ގިނަ ރައްޔިތުން އެދެނީ އިދިކޮޅު ޕާޓީތައް އެކުގައި މަސައްކަތްކުރުމަށް: އަލީ ޒާހިރު
9 ނޮވެމްބަރު 2017 | ބުރާސްފަތި 00:05މިވަނީ ވަރަށް ބޮޑަށް ފައްކާވެފައިވާ ޑިކްޓޭޓަރޝިޕެއް އުފެދިފައި
މ ކުނޫޒްގައި ޢަލީ ޒާހިރު ވާހަކަ ދައްކަވަނީ
ގިނަ ރައްޔިތުން އެދެނީ ގުޅިފައިވާ ޕާޓީތައް އެކުގައި މަސައްކަތް ކުރުމަށް ކަމަށާއި ރިޔާސީ އިންތިޚާބުގައިވެސް ގުޅިގެން މަސައްކަތް ކުރުމަށް ކަމަށް އަދާލަތު ޕާޓީގެ ނައިބު ރައީސް ޢަލީ ޒާހިރު ވިދާޅުވެއްޖެއެވެ.
ކުނޫޒުގައި ބުދަ ދުވަހުގެ ރޭ ބޭއްވި ޖަލްސާގައި އަލީ ޒާހިރު ވިދާޅުވީ ހުރިހާ ޕާޓީތަކުން ނެރޭނީ އެއް ކެނޑިޑޭޓް ކަމުގައި ވަނީނަމަ އެކަން އެގޮތަށް ނިންމުމުގެ ގާބިލްކަން ވެސް ޕާޓީތަކުގައި އެބަހުރި ކަމަށެވެ.
ކުރިއަށް އޮތް 2018 ގެ ރިޔާސީ އިންތިޚާބުގައި ރައީސް އަބްދުﷲ ޔާމީންގެ ރަނިން މޭޓަކީ އަނބިކަނބަލުން ފާތުމަތު އިބްރާހިމް ދީދީތޯ ނުވަތަ އިކޮނޮމިކް މިނިސްޓަރު މުހައްމަދު ސައީދުތޯ ނިންމާނީ ގުޅިފައިވާ ޕާޓީތަކުން ނޫން ކަމަށާއި ހަމައެގޮތައް ގުޅިފައިވާ ޕާޓީތަކުގެ ކެންޑިޑޭޓް ކަނޑައަޅާނީ ސަރުކާރުން ނޫން ކަމަށް އޭނާ ވިދާޅުވި އެވެ.
މިހާރު ރާއްޖޭގައި އޮތީ ހުދުމުޚްތާރު ވެރިކަމެއް ކަމަށާއި މިނިވަން މުއައްސަސާތަކެއް ވެސް ހުރީ ނަމެއްގައި ކަމަށާއި ދުވަހެއް ދުވަހަކަށް މިސަރުކާރު ބަލިކަށިވެ އެކަނިވެރިވެ، އެކި މީހުންނާ ޖެހެމުންގޮސް، މިހާރު އިލްމުވެރިންނާ ވެސް ޖެހިފައިވާކަމަށް އަލީ ޒާހިރު ވިދާޅުވި އެވެ. ރައީސް އަބްދުﷲ ޔާމީން ވެސް ދީނީ އިލްމުވެރިންނަށް ބަދު ބަސް ރައްދުކުރައްވަމުން ގެންދަވާ ކަމަށް އޭނާ ވިދާޅުވި އެވެ. އެކަމުން މިސަރުކާރު ހާލަތު އެނގިގެން ހިނގައްޖެ ކަމަށާއި 2018 ވަނަ އަހަރުގެ ރިޔާސީ އިންތިޚާބުގައިވެސް އިލްމުވެރިން ތިއްބަވާނީ ޢަދާލަތާ އެކުގައި ކަމަށް އޭނާ ވިދާޅުވި އެވެ.
"ހުރިހާ ދިމާއަކުން ހުރިހާ ކޮޅަކުން އުއްމީދު ގެއްލި އިލްމުވެރިންނަށް ފާޅުގައި އެއްޗެހި ގޮވަން ފެށީ. މިއީ ވަރަށް ނުބައި މެސެޖެއް އޭގެން ގެނެސްދޭ ކަމެއް. އިލްމުވެރިން ވިދާޅުވަނީ އިލްމުވެރިންގެ މަހަކީ ވިހައެކޭ. އެހެންވީމާ އިލްމުވެރިންނަށް ފާޅުގައި ބަދުބަސް ބުނަންފެށި ހިސާބުން މިސަރުކާރުގެ ހާލަތު، ރައީސުލްޖުމްހޫރިއްޔާގެ ހާލަތު ގޮސްފައިވާ ހިސާބު އެބަފެނޭ. އިރާދަކުރެއްވިއްޔާ 2018 ވަނަ އަހަރުގެ ރިޔާސީ އިންތިޚާބުގައިވެސް ޢިލްމުވެރިން ތިބޭނީ ޢަދާލަތު ޕާޓީއާ އެކުގައޭ އަދާލަތު ޕާޓީން ތާއީދު ކޮށްގެން ތިބި ފަޅީގައޭ. މަނިކުފާނަށް ތިޔަ ފުރުސަތު ހޯއްދަވައިދެއްވުމުގައި ބުރަ މަސައްކަތް ކުރެއްވި ފަރާތްތަކަށޭ ތިޔަ ބަދުބަސް ވިދާޅުވަނީ. އެހެންވީމާ މަނިކުފާނު ތިޔަ ހުންނެވި ހާލަތު ވަޒަން ކުރައްވާށޭ،" ޢަލީ ޒާހިރު ވިދާޅުވިއެވެ.
ގުޅިފައިވާ ޕާޓީތަކުން ފެށި ކޮންމެ މަސައްކަތެއްގައި ވެސް ކާމިޔާބު ލިބިފައިވާ ކަމަށާއި ރައްޔިތުންގެ މަޖިލީހުން ހޯދި ކާމިޔާބީ ފާހަގަ ކޮށްލެވޭ ކަމަށް ވެސް އަލީ ޒާހިރު ވިދާޅުވިއެވެ. މަޖިލީހުގެ މެޖޯރިޓީ ހޯދި ހިސާބުން މިސަރުކާރުން މިދަނީ ގާނޫނާ ހިލާފްވަމުން ކަމަށާއި ޗާޓުން ބޭރުން ކަންކުރަމުން ކަމަށް އޭނާ ވިދާޅުވި އެވެ.
