ މި ޓުއާ ފަށާނީ އަންނަ އަހަރުގެ ތެރޭގައެވެ.

"ރެޕިއުޓޭޝަން" ނެރުނުތާ 24 ގަޑިއިރު ތެރޭގައި އެ އަލްބަމުގެ ހަތް ލައްކައަށް ވުރެ ގިނަ ކޮޕީ ވަނީ ވިކި ހުސްވެފައެވެ. އެހެން ކަމުން މި އަލްބަމަށް ހަފްތާއެއްހާ ދުވަސް ވާއިރު މިލިއަނަށް ވުރެ ގިނަ ކޮޕީ ވިކޭނެ ކަމަށް ވަނީ ބެލެވިފައެވެ. މި އަލްބަމް ޕްރޮޑިއުސްކޮށްފައި ވަނީ ޓެއިލާގެ އިތުރުން ޖެކް އެންޓޮނޮފް، މެކްސް މާޓިން އަދި ޝެލްބެކްއެވެ. މުޅިއެކު 15 ލަވަ ހިމެނޭ މި އަލްބަމުގެ ދިގުމިނަކީ 58.33 މިނެޓެވެ.

"ރެޕިއުޓޭޝަން" ގެ ކުރިން ނެރުނު އަލްބަމް "1989" ގެ އަލްބަމަށް ވެސް ޓެއިލާ ވަނީ ޓުއާއެއް ދީފައެވެ. އެ ޓުއާގައި އޭނާއަށް ވަނީ 250 މިލިއަން ޑޮލަރަށް ވުރެ ބޮޑު އާމްދަނީއެއް ލިބިފައެވެ. ޓެއިލާގެ "1989" ނެރެފައިވަނީ 2014 ވަނަ އަހަރުގައެވެ. ހަފްތާއެއްގެ ތެރޭގައި މި އަލްބަމްގެ ވެސް 1.29 މިލިއަން ކޮޕީ ވިކި އެއަހަރު އެންމެ ގިނައިން ވިކުނު އަލްބަމުގެ ރެކޯޑް ހޯދާފައިވެ އެވެ.